Read Китоби Муқаддас 1992, 2016 Ададҳо 36 Bible Online

Ададҳо 36 - Китоби Муқаддас 1992, 2016 bible

Ададҳо 36

¹Ва сардорони хонаводаҳои қабилаи банӣ‐Ҷилъод ибни Мокир ибни Менашше, ки аз қабилаҳои банӣ‐Юсуф буданд, наздик омада, ба ҳузури Мусо ва ба ҳузури раисон, сардорони хонаводаҳои банӣ‐Исроил сухан ронданд,

²Ва гуфтанд: «Худованд ба оғон мо амр фармудааст, ки заминро бо қуръа тақсим карда, ба тасарруфи банӣ‐Исроил бидиҳад; ва ба оғон мо аз ҷониби Худованд амр фармуда шудааст, ки мулки бародарамон Салофҳодро ба духтарони вай бидиҳад.

³Ва агар онҳо ба яке аз писарони сибтҳои дигари банӣ‐Исроил завҷа шаванд, мулки онҳо аз мулки падарони мо бурида гирифта мешавад, ва ба мулки сибте ки онҳо ба он дохил хоҳанд шуд, илова мегардад, ва мулки мо, ки аз рӯи қуръа гирифтаем, кам мемонад.

⁴Ва ҳатто вақте ки юбили банӣ‐Исроил фаро расад, мулки онҳо ба мулки сибте ки онҳо ба он дохил хоҳанд шуд, илова мегардад; ва аз мулки сибти падарони мо мулки онҳо бурида гирифта мешавад».

⁵Ва Мусо бар тибқи каломи Худованд ба банӣ‐Исроил амр фармуда, гуфт: «Сибти банӣ‐Юсуф дуруст мегӯянд.

⁶Ин аст он чи Худованд дар ҳаққи духтарони Салофҳод амр фармуда гуфтааст: „Онҳо метавонанд ба ҳар марде ки ба назарашон писанд ояд, завҷа шаванд, аммо фақат дар қабилаи сибти падари худ бояд завҷа шаванд,

⁷То ки мулки банӣ‐Исроил аз сибте ба сибте нагузарад; зеро ки ҳар яке аз банӣ‐Исроил бояд бо мулки сибти падарони худ вобаста бошанд.

⁸Ва ҳар духтаре ки мулкеро аз сибтҳои банӣ‐Исроил мерос мегирад, бояд ба яке аз қабилаи сибти падарони худ завҷа шавад, то ки ҳар яке аз банӣ‐Исроил мулки падарони худро мерос гиранд,

⁹Ва мулк аз як сибт ба сибти дигар нагузарад, балки ҳар яке аз сибтҳои банӣ‐Исроил ба мулки худ вобаста бошанд“».

¹⁰Пас, чунон ки Худованд ба Мусо амр фармуд, духтарони Салофҳод ончунон амал карданд.

¹¹Ва духтарони Салофҳод — Маҳло, Тирсо, Ҳоҷло, Милко ва Нӯо ба писарони амакҳои худ завҷа шуданд.

¹²Дар қабилаҳои банӣ‐Менашше ибни Юсуф онҳо завҷа шуданд; ва мулки онҳо дар сибти қабилаи падарашон боқӣ монд.

¹³Ин аст аҳком ва дастуроте ки Худованд ба воситаи Мусо дар даштҳои Мӯоб, назди Урдун, дар рӯ ба рӯи Ериҳӯ ба банӣ‐Исроил амр фармудааст.