Read Talaud PANDARIADDI 2 Bible Online

PANDARIADDI 2 - Talaud bible

PANDARIADDI 2

¹Ne nuddusse pandariaddi ahewallu ul᷊il᷊in pati'uppa.

²Su allo appitune Ruata suete nanginsue manara-Ne udde, ana see i Tou nangillol᷊ote.

³Ne i Tou nangal᷊amatta allo appitune udde, wuṛṛu niolang-Nge sambau allo apan ahewal᷊anne, ana waugu su allo udde Ruata nangillol᷊o napawe i Tou buatte nanginsue manara.

⁴Eteudde watti'u pandariaddi ul᷊il᷊im pati'uppa. Su tempo Ruata na'ola'a ul᷊il᷊in pati'uppa,

⁵taambe bualanna apan tinumuwo wuṛṛu taambe manga sinuananna su runia, ana waugu Ruata taambe napaasossokku uranna wuṛṛu taambe taumata mammanara leta'a udde.

⁶Arawe ua'e u'al᷊iwombonga wuassu wantan leta'a wuṛṛu wowon dunia masabbute.

⁷Wua'udde Ruata nanganu leta'a sangkompenga, niola'a nabbal᷊i sangkatou taumata, ana see napaasabangu singangu apan mangngonggollu wiakka sulal᷊ummu loṛṛangu ngirunne; ne nabbiakke taumata udde.

⁸Nanansunna udde Ruata na'ola'a wailla su Eden, su samba'an da'i, wuṛṛu niapaatana'e isudde taumata apan buatte niolang-Nge.

⁹Ruata napatuwon al᷊awa'u hatin aaluanna apan maṛṛansanga wuṛṛu maggessi manga wua apan mapia. Su pattangngannu wailla udde tinumuwote alu apan mangngonggollu wiakka, wuṛṛu alu apan mangngonggollu asingkatta su ola'u apapia wuṛṛu al᷊al᷊eo.

¹⁰Sambua sal᷊ukka mangngelekka wuassu Eden, maṛṛolo wailla udde; wuṛṛu su liuddu Eden sal᷊ukka natahia nappenga appata.

¹¹Iapa paarorone aranne Pison; sal᷊ukka udde mangngelekka mammal᷊iwutta leta'u Hawila.

¹²Isudde niasombanganna wul᷊awanna tutune wuṛṛu manga saranapa hal᷊urune mawangngi apan masahadda paddeaanne, ana see lai manga watu permata.

¹³Sal᷊ukka aruane aranne Gihon; ua'ene mangngelekka mammal᷊iwutta leta'u Kus.

¹⁴Sal᷊ukka atallune aranne Tigris wuṛṛu mangngelekka su samba'an da'i leta'u Asyur. Sal᷊ukka aiappanne aranne Efrat.

¹⁵Wua'udde Ruata napatana'u taumata udde su waillu Eden iapamanara wuṛṛu iapapaddul᷊i wailla udde.

¹⁶Ruata nabbisara taumata udde, “I'o wotongnge umanna manga wuan aaluanna sulal᷊ummu wailla indi,

¹⁷tumba'u wuassu wuan kalu apan mangonggollu asingkatta su ola'u apapia wuṛṛu al᷊al᷊eo. Imbaṛṛangnga i'o umanna wuane, amungkangngu i'o umana; i'o sarun mate su allo udde lai.”

¹⁸Ana see Ruata nabbisara, “Dal᷊eo taumata mabbiakka sassane. I ya'u sarun ma'ola'a hawene apan botongnge massumbala si tou.”

¹⁹Ne i Tou nanganute leta'a sangkangkumma wuṛṛu na'ola'e al᷊awo'u lihiddu winatangngu ammaranne wuṛṛu winatangngu winalanganna. Sarangkanambone niapiddu Ruata ringannu taumata udde niapaasilo su taumata udde, tadea'u i tou mangonggollu aranne su manga winatangnga udde. Eteudde al᷊amonan binatangngu ammaranne wuṛṛu winalanganna naasomba aranne sambau-sambau.

²⁰Etearoddi taumata nangonggollu aranna su anambon binatangngu ammaranne wuṛṛu winalanganna. Arawe tawe saran sambau wuassu wallatti mangitou apan botongnge maola'a hawe apan maatul᷊ungnge.

²¹Ana see Ruata napaatiillu taumata udde mal᷊angnga-l᷊angnga, wuṛṛu tantal᷊anna i tou mattiilla, Ruata napaasabangngu sambua rusu'a wuassu wadangngu taumata udde, ana see lannangnge sinoopannu ṛemessa.

²²Wuassu rusu'a udde Ruata na'ola'a sangkatou wawine, ana see niapidda ringannu taumata udde.

²³Ne taumata udde nabbisarate, “Ete indi i tou, taumata apan uasul᷊ungku duṛṛi wuassu duṛṛi'u, wuṛṛu ṛemessa wuassu ṛeme'u. I tou ta'u isaggo wawine, ana waugu i tou nianu wuassu esakka.”

²⁴Ana waugu udde taumata esakka manantangngu iamangnge wuṛṛu inangnge, wuṛṛu maaukke ringannu awingnge, ana see itarua nabbal᷊ite sambau.

²⁵Esakka wuṛṛu wawine udde tantol᷊e, arawe itarua tawe apendamma massili.