Read Talaud PANDARIADDI 13 Bible Online

PANDARIADDI 13 - Talaud bible

PANDARIADDI 13

¹I Abram nanantangngu Mesir wuṛṛu inaite watukku sawannakka, mattuddan watukku timukku Kanaan ringannu awingnge see lai al᷊awo'u darotongnge, wuṛṛu i Lot tinumantalongnga lai.

²I Abram alate atonna, i tou uatahuanna domba, ambingnga, sapi, see lai sal᷊a'a wuṛṛu wul᷊awanna.

³Ne i tou inaite wuassu tampa sambau watukku tampa waine, mattuda watukku Betel. I tou na'omate su leta'a su wallatu Betel wuṛṛu Ai, su tampa pia taṛṛinone suapa i tou dorone naddasanna

⁴wuṛṛu napararisikku mezbah. Isudde i tou massubba MAWU.

⁵I Lot lai uatahuanna amonanna wuṛṛu manga allangnga see lai domba, ambingnga wuṛṛu sapi.

⁶Ana waugu udde leta'a isudde tawe matiudda nannal᷊one atanaanni tarua, ana waugu winatangngi tarua tumaniten manambo.

⁷Ana see nariaddite pattatiakka su wallatu mallal᷊u'addi Abram wuṛṛu mallal᷊u'addi Lot. (Su tempo udde taumatan Kanaan wuṛṛu taumatan Feris ta'e uatana'a su leta'a udde).

⁸I Abram nabbisara si Lot, “Iaddua indi sangkatuṛṛangnga, dal᷊eo amungkangngu manga taumatanu wuṛṛu manga taumata'u uatatiakka.

⁹Ana waugu udde mappianne i ite mattal᷊ei. Pamilete wageangnge suapa wuassu leta'a indi apan ipaapulunu. Amungkangngu i'o inai su samba'a indi, ya'u sarun inai watukku tampa waine.”

¹⁰I Lot nanaile leta'a apan uapal᷊iwutta si tou wuṛṛu i tou naasilo manungku ahewallu Wawal᷊annu Yordan, maddatingngu soan Zoar manambo ua'ene, naal᷊ihidda Waillu MAWU ara'e naal᷊ihidda leta'u Mesir. (Etearoddi olangnge tantal᷊anna MAWU taambe naṛṛimunsa'a manga soan Sodom wuṛṛu Gomora.)

¹¹Panginsueanne i Lot namile ahewallu Wawal᷊annu Yordan udde, ana see inaite watukku ra'i. Etearoddi ruan katou taumata udde natal᷊ei.

¹²I Abram sidutu uatana'a su leta'u Kanaan, arawe i Lot naddasanna su manga soa su wawal᷊anne naddatingngu maranin Sodom.

¹³Soa Sodom udde wawanuannu manga taumata apan tumaniten dal᷊eo wuṛṛu marosa su saruannu MAWU.

¹⁴Napawe i Lot inaite aroddi, MAWU nabbisara si Abram, “Wuassu tampa dararisiṛṛannu udde, pa'ellege paapia-pia su al᷊awo'u pi'une;

¹⁵i ya'u sarun mangonggolla si'o wuṛṛu su papulunnu ahewallu leta'a apan a'ellehannu udde tadea'u maola'a pussaanu saran mal᷊annu-l᷊annu.

¹⁶I Ya'u sarun mangonggolla si'o papapulunna apan tumanite manambo, ma'oman sara tawedu pia sangkatou apan botongnge maareengngi mangitou. Su ereapa taumata tawe maareengngu awu su leta'a, aroddi lai papapulunnu tawe iareengnga.

¹⁷Orassa indi, pal᷊intara'e ahewallu leta'a indi, ana waugu ya'u mangonggollu udde si'o.”

¹⁸Wua'udde i Abram nangingkattu rasanne ana see namanuate maranin manga punnu aaluanna pia taṛṛinone tampa patataṛṛamawuanna su Mamre maranin Hebron, wuṛṛu isudde i tou napararisikku mezbah su MAWU.