Read Talaud PANDARIADDI 22 Bible Online

PANDARIADDI 22 - Talaud bible

PANDARIADDI 22

¹Manga pira tempo wua'udde Ruata na'annamma tatuṛṛutti Abraham. Ruata namaggo, “I Abraham!” Ana see i Abraham sinumimbakka, “I ya'u, Mawu.”

²Unnu Ruata, “Roote watukku leta'u Moria su sambau ringanni Ishak, anangngu tinggassa udde, apan lembon arangnguannu. Isudde, su sambau wowone apan Ta'u ita'e si'o, onggol᷊a'e si ya'u anangu maola'a sambau sasamba itattambunna.”

³Tiṛṛabine marua allo maṛṛanggapa, i Abraham nama'ate alun sasamba itattambunna wuṛṛu nalli'ussa alu udde su liuddu keledai. I tou inaite ringanni Ishak wuṛṛu ruan katou allangnge watukku tampa apan niapasingkattu Ruata si tou.

⁴Su allo atallune i Abraham naasilote tampa udde wuassu marau.

⁵Ana see i tou nabbisara allangnge ruan katou udde, “Iradua atana'e isindi ringannu keledai indi. I ya'u wuṛṛu ana'u inai poiaroddi massubba MAWU, paṛṛadote iambua mabelengnga ringanni radua.”

⁶I Abraham nangandangngu alu olaanna sasamba uddesu wambangngi Ishak, wuṛṛu lai i tou uaapiddu lari'a wuṛṛu waṛṛan putungnga ipandiitta alu. Napawe itarua u'amatta su sambau,

⁷i Ishak nabbisara, “Papa!” I Abraham sinumimbakka, “Pia apa ana'u?” I Ishak naiwal᷊o, “I ite uaapidden putungnga wuṛṛu alu, arawe suapa ana'u domba olaanna sasamba itattambunna udde?”

⁸I Abraham sinumimbakka, “Ruata sassane sarun manaddia ana'u domba udde.” Ana see itarua nanassukku amatanna.

⁹Napawe itarua na'omate su tampa apan niwal᷊on Duata si Abraham, i tou napararisikku sambau mezbah wuṛṛu nangatokku alu udde su wowone. Ana see i tou nakkapussa ana'a wuṛṛu niapal᷊allowanga su mezbah, su wowon alu udde.

¹⁰Wua'udde, i tou nanganu lari'a ipamate anangnge.

¹¹Arawe mala'ekattu MAWU niumui si tou wuassu langitta, “Abraham, Abraham!” Sasimbakki Abraham, “I ya'u, Mawu!”

¹²“Imbaṛṛangnga mamate ana'a udde ara'e olaannu ereapa i tou,” unnu MAWU sulal᷊ummu mala'ekata udde. “Orassa indi i Ya'u masingkatta manungku i'o maadatta wuṛṛu matuṛṛutta si Ya'u, ana waugu i'o tawe nanol᷊a'a manantillu anangngu tinggassa udde si Ya'u.”

¹³Ana see i Abraham na'ellega uapal᷊iwutta si tou wuṛṛu naasilo sambau domba esakka apan tatandunge naaitta su aputta. I Abraham nanganu domba udde ana see niola'a sasamba su MAWU pinanal᷊i anangnge.

¹⁴Tampa udde nissagon Abraham “MAWU manaddia apa hagausanna.” Wuṛṛu naddatingngu orassa indi lai taumata mabbisara, “Roso su wowo-Ne MAWU nanaddia apan hagausanna”.

¹⁵Paassa lai wuassu langitta mala'ekattu MAWU niumui si Abraham,

¹⁶“MAWU nabbisara: i Ya'u massalu ringannu arang-Ku sassane, ana waugu i'o buatte na'ola'a inolaanna indi wuṛṛu tawe nanol᷊a'a manantillu anangngu tinggassa udde si Ya'u,

¹⁷i Ya'u sarun mangal᷊amatta si'o ringannu lumambalanna wuṛṛu ma'ola'a papapulunnu anambone naal᷊ihidda anumputanna su langitta wuṛṛu anambone naal᷊ihidda anne su apannu tahal᷊oangnga. Anangngu pulunnu sarun malluṛṛugu manga seetti mangitou.

¹⁸Anambon balahanna su runia sarun sumal᷊ande si Ya'u tadea'u i Ya'u mangal᷊amatta si mangitou su ereapa i Ya'u nangal᷊amatta papapulunnu — ana waugu i'o buatte tinumuṛṛutta parenta-U.”

¹⁹Wua'udde i Abraham nabelengke ringannu allangnge darua, ana see i mangitou suadio'a inaite watukku Bersyeba, wuṛṛu i Abraham namanuate poiaroddi.

²⁰I Abraham pia iaangnga aranne i Nahor. Napawe nal᷊iudde arariadianna su Wowon Moria udde, i Abraham naaringikka manungku i Milka, awingngi Nahor piate siri ual᷊u ana'a esakka eteudde:

²¹i Us, iapa pahul᷊une, i Bus, tuarine; i Kemuel, apan sal᷊immurine nariaddi yamangngi Aram;

²²i Kesed, i Hazo, i Pildas, i Yidlaf, wuṛṛu i Betuel,

²³apan sal᷊immurine nariaddi iamangngi Ribka.

²⁴I Nahor pia awingnge aruane aranne i Reuma wuṛṛu awingnge udde nanungkangngi Tebah, i Gaham, i Tahas wuṛṛu i Maakha.