Read Talaud PANDARIADDI 14 Bible Online

PANDARIADDI 14 - Talaud bible

PANDARIADDI 14

¹Siri appata ratu, eteudde: i Amrafel wuassu Babilonia, i Ariokh wuassu Elasar, i Kedorlaomer wuassu Elam, wuṛṛu i Tideal wuassu Goyim

²napapangalo nandaappa siri lima ratu waine, eteudde: i Bera wuassu Sodom, i Birsya wuassu Gomora, i Syinab wuassu Adma, i Semeber wuassu Zeboim, wuṛṛu ratu wuassu Bela apan isassago lai Zoar.

³Siri lima ratu udde nabbaidda wuṛṛu nangammullu tantara mangitou su Wawal᷊annu Sidim, apan orassa indi isassago Tahal᷊oangnga Nate.

⁴Al᷊annune mapul᷊o dua su tonnane i mangitou paparentanni Ratu Kedorlaomer, arawe su tonna apul᷊o tallune, i mangitou namangalo nandoappa si tou.

⁵Su tonna appul᷊one appata, Kedorlaomer wuṛṛu manga hawene nirumanta ringannu tantara mangitou wuṛṛu napaarugin taumatan Refaim su Asyterot-Karnaim, taumatan Zuzim su Ham, taumatan Emim su Syawe-Kiryataim,

⁶wuṛṛu taumatan Hori su panenteannu Edom, ana see nangenggenna si mangitou araune sara El-Paran su winggin wadda'a.

⁷Wua'udde manga mangangenggenna nabal᷊i'a apia wuṛṛu nabelengke watukku En-Mispat apan orassa indi isassago Kades. I mangitou nanahuanna ahewallu leta'u Amalek wuṛṛu napaarugin taumatan Amori apan uatana'a su Hazezon-Tamar.

⁸Wua'udde manga ratu wuassu Sodom, Gomora, Adma, Zeboim wuṛṛu Bela nangatokku warisannu tantara mangitou su Wawal᷊annu Sidim ana see napapangalote,

⁹nandoappa manga ratu wuassu Elam, Goyim, Babilonia, wuṛṛu Elasar; nariaddi, siri lima ratu nandoappa siri appata.

¹⁰Wawal᷊anne udde napenen pa'al᷊ianna aspalla, wuṛṛu napawe manga ratu wuassu Sodom wuṛṛu Gomora naddea tal᷊angannu watanganne wuassu pangalo, i mangitou nanawo su manga loṛṛangnga udde. Siri tallu ratu waine naasabangnga wuṛṛu tinumal᷊angnga watukku panenteanna.

¹¹Siri appata ratu apan nauntunga, nangaṛṛo al᷊awo'u saranapa su Sodom wuṛṛu Gomora, nasutta lai manga anna, ana see napul᷊e.

¹²I Lot ana'u tuṛṛangngi Abram uatana'a lai su Sodom, ana waugu udde i tou lai niapiddu seetta suadio'a ringannu manga darotongnge.

¹³Arawe sangkatou apan naatal᷊angnga nangalaen arariadianna udde si Abram, taumatan Ibrani udde. I Abram uatana'a maranin manga punnu alu pia taṛṛinone tampa patataṛṛamawuanna tatahuananni Mamre, taumatan Amori. I Mamre wuṛṛu manga tuṛṛangnge, eteudde i Eskol wuṛṛu i Aner eteudde manga hawen i Abram.

¹⁴Napawe i Abram naaringikka manungku ana'u tuṛṛangnge niatawanna, i tou nangammulu anambon taumata sulal᷊ummu rasanne, eteudde mapapanden pangalo, anambone 318 su atoune, ana see nangenggenna siri appata ratu udde naddatingngu soan Dan.

¹⁵Isudde i Abram nattahia manga taumatane naola'a piran kawageanganna, ana see namangalo seetta su tempo ṛabbi wuṛṛu napaarugi mangitou. I tou nengenggenna si mangitou naddatingngu Hoba su samba'an sawannaku soa Damsyik.

¹⁶I Abram napangaṛṛo apia manga darotongnga apan buatte niaaṛṛo, see lai i Lot ringannu darotongnge, wuṛṛu manga wawine wuṛṛu taumata niatawanna waine lai.

¹⁷Napawe buatte napaarugin Ratu Kedorlaomer ringannu manga ratu hawene, i Abram nabelengke. Ana see ratun Sodom inai nanal᷊oho si tou su Wawal᷊annu Syawe apan isassago lai Wawal᷊annu Ratu.

¹⁸I Melkisedek, ratun Salem apan uamanara lai imammu MAWU Ruata Apan Atanggaṛṛanne, uaapiddu roti wuṛṛu anggore ia'onggolla si Abram,

¹⁹ana see nangal᷊amatta si Abram, wisarane, “Antimanna MAWU Ruata Apan Atanggaṛṛanne, apan buatte nandiaddi langitta wuṛṛu runia, mangal᷊amatta si Abram!

²⁰Daralo su MAWU Ruata Apan Atanggaṛṛanne, apan buatte nangal᷊amatta si'o ringannu auntunganna wuassu manga seennu.” Wua'udde i Abram nangonggollu mapul᷊on kawageanganna wuassu al᷊awo'u darotongnga niaaṛṛo apan buatte niapiddi tou.

²¹Ana see ratun Sodom nabbisarate si Abram, “Anute darotongnga apan niaaṛṛo udde, arawe wala'awe papawelenga'a si ya'u anambon manga taumata'u.”

²²Arawe i Abram sinumimbakka, “I Ya'u massalu su saruannu MAWU, MAWU Ruata Apan Atanggaṛṛanne, Nandiaddi langitta wuṛṛu runia,

²³manungku ya'u tate manganu saranapa wuassu pussaanu, ewe'e lai sambassutta wananna ara'e samponggo'a tal᷊in sandalengnga lai tawe. Ringannu aroddi i'o tawe mapabbisara, ‘Ete i ya'u napaalan i Abram!’

²⁴I Ya'u madiri manganu manga saranapa huna'u sassane. I ya'u tumba'u maapulu manengkamma apa apan buatte nipaattu manga taumata'u. Arawe wala'e manga hawe'u, eteudde i Aner, i Eskol wuṛṛu i Mamre, manganu wageangngi mangitou.”