Read Talaud PANDARIADDI 12 Bible Online

PANDARIADDI 12 - Talaud bible

PANDARIADDI 12

¹MAWU nabbisara si Abram, “Tantanga'e wanuanu, ṛuangannu amonannu wuṛṛu wal᷊en yamangngu, wuṛṛu inaite watukku wanua apan Ta'u ipantingidda si'o.

²I ya'u sarun mangonggolla si'o papapulunna apan manambo wuṛṛu i mangitou sarun maola'a walahanna apan bahewalla. I ya'u sarun mangal᷊amatta si'o wuṛṛu arannu mabbal᷊i tumelengnga, ma'oman sara i'o maola'a al᷊amatta.

³I ya'u sarun mangal᷊amatta manga taumata apan mangngal᷊amatta si'o wuṛṛu mamontoga manga taumata apan mammontoga si'o. Wuṛṛu ana waugu i'o I ya'u sarun mangal᷊amatta anambon balahanna su runia.”

⁴I Abram uukke pitun pul᷊o l᷊ima su tonnane su tempo i tou nanantangngu i Haran, ere buatte nirolokku MAWU si tou. I Abram inaite watukku leta'u Kanaan suadio'a ringanni Sarai awingnge wuṛṛu i Lot ana'u tuṛṛangnge, wuṛṛu al᷊awo'u darotongnge see lai manga allangnge apan niasombanganni mangitou su i Haran. Napawe i mangitou na'omate su Kanaan,

⁶i Abram namal᷊intaddu leta'a udde na'oman sara i tou na'omate su alu pia taṛṛinone su More, eteudde tampa patataṛṛamawuanna su Sikhem. (Su tempo udde taumatan Kanaan ta'e uatana'a su leta'a udde.)

⁷MAWU naipasilon batangan-Ne si Abram wuṛṛu nabbisara si tou, “Ete indi wanua apan Ta'u ionggolla su papapulunnu.” Ana see i Abram napararisikku sambau mezbah hunan MAWU apan buatte naipabilon batangan-Ne si tou.

⁸Wua'udde i tou nanassukku amatanne watukku timukka, watukku wageangngu leta'a pia bowone su samba'an da'i soan Betel, wuṛṛu naddasanna suwallatu Betel wuṛṛu soa Ai; Betel su samba'an baṛṛata wuṛṛu Ai su samba'an da'i. Isudde lai i tou napararisikku mezbah wuṛṛu nassubba MAWU.

⁹Wua'udde i tou nanassukku amatanne apia wuassu tampa sambau watukku tampa manansunna, mabbatukku samba'an timukku leta'u Kanaan.

¹⁰Arawe su Kanaan tantal᷊anna pia ṛutumma apan bahewalla, na'oman sara i Abram inaite arauanne lai watukku timukka, watukku wanua Mesir natana'a poiaroddi maddatingngu ṛutumma udde mal᷊iu.

¹¹Su tempo i tou sumabbite passaranna wuṛṛu sumuttate watukku wanua Mesir, i tou nabbisarate si Sarai awingnge, “I'o maṛṛamaga atonna awingku.

¹²Amungkangngu taumatan Mesir maasilo si'o, i mangitou sarun massunna manungku i'o awingku ana see i ya'u sarun pateanni mangitou wuṛṛu i'o iwala wiakka.

¹³Nariaddi mappianne i'o pabbisarate manungku i'o tuari'u tadea'u i ya'u iwala mangitou wiakka wuṛṛu olaanna mapia ana waugu i'o.”

¹⁴Ne atonna, napawe i Abram niumamatte su passaranna wuṛṛu na'omate su wanua Mesir, taumata Mesir naasilo manungku i Sarai tumaniten maṛṛamaga atonna.

¹⁵Manga pira taumatan araratuanna naasilo si tou apiddu namasingkatta ratu manungku maṛṛamaga atonna wawine udde; ana waugu udde i tou niapidda watukku wal᷊en araratuanna.

¹⁶Ana waugu i Sarai, ratu naungnge mapia si Abram wuṛṛu nangonggollu manga allangnga si tou, ammul᷊annu domba wuṛṛu ambingnga, sapi, keledai wuṛṛu unta.

¹⁷Arawe ana waugu ratu nanganu si Sarai, MAWU nandantan al᷊aṛṛusa'itta apan maata'utta su ratu wuṛṛu manga taumata sulal᷊ummu wal᷊en araratuanne.

¹⁸Ana see ratu namago si Abram wuṛṛu naiwal᷊o si tou, “Apate apan niolangngu su saruangku indi? Anio tawe niwal᷊onu manungku udde awingngu?

¹⁹Anio niwal᷊onu manungku i tou tuarinu wuṛṛu namala'u manganu maola'a awingku? Indi i tou, awingngu; apira'e wuṛṛu roote!”

²⁰Ratu namarenta siri pira mamanarane, wuṛṛu i mangitou napasabangngi Abram wuassu wanua udde suadio'a ringannu awingnge wuṛṛu al᷊awo'u darotongnge.