Read Talaud PANDARIADDI 20 Bible Online

PANDARIADDI 20 - Talaud bible

PANDARIADDI 20

¹I Abraham nangingkatta wuassu Mamre watukku wageangngu timukku leta'u Kanaan, wuṛṛu namanuate su wallatu Kades wuṛṛu Syur. Manga pira tempo wua'udde, su tempo i tou uatana'a su Gerar,

²i tou nabbisara manungku i Sara awingnge udde tuarine. Ana waugu udde i Ratu Abimelekh wuassu Gerar nandolokku daroloṛṛanne mangapiddi Sara ringanni tou.

³Su sambau ṛabbi Ruata naipasilon batangan-Ne su ratu udde sulal᷊ummu wal᷊iawa, wuṛṛu nabbisara, “I'o sarun mate, ana waugu i'o buatte nanganu wawine udde; ana waugu i tou piate awingnge.”

⁴Arawe i Abimelekh taambe napamita si Sara, ne unnu ratu udde, “Mawu, i ya'u tawe nassal᷊a! Apa Mawu sarun mamate si ya'u wuṛṛu walahangku?

⁵I Abraham sassane nabbal᷊o manungku wawine udde tuarine, wuṛṛu wawine udde nabbisara aroddi lai. I ya'u buatte na'ola'a udde ringannu naungnga waresi, nariaddi ya'u tawe nassal᷊a.”

⁶Ruata sinumimbakka sulal᷊ummu wal᷊iawa, “Atonna, i Ya'u masingkatta manungku i'o na ola'a udde ringannu naungnga waresi. Ana waugu udde i Ya'u naningaddu ma'ola'a rosa su saruang-Ku, wuṛṛu i Ya'u tawe mamalanu mamita wawine udde.

⁷Arawe orassa indi, paawelenga'e i tou ringannu awingnge. Awingnge sangkatou nabi, wuṛṛu i tou sarun umal᷊iomannu, tadea'u i'o tawe mate. Arawe amungkangngu i'o tawe mapaawelengngi tou, naunge, i'o wuṛṛu anambon tumana'u soanu sarun mate!”

⁸Tiṛṛabbine, maruaallo, i Abimelekh namago anambon mamanaran araratuanne wuṛṛu namasingkatta si mangitou al᷊awo'a apan buatte nariaddi udde. I mangitou mangke nata'utta.

⁹Wua'udde i Abimelekh namago si Abraham wuṛṛu naiwal᷊o, “Apa apan buatte niolangngu su saruanni yami? Apa sal᷊a'u su saruannu, na'oman sara i'o nandantan asasilaka si ya'u wuṛṛu su araratuangku? Tawe suṛṛinone inolaannu aroddi su saruangku.

¹⁰Anio inolaannu aroddi?”

¹¹I Abraham sinumimbakka, “I ya'u naṛṛingidda, isindi tawe taumata matta'uttu MAWU Ruata, na'oman sara i ya'u pateannu taumata apan maapulun awingku.

¹²Atonna lai i tou tuari'u. Iambua yamangnga sangkatou, arawe uapapaṛṛala inangnga, wuṛṛu wua'udde iambua naawingnga.

¹³Ne napawe Ruata nandolo'u manantangngu wal᷊en yamangku wuṛṛu mammal᷊intaddu manga wanua awagananna, i ya'u nabbisara awingku, ‘Paasiloa'e apapia naungngu si ya'u ringannu mamasingkatta al᷊awo'u taumata manungku i ya'u indi iaangngu.’ ”

¹⁴Wua'udde i Abimelekh napaawelengngi Sara si Abraham, wuṛṛu su tempo udde lai i tou nangonggollu manga allangnga, domba wuṛṛu sapi.

¹⁵Unnu ratu si Abraham, “Indite ahewallu wanua'u; pamanuate su tampa ipaapulunu.”

¹⁶Ana see unni tou si Sara, “Iaangngu buatte ta'u nionggl᷊annu saṛṛiwu roitta sal᷊a'a maola'a tatialane su anambon taumata manungku atonna-tonna i'o tawe sal᷊ane.”

¹⁷MAWU buatte napatinnan anambon bawine su wal᷊en araratuanni Abimelekh ana waugu arariadianna si Sara, awingngi Abraham udde. Ana see i Abraham niumal᷊iomanna su Ruata, wuṛṛu Ruata napaapian Abimelekh, awingnge wuṛṛu manga allangnge wawine, na'oman sara manga wawine udde wotongnge mapangunsiwe apia.