Read Talaud PANDARIADDI 15 Bible Online

PANDARIADDI 15 - Talaud bible

PANDARIADDI 15

¹Wua'udde, i Abram naasomba sondappa wuṛṛu naaringikka MAWU nabbisara si tou, “Arie paata'utta, i Abram, i Ya'u sarun mallu'adda si'o wuassu asasilaka, wuṛṛu mangonggolla si'o lal᷊antakke apan manambo.”

²Arawe i Abram nabbisara, “MAWU Apan Atanggaṛṛanne, MAWU tawe nangonggollu ana'a si ya'u. Taumata apan mamusa'a darotongku tumba'u i Eliezer, allangku wuassu Damsyik. Nariaddi apa hunane MAWU mangonggollu lal᷊antakke si ya'u?”

⁴Wua'udde i Abram naaringikka MAWU nabbisara si tou apia, “Wal᷊ine allangngu apan sarun mamusa'a darotongngu, ewe'e anangngu esakka sassane.”

⁵MAWU nangapiddi Abram su liudde ana see nabbisara si tou, “Paningngarate langitta, wuṛṛu annama'o pandeengngu manga anumpitanna; i'o sarun manahuanna papapulunna anambone ere manga anumpitanna udde.”

⁶I Abram nangimante MAWU, wuṛṛu ana waugu udde MAWU nanengkamma lai si tou maola'a taumata apan ma'al᷊uassa naung-Nge.

⁷Wua'udde MAWU nabbisara apia si tou, “Ete i Ya'u MAWU, apan buatte namiaṛṛangngu sinumabbangnga wuassu wanua Ur su Babilonia, tadea'u panantilannu leta'a indi si'o maola'a pusaanu.”

⁸Arawe i Abram naiwal᷊o, “Oh, MAWU Apan Atanggaṛṛanne, ereapa i ya'u wotongnge maasingkatta manungku leta'a udde maola'a pusaa'u?”

⁹MAWU sinumimbakka, “Panganute onggol᷊a'a si Ya'u sambau sapi wawine, sambau ambingnga wawine wuṛṛu sambau domba esakka, sambau-sambau uukke tallu tonna, wuṛṛu lai sambau manu'a tekukur wuṛṛu sambau manu'a merpati.”

¹⁰Ana see i Abram nanganute manga winatangnga udde ionggolla su Ruata. Sapi ambingnga wuṛṛu domba udde sambau-sambau niwa'a nabbal᷊i darua, wuṛṛu manga wa'ane udde niaddo uasasaruanna niantaga paddarua. Arawe manga munu'u winalanganna udde tawe niwa'a.

¹¹Ṛemessa udde niarunannu manga manu'u winalanganna taṛṛa inassa winal᷊unanna, arawe i Abram nallimbuakka si mangitou.

¹²Napawe matannallo umatuppe, i Abram niamatiil᷊anna mal᷊angnga. Inaṛṛombanganne i tou ni rantannu atata'utta tumaniten bahewalla.

¹³MAWU nabbisara si tou, “Paanaunge, papapulunnu sarun mabbal᷊i taumata raho su wanua waine; i mangitou sarun maola'a allangnga poiaroddi wuṛṛu sarun mattaṛṛuallangnga appattu ṛasutta su tonnane al᷊annune.

¹⁴Arawe balahanna apan mangngallangnga papapulunnu udde sarun Ta'u iṛṛuumanna wuṛṛu su tempo papapulunnu manantangngu wanua udde, i mangitou sarun mangapiddu manambo darortongnga.

¹⁵I'o sassane sarun maal᷊al᷊appa uukka apan matanggakka; i'o sarun mate ringannu matammudda, ana see ilabbingnga.

¹⁶Napawe nal᷊iute papapulunnu su aippatu ṛawanne, papapulunnu sarun mabelengnga apia isindi, ana waugu i Ya'u tawe mallimbuakka taumatan Amori tantal᷊anna i mangitou taambe naola'a aroddi al᷊aleone ma'oman sara wotongnge iṛṛuumanna.”

¹⁷Napawe allo ṛabbite, inaṛṛombanganne nilumapputta sambau sunggilla apan pia timbulle wuṛṛu sasol᷊oanna apan luṛṛenggamma, ana see sinumabbi su wallattu manga ṛemessa apan buatte niwa'a udde.

¹⁸Su tempo udde lai MAWU na'ola'a pa'aire ringanni Abram. MAWU nabbisara, “I Ya'u maddiandi sarun mangonggolla su papapulunnu ahewallu leta'a indi, manattakka wuassu passarannu wanua Mesir maddatingngu sal᷊ukku Efrat,

¹⁹nasutta lai leta'u taumatan Keni, Kenas, Kadmon,

²⁰Her, Feris, Refaim,

²¹Amori, Kanaan, Girgasi wuṛṛu Yebus.”