Read Talaud PANDARIADDI 19 Bible Online

PANDARIADDI 19 - Talaud bible

PANDARIADDI 19

¹Napawe buatte nattindaho ringanni Abraham, ruan katou mala'ekatta udde inaite su Sodom wuṛṛu na'omate poiaroddi alloarane. I Lot tantal᷊anna ua'ianna su ngaran soa, wuṛṛu napawe naasilo sitarua, i tou dirumarisikka manal᷊oho sitarua. Ana see niumal᷊intuddate i tou su saruanni tarua,

²wuṛṛu nabbisara, “Manga Tuangnga, wette otonga'e asuene su wal᷊e'u. Manga Tuangnga wotongnge mangukkassa ledda wuṛṛu manaṛṛabbi su wal᷊e'u. Tiṛṛabbi wuṛṛu wotongnge, manga Tuangnga matimpu'o maruaallu atonna ana see manassukku amatanna.” Arawe itarua sinumimbakka, “Tarimakase, wala'e iambua manaṛṛabbi su leta'u mal᷊alangngu soa.”

³I Lot mangke sinumal᷊ande, wuṛṛu panginsueanne itarua sinumutta suadio'a ringanni tou sulal᷊ummu wal᷊ene. I Lot nanaddia anna matemangnga wuṛṛu nallol᷊o roti addaalle, ana see niumante i mangitou.

⁴Arawe tantal᷊anna manga raho udde inaite matiilla, manga taumatan Sodom nalliwunna wal᷊en udde. Anambon esakka su soa udde, mawae timmade ara'e dario'a uaammule isudde.

⁵I mangitou niumui si Lot, wuṛṛu naiwal᷊o, “Suapa manga taumata apan nanaṛṛabbi su wal᷊enu? Tantil᷊a'e itarua, tadea'u i yami wotongnge mailalo'a ringanni mangitou!”

⁶I Lot sinumabbangnga wuassu wal᷊ene, wuṛṛu napawe buatte naṛṛuuddu ngara,

⁷i tou nabbisara su manga taumatan Sodom udde, “Manga tuṛṛangnga, i ya'u sumal᷊ande, ariewe ma'ola'a inolaanna al᷊eone aroddi!

⁸Paddaringite, i ya'u pia ruan katou ana'a maṛṛuala. Salaiwe i mangitou ta'u itantilla si yamiu wuṛṛu i yamiu wotongnge ma'ola'a walate apulung kamiu. Arawe ariewe manal᷊asa'u manga raho'u indi; ana waugu i ya'u ṛinone mallu'adda sitarua.”

⁹Arawe unnu manga taumatan Sodom udde si Lot, “Passal᷊iu, I'o taumata raho mangatokki yami? Ei, passal᷊iu! Amungkangngu tawe massal᷊iu, i'o sarun puul᷊anni yami ma'ikkatanna wuassu taumata ruan katou udde.” Ana see i mangitou nanuṛṛuddi Lot wuṛṛu nangelekka nanggohakka ngara.

¹⁰Arawe ruan katou raho udde nangul᷊ukku liman tarua namol᷊engnga si Lot niapasutta sulal᷊ummu wal᷊en, ana see naṛṛuuddu ngara.

¹¹I mangitou napaawutan anambon taumata su liuddu wal᷊en udde, na'oman sara manga taumata udde tate naasomba ngara udde apia.

¹²Ruan katou raho udde nabbisara si Lot, “Amungkangngu i'o pia ana'a esakka, ana'a wawine, mananambo ara'e ana'u tuṛṛangnga waine apan uatana'a sulal᷊ummu soa indi, apira'e i mangitou sumabangnga wua isindi,

¹³ana waugu soa indi sarun soṛṛowanni yami. MAWU naaringikke manga aalae apan mawakkata su tumana'u soa indi, wuṛṛu i yami buatte nirolokki Tou iapaasoṛṛobba soan Sodom.”

¹⁴Ana see i Lot inaite naisasomban ruan katou tunangan anangnge, wuṛṛu nabbisara, “Paal᷊ihakke sumabangnga wuassu tampa indi, ana waugu MAWU sarun manoṛṛoba soa indi.” Arawe i mangitou massunna manungku i Lot tumba'u ual᷊al᷊akkangnga.

¹⁵Napawe maranite nallo, ruan katou mala'ekatta udde mannasa si Lot tadea'u paal᷊ihakke manantangngu tampa indi. “Paal᷊ihakke,” unni tarua, “Paal᷊ihakke ringannu awingngu wuṛṛu ruan katou anangngu maṛṛuala wuassu tampa indi, tadea'u i yamiu tawe mate napawe soa indi soṛṛowanna.”

¹⁶I Lot niumal᷊iwu. Arawe MAWU niumakkanni tou; ana waugu udde ruan katou rahone nangehetta si Lot wuṛṛu awingnge see lai ruan katou anangnge watukku liuddu soa.

¹⁷Wua'udde sangkatou wuassu mala'ekatta udde nabbisara, “Tal᷊angke panal᷊amatte niawanu! Imbaṛṛangnga manaile liudda wuṛṛu imbaṛṛangnga mangillol᷊o su wawal᷊anne. Tal᷊angke watukku panenteanna, tadea'u i yamiu tawe mate!”

¹⁸Arawe i Lot sinumimbakka, “Uare, Tuangnga arie pandolokki yami tumal᷊angnga watukku panenteanna.

¹⁹Atonna, i Tuangnga tumanite nantul᷊ungku wuṛṛu nanal᷊amatta niawa'u. Arawe panenteanna udde aroddi araune; aṛṛengenne i ya'u araṛṛiuannu asasilaka udde ana see i ya'u mate tantal᷊anna taambe na'oma poiaroddi.

²⁰Pa'ellege, su saruannu udde pia soa addio'a tawe marau wua isindi. Walaawe i ya'u tumal᷊angnga poiaroddi tadea'u i ya'u masal᷊amatta.”

²¹Mala'ekatta udde sinumimbakka, “Ore aroddite, soa addio'a udde tawe ta'u soṛṛowanna.

²²Paal᷊ihakka tal᷊angke! Ana waugu i ya'u tawe maasoṛṛobba amungkangngu i'o taambe naddatingnga poiaroddi.” Ana waugu i Lot nanagon soa udde addio'a, ne soa udde nisago Zoar.

²³Matannallo tantal᷊anna sussabangnga su tempo i Lot na'omate su Zoar.

²⁴Inaṛṛombanganne MAWU nanossokku uranna belerangnga pia putungnge su Sodom wuṛṛu Gomora.

²⁵Soa darua udde nisoṛṛoba, see lai ahewallu wawal᷊anne wuṛṛu anambon manga sasuanna ana see anambon tumana'u soa isudde.

²⁶Arawe awingngi Lot nanaile liudde, ana see i tou nawal᷊u nabbal᷊i diṛṛin asimma.

²⁷Tiṛṛabine marua allo, i Abraham nasasaṛṛawutta inai watukku tampa dararisiṛṛanni tou su saruannu MAWU su allo aneṛṛabba.

²⁸I tou na'ellega watukku Sodom wuṛṛu Gomora wuṛṛu su ahewallu wawal᷊anne, wuṛṛu naasilo timbulla sussal᷊oi wuassu leta'a udde, naal᷊ihidda ere timbulla wuassu sunggillu wawalla.

²⁹Etearoddi, napawe MAWU Ruata nanoṛṛoba manga soa udde su wawal᷊anna tatanaanni Lot, MAWU Ruata naanaungnga si Abraham wuṛṛu nantul᷊ungngi Lot tinumal᷊angngu watanganne.

³⁰Ana waugu i Lot matta'utta matana'a su Zoar, ne i tou inaite watukku panenteanna, suadio'a ringannu ruan katou anangnge wawine, ana see natana'a sulal᷊ummu sambau liangnga.

³¹Ana'a wawine pahul᷊une nabbisara tuarine, “I Papa timmadete, wuṛṛu su ahewallu wanua soa indi tate esakka apan botongnge mattatamban kaddua tadea'u yadua maasomba ana'a.

³²Wette, iapawu'anni yadua i papa, ana see yadua matiilla ringanni tou tadea'i yadua maasomba ana'a.”

³³Su ṛabbi udde itarua nangonggolu anggore su yamangngi tarua, ana see iapa pahul᷊une natiilla ringannu yamangnge; arawe yamangnge aroddi niwu'anne wagate apa apan nariaddi.

³⁴Tiṛṛabine iapa pahul᷊une nabbisara tuarine, “Masaṛṛabi ya'u buatte natilla ringanni papa! Takka ṛabbi i papa wu'ananni yaddua apia. Ana see atiille i'o ringanni tou. Tadea'u yadua sangkatou-sangkatou maasomba ana'a.”

³⁵Etearoddi su ṛabbi udde itarua napawu'anni Lot, wuṛṛu iapa ana'a aruane natilla ringanni tou. Wuṛṛu i Lot tumanite niwu'anne na'oman sara i tou waga apa apan buatte nariaddi.

³⁶Ana see ana'i Lot darua udde piate illoṛṛo wuassu yamangngi tarua sassane.

³⁷Iapa pahul᷊une nangunsiwen ana'a esakka wuṛṛu nissago i Moab. I tou nabbal᷊i yupungngu al᷊amonan taumatan Moab naddatingngu orassa indi.

³⁸Iapa ana'a aruane nangunsiwen ana'a esakka lai wuṛṛu nissago Ben-Ami. I tou nabbal᷊i yupungngu al᷊amonan taumatan Amon naddatingngu orassa indi.