Read Talaud PANDARIADDI 11 Bible Online

PANDARIADDI 11 - Talaud bible

PANDARIADDI 11

¹Paarorone, manga walahanna su ahewallu runia tumba'u uatahuanna sasinaukka sambau wuṛṛu i mangitou mappaattu wisara apan uasul᷊ungnga.

²Napawe i mangitou mammal᷊intadda su samba'an da'i, i mangitou na'omate su sambau leta'a ratakke su Babilonia, ana see namanuate poiaroddi.

³I mangitou uahahattote sangkatou ringannu waine, “Wette i ite ma'ola'a tela wuassu leta'a wuṛṛu lal᷊o'annu ma'oman sara maattikka.” Etearoddi i mangitou uatahuanna manga watu ipa'ola'a wal᷊en wuṛṛu tere'a ipandetta.

⁴Unni mangitou, “Wette i ite mapararisikku soa ringannu sambau candi apan puidde maddatingngu langitta, tadea'u i ite tumelengnga wuṛṛu tawe massal᷊iawukka su ahewallu runia.”

⁵Ne MAWU sinumossokke ma'ellega soa wuṛṛu candi apan niapararisikku taumata.

⁶Ana see i Tou nabbisara, “I mangitou indi sambau walahanna ringannu sasinaukka sambau, wuṛṛu indi wakkute panattaṛṛannu manga ṛiinni mangitou. Tate mal᷊annu lai i mangitou wotongnge ma'ola'a walate apulu mangitou.

⁷Mappianne i ite sumossokke wuṛṛu manongkakku sasinaukki mangitou tadea'u i mangitou tate waṛṛun kasunanna.”

⁸Etearoddi MAWU nanal᷊iawukki mangitou su ahewallu runia. Ana see i mangitou nangillol᷊ote napararisikku soa udde.

⁹Ana waugu udde soa udde nissago Babel, ana waugu isudde MAWU nanongkakku sasinaukku anambon walahanna, wuṛṛu wua isudde i mangitou nisal᷊iawukku MAWU su ahewallu runia.

¹⁰Ete indi papapulunni i Sem. Rua tonna napawe manawangnga wahewalla nal᷊iudda, su tempo Sem uukke 100 su tonnane, i tou naasomba sangkatou ana'a esakka aranne i Arpakhsad.

¹¹Wua'udde i tou ta'e nabbiakka 500 su tonnane lai, ana see naasomba al᷊arṛṛana'a waine.

¹²Su tempo udde i Arpakhsad uukke 35 su tonnane, i tou naasomba ana'a esakka aranne i Selah.

¹³Wua'udde i Arpakhsad ta'e nabbiakka 403 tonna lai, wuṛṛu naasomba al᷊aṛṛana'a waine.

¹⁴Su tempo i Selah 30 su tonnane, i tou naasomba ana'a esakka aranne i Eber.

¹⁵Wua'udde i Selah ta'e nabbiakka 403 su tonnane lai, wuṛṛu naasomba al᷊aṛṛana'a waine.

¹⁶Su tempo i Eber uukke 34 su tonnane, i tou naasomba ana'a esakka aranne i Peleg.

¹⁷Wua'udde i Eber ta'e nabbiakka 430 su tonnane lai, wuṛṛu naasomba al᷊aṛṛana'a waine.

¹⁸Su tempo udde i Peleg uukke 30 su tonnane, i tou naasomba ana'a esakka, aranne i Rehu.

¹⁹Wua'udde i Peleg ta'e nabbiakka 209 su tonnane lai, wuṛṛu naasomba al᷊aṛṛana'a waine.

²⁰Su tempo udde i Rehu uukke 32 su tonnane, i tou naasomba ana'a esakka aranne i Serug.

²¹Wua'udde i Rehu ta'e nabbiakka 207 su tonnane lai wuṛṛu naasomba al᷊aṛṛana'a waine.

²²Su tempo i Serug uukke 30 su tonnane, i tou naasomba ana'a esakka, aranne i Nahor.

²³Wua'udde i Serug ta'e nabbiakka 200 su tonnane lai wuṛṛu naasomba al᷊aṛṛana'a waine.

²⁴Su tempo i Nahor uukke 29 su tonnane, i tou naasomba ana'a esakka, aranne i Terah.

²⁵Wua'udde i Nahor ta'e nabbiakka 119 su tonnane lai, wuṛṛu naasomba al᷊aṛṛana'a waine.

²⁶Napawe i Terah uukke 70 su tonnane, i tou naasomba siri tallu ana'a esakka, eteudde i Abram, i Nahor wuṛṛu i Haran.

²⁷Ete indi papapulunni Terah: i Terah iamangngi Abram, i Nahor wuṛṛu i Haran. I Haran pia sangkatou ana'a esakka aranne i Lot.

²⁸I Haran nate su wanuane sassane, eteudde Ur su Babilonia, su tempo yamangnge ta'e wiakka.

²⁹I Abram naawingngi Sarai, wuṛṛu i Nahor naawingngi Milka ana'i Haran wawine. I Haran ta'e pia ana'a esakka waine aranne i Yiska.

³⁰Udde i Sarai tinna.

³¹I Terah nanantangngu soan Ur su Babilonia suadio'a ringanni Abram anangnge, i Lot pulunne, wuṛṛu i Sarai mananambone, eteudde awingngi Abram. I tou pia pandumma inai watukku wanua Kanaan. Arawe napawe na'omate su Haran, i mangitou namanua poiaroddi.

³²Wuṛṛu ete su tampa udde i Terah nate su uukka 205 su tonnane.