Read Talaud PANDARIADDI 17 Bible Online

PANDARIADDI 17 - Talaud bible

PANDARIADDI 17

¹Napawe i Abram uukke sioten pul᷊o sio su tonnane, MAWU naipasilon batanganne si tou wuṛṛu nabbisara, “Ete i Ya'u Ruata Apan Lembontaṛṛino. Paatuṛṛutte si Ya'u wuṛṛu sidutu pa'ola'e apulu-U.

²I Ya'u sarun ma'ola'a pa'aire ringannu wuṛṛu mangonggolla si'o papapulunna apan manambo.”

³Ana see niumal᷊intuddate i Abram, wua'udde Ruata nabbisara,

⁴“Ete indi pa'aire apan i Ya'u olaanna si'o; i Ya'u maddiandi manungku i'o sarun maola'a yamangngu al᷊amonan anambon balahanna. Ana waugu udde arannu waline i Abram, ewe'e i Abraham.

⁶I Ya'u sarun mangonggolla si'o, manambo ana'a papapulunna, wuṛṛu su wallatti mangitou sarun piaddu maola'a manga ratu. Papapulunne sarun mabbal᷊i aroddi anambone, ma'oman sara i mangitou maola'a manga balahanna.

⁷I Ya'u sarun manipussa paaire-U si'o wuṛṛu su papapulunnu, uasasansunna, wuṛṛu paaire udde tawe panguddusanne. I Ya'u sarun maola'a Ruatanu wuṛṛu Ruatan papapulunnu.

⁸I Ya'u sarun mangonggolla si'o wuṛṛu su papapulunnu, leta'a indi, apan orassa indi wawanuannu ere sangkatou taumata raho. Ahewallu leta'u Kanaan sarun maola'a pussa'an papapulunnu saran mal᷊annu-l᷊annu wuṛṛu i Ya'u sarun maola'a Ruata mangitou.”

⁹Ruata nabbisara apia si Abraham, “I'o lai ṛinone matuṛṛutta su paaire indi, mawae i'o ara'e lai papapulunnu mallal᷊isansunna.

¹⁰I'o wuṛṛu anambon papapulunnu esakka ṛinone sunatanna.

¹¹Manattakka wuassu orassa indi i'o ṛinone mapasunattu ana'a esakka maradio'a uukke ual᷊u allo, nasutta lai manga allangnga apan nisungkangnga su wal᷊enu ara'e niawalliannu. Sunatta udde sarun maola'a tatiala wuassu paaire-U wuṛṛu i yamiu.

¹³Suapan taumata ṛinone sunatanna, wuṛṛu udde sarun maola'a tatiala su wadangnga apan mapaal᷊iatta'a manungku paaire-U ringannu udde tawe pangudusanne.

¹⁴Suapan taumata esakka apan tawe nisunatta tate lai mareengnga al᷊aṛṛana-U ana waugu i tou tawe uaaggassa pa'aire udde.”

¹⁵Wua'udde Ruata nabbisara si Abraham, “Ariete i'o mamago awingngu i Sarai; manattakka orassa indi aranne i Sara.

¹⁶I Ya'u sarun mangal᷊amatta si tou wuṛṛu i tou sarun manungkangngu sangkatou ana'a esakka apan sarun Ta'u ionggolla si'o. Ore, i Ya'u sarun mangal᷊amatta si Sara, wuṛṛu i tou sarun maola'a inangngu al᷊amonan manga balahanna. Su wallatu manga papapulunne sarun piaddu maola'a manga ratu.”

¹⁷Ana see i Abraham niumal᷊intudda, arawe i tou nilumage napawe naṛṛingidda, “Ereapa wotongnge sangkatou esakka apan uuke maṛṛasutte su tonnane indi maasomba ana'a? Ereapa wotongnge i Sara mangunsiwe su uukka siom pul᷊o su tonnane?”

¹⁸Ana see i tou nabbisarate Ruata, “Mappianne ete i Ismael maola'a pussa'an darotongku.”

¹⁹Arawe Ruata nabbisara, “Tawe, i Sara awingngu sarun manungkangngu ana'a esakka wuṛṛu aranne sarun isagonu i Ishak. I Ya'u sidutu uaagassa paaire-U su ana'a udde wuṛṛu ringannu papapulunne saran mal᷊annu-l᷊annu. Pa'aire udde tawe pangudusanne.

²⁰Arawe i Ya'u mangutungngu darorongngu su ola'i Ismael. Ana wugu ude i tou Ta'u al᷊amatanna wuṛṛu Ta'u onggol᷊annu papapulunna apan manambo. I tou sarun maola'a al᷊amona mapul᷊o dua piaṛṛa'u ṛuanganna, wuṛṛu papapulunne sarun Ta'u olaana sambau balahanna apan bahewalla.

²¹Arawe pa'aire-U ia'ukka ringanni Ishak, anangngu apan sarun isungkangngi Sara, tonna su hati iraṛṛangngo tempone ere indi.”

²²Napawe nuddusse nabbisara aroddi, Ruata nanantangngi Abraham.

²³Su allo udde lai, i Abraham naddaringikka Ruata wuṛṛu nanunatta si Ismael anangnge, wuṛṛu anambon esakka sulal᷊ummu wal᷊ene, manga allangnga apan niasungkangnga sulal᷊ummu wal᷊ene aroddi lai apan niawallianne.

²⁴I Abraham uukke sion pul᷊o sio su tonnane su tempo i tou nisunatta

²⁵wuṛṛu i Ismael anangnge, uukke mapul᷊o tallu su tonnane.

²⁶I mangitou nisunatta su allo apan uasul᷊ungnga,

²⁷suadio'a ringannu anambon allangngi Abraham.