Read Talaud PANDARIADDI 24 Bible Online

PANDARIADDI 24 - Talaud bible

PANDARIADDI 24

¹I Abraham timmadete atonna, wuṛṛu i tou nial᷊amatannu MAWU sulal᷊ummu al᷊awo'u manara.

²Su allo sambau i Abraham nabbisarate allangnge atimmaranne, apan ual᷊u'adda alawo'u darotongnge, “Addoa'e limanu su wallatu palangku.

³Passalute ringannu arannu MAWU, Ruata apan uataṛṛino langitta wuṛṛu runia, manungku i'o tawe madea'a awingngi Ishak ana'u wuassu wallatu manga taumatan Kanaan indi.

⁴I'o ṛinone mabelengnga watukku wanua niasungkangangku madea'a awingngi tou wuassu wallatu manga tuṛṛangku.”

⁵Ana see allangnga udde naiwal᷊ote si tou, “Ereapa amungkangngu maṛṛuala udde maddiri manantangngu wal᷊ene wuṛṛu madiri tumantalongnga si ya'u watukku wanua indi? Ṛinone i ya'u mangapiddu ana'i Tuangnga watukku wanua niasungkanganni Tuangnga?”

⁶Arawe i Abraham sinumimbakka, “Naunge! Imbaṛṛangnga i'o mangapiddu ana'u poiaroddi!

⁷MAWU, Ruata apan uataṛṛino langitta, buatte nangapi'u wuassu wal᷊en iamangku wuṛṛu wuassu wanua manga tuṛṛangku, wuṛṛu i Tou buatte nassalu si ya'u manungku i Tou sarun mangonggolu wanua indi su papapulungku. I Tou lai sarun mandolokku mala'ekan-Ne mantul᷊ungngu, tadea'u i'o wotongnge maasomba sangkatou awingngu ana'u wua poiaroddi.

⁸Arawe amungkangngu maṛṛuala udde madiri tumantalongnga si'o, ne i'o mal᷊iu wuassu sasalu indi. Salaiwe ereapa imbaṛṛangnga i'o mangapiddu ana'u poiaroddi.”

⁹Ana see allangnga udde nangaddoten limane su wallatu palangngi Abraham mawune, wuṛṛu nassalu sarun mangutungngu darorongngi Abraham udde.

¹⁰Allangnga udde nanganute mapul᷊on bau onta ana see al᷊awo'u saranapa maarega pusa'a mawune wuṛṛu inaite watukku soa tampa atatanaanni Nahor su tempo nipabbiaṛṛanne; addone su samba'an sawannakku Mesopotamia.

¹¹Napawe i tou na'omate poiaroddi, niapatalle manga unta udde tadea'u mangillol᷊o maranin sambau paṛṛihi su liuddu soa. Allo wawalote, wuṛṛu eteudde tempone manga wawine mania ua'e.

¹²Ana see allangnga udde niumal᷊iomanna, “MAWU, Ruata mawu'u Abraham, tul᷊ungaawe, tadea'u i ya'u maaola'a manara'u su allo indi; akkanaawe mawu'u Abraham.

¹³Pa'ellege, i ya'u uarisikka maranin paṛṛihi indi. Tate mal᷊annu lai manga maṛṛuala wuassu soa sarun dumanta mania ua'e.

¹⁴I ya'u sarun mabbisara sangkatou suwallati mangitou, ‘Tul᷊unga'a lintuṛṛa'a wowongngu wuṛṛu i ya'u painuma'a.’ Amungkangngu i tou sumimbakka, ‘Pa'inumpe, wuṛṛu manga untan Papa sarun ta'u iapa'inumma lai!’ ete i tou apan nipile MAWU hunan Ishak allang-Ngu. Amungkangngu olangnge udde matipussa, i ya'u sarun maasingkatta manungku MAWU pia naungnga mapia su mawu'u Abraham.”

¹⁵Su tempo i tou tantal᷊anna u'al᷊iomanna, i Ribka, sangkatou maṛṛuala apan aṛṛamahanne wuṛṛu taambe naawingnga, naranta su paṛṛihi uapassanna wowongnga su wambangnge. I tou ana'i Betuel, wuṛṛu hagurangngi Betuel eteudde i Nahor wuṛṛu i Milka; i Nahor udde iaangngi Abraham. I Ribka mattudan paṛṛihi udde wuṛṛu nalloṛṛo wowongnge, ana see napul᷊e.

¹⁶

¹⁷Allangngi Abraham tinumal᷊angnga nangundanin tou wuṛṛu nabbisara, “Tul᷊unga'a, ana'a, painuma'a i ya'u wuassu wowongngu udde.”

¹⁸Maṛṛuala udde sinumimbakka, “Pa'inumpe Papa,” ana see ringannu nasasaṛṛawutta nanossokku wowongnge wuassu wambangnge, wuṛṛu lapiddu uaagassa wowongnga udde i tou napa'inummu allangnga udde.

¹⁹Napawe allangnga udde buatte na'inumma; maṛṛuala udde nabbisara, “I ya'u sarun inai mania ua'e, iapa'inumma su manga untan Papa lai, tadea'u anambon binatangnga udde ma'inumma sara mal᷊aidda.”

²⁰Wua'udde ringannu nasasaṛṛawutta ua'e sulal᷊ummu wowongnga nilal᷊inna su paainumannu unta, ana see i tou tinumal᷊angke apia watukku paṛṛihi mania ua'e lembon manambo lai tadea'u anambon binatangnga udde mawusa ma'inumma.

²¹Tantal᷊anna udde allangngi Abraham sidutu mannutukka si tou ringannu tawe bisarane saran sampadi. I tou maapulu maasingkatta atanne MAWU ma'ola'a manarane pia gessine ara'e tawe.

²²Napawe anambon unta udde nawusate na'inumma, allangngi Abraham nanganute saranapa wul᷊awanna apan maarega ana see niele su ngirunnu maṛṛuala udde. Su pul᷊al᷊anne niluṛṛeannu hal᷊angnga sampare.

²³Ana see allangnga udde nabbisara, “Wal᷊oa'a isai iamangngu. Piawe tampa panaṛṛabiangku wuṛṛu manga taumata'u su wal᷊ene?”

²⁴“Iamangku i Betuel, ana'i Nahor wuṛṛu i Milka,” sasimbakku maṛṛuala udde.

²⁵“Su wal᷊en kami pia tampa panaṛṛabianni Papa wuṛṛu manambo laṛṛami annu winatangnga.”

²⁶Ne allangnga udde niumal᷊intudate nassubba MAWU.

²⁷Wisarane, “Paddalote MAWU, Ruata mawu'u Abraham. MAWU sidutu matul᷊idda wuṛṛu mapia su mawu'u Abraham. I tou nangehetta si ya'u watukku manga tuṛṛangnge.”

²⁸Wua'udde maṛṛuala udde tinumal᷊angnga watukku wal᷊en wuṛṛu nabbatti'u al᷊awo'a apan buatte nariaddi.

²⁹I Ribka pia sangkatou iaangnga aranne i Laban. I tou naaringikka watti'u tuarine su ola'u apa apan niapasingkatu allangnga udde. I tou naasilo lai lal᷊ogakka su ngirunna wuṛṛu hal᷊angnga su pul᷊al᷊annu tuarine udde. Ne i Laban tinumal᷊angke watukku liuddu wal᷊en maisasomban allangngi Abraham udde apan ta'e uarisikka ringannu manga untane maranin paṛṛihi.

³⁰

³¹Ana see unni Laban, “Papa taumata apan nial᷊amatannu MAWU! Arie paatana'a su liudde isindi. Wette sutta'e su wal᷊en kami. I yami buatte nanahangginna wabbo'a atatiil᷊anni Papa wuṛṛu tampa manga untan Papa.”

³²Ana see allangnga udde tinumantalongke wuṛṛu sinumuttate sulal᷊ummu wal᷊en. I Laban nanossokku lurannu manga unta, wuṛṛu nangonggollu laṛṛami niapaanna su manga winatangnga udde. Wua'udde i tou nangapiddu ua'e aukkassa leddan allangngi Abraham wuṛṛu manga taumatane.

³³Napawe uasaruante anna, allangnga udde nabbisara, “I ya'u tawe umanna amungkangngu taambe napabbal᷊on tanata apan uaapidda si ya'u.” I Laban nabbisara, “Wette wal᷊oa'e.”

³⁴Ana see allangngi Abraham nanattake mabbatti'a, wisarane, “I ya'u indi allangngi Abraham.

³⁵MAWU lembon nangal᷊amatta mawu'u udde wuṛṛu na'ola'a si tou ala manasai. MAWU buatte nangonggollu manambo domba, ambinga, sapi, unta, keledai, wuṛṛu lai sal᷊a'a, wul᷊awanna, see allangnga esakka wuṛṛu wawine.

³⁶Su uukka apan timmadete, i Sara awingngu mawu'u udde buatte nanungkangngu sangkatou ana'a esakka, wuṛṛu mawu'u buatte nanantillu al᷊awo'u darotongnge su anangnge udde.

³⁷I tou nandolo'u maddiandi ringannu sasalu tadea'u tumuṛṛutta parentane. Wisarane, ‘Imbaṛṛangnga i'o mamile awingngu ana'u wuassu wallatu manga maṛṛuala su leta'u Kanaan indi,

³⁸ewe'e wuassu wallatu manga tuṛṛangnga ṛuanganni yamangku. Nariaddi inaite paal᷊ihakka poiaroddi.’

³⁹Ana see i ya'u naiwal᷊o si tou, ‘Ereapa amungkangngu maṛṛuala udde madiri tumantalongnga si ya'u?’

⁴⁰Ana see i tou sinumimbakka, ‘MAWU apan sidutu tattuṛṛutangku, sarun mandolokku mala'ekan-Ne iapatul᷊ungnga tadea'u manaranu pia gessine. I'o sarun maasangkalla awingngu ana'u wuassu wallatu ṛuangangku sassane, eteudde wuassu ana'u tuṛṛangngu iamangku.

⁴¹Tumba'u amungkangngu i mangitou napaawelengngu, ne wakkute udde i'o mal᷊iu wuassu sasalunu.’

⁴²Wuṛṛu napawe tanginna i ya'u na'omate su paṛṛihi, i ya'u niumal᷊iomanna sulal᷊ummu naungnga, ‘Ruata mawu'u Abraham, ṛinone ma'ola'a manara'u pia gessine.

⁴³I ya'u sidutu uarisikka maranin paṛṛihi udde. Napawe pia sangkatou maṛṛuala rumanta mania ua'e, i ya'u sarun madorongnga si tou ua'e inumanna.

⁴⁴Amungkangngu i tou maapulu, wuṛṛu mangonggolla lai mapa'inummu manga unta'u, ne ete i tou apan nipile MAWU maola'a awingngu ana'u mawu'u udde.’

⁴⁵Taambe lai i ya'u nanguddussu aal᷊iomanna udde sulal᷊ummu naungnga, i Ribka nirumantate uaapiddu wowongnga papasannananna ana see nania ua'e wuassu paṛṛihi. Wua'udde i ya'u nabbisara si tou, ‘Tul᷊unga'a painuma'a i ya'u.’

⁴⁶Ringannu nasasaṛṛawutta i tou nanossokku wowongnga udde wuassu wambangnge wuṛṛu nabbisara, ‘Pa'inumpe, wuṛṛu manga untan Papa lai ta'u iapa'inumma.’ Ana see i ya'u na'inumpe wuṛṛu manga unta'u lai niapa'inumma.

⁴⁷Wua'udde i ya'u naiwal᷊o, ‘Isai iamangngu?’ Wuṛṛu i tou sinumimbakka, ‘Iamangku i Betuel, ana'i Nahor wuṛṛu i Milka.’ Ana see i ya'u nalluṛṛeten lal᷊ogakka wul᷊awanna su ngirunne wuṛṛu sampare hal᷊angnga su pul᷊al᷊anne.

⁴⁸I ya'u niumal᷊intudda nassubba wuṛṛu naddalo MAWU, Ruatan mawu'u Abraham. I Tou buatte nangehetta si ya'u naddatingngu tampa indi, ringannu manga alahannu mawu'u, na'oman sara i ya'u naasomba maṛṛuala indi maola'a paren anangnge.

⁴⁹Orassa indi, amungkangngu i yamiu pia apendamma ma'ola'a mawu'u ringannu mapia wuṛṛu manuungngu darorongnge si yamiu sulal᷊ummu pasasangkatuṛṛanganna, antimanna mamasingkatta si ya'u, arawe amungkangngu tawe, wal᷊oa'e lai, tadea'u i ya'u masingkatta apa sarun olaangku.”

⁵⁰I Laban wuṛṛu i Betuel sinumimbakka, “Ana waugu sarangkanambone apan buatte nariaddi indi darantane wuassu MAWU, i yami tawe suṛṛinone makkawessa.

⁵¹Indite i Ribka; wala'e i tou tumantalongnga si Papa wuṛṛu mabbal᷊i awingngu ana'u mawun Papa, ere buatte niapaasingkattu MAWU sassane.”

⁵²Napawe allangngi Abraham naaringikka wisara mangitou, i tou niumal᷊intudda nassubba MAWU.

⁵³Ana see i tou napasabangngu manga laubba, lal᷊oggaka sal᷊a'a wuṛṛu wul᷊awanna, wuṛṛu sarangkanambone udde nionggolla si Ribka. See lai iaangnge wuṛṛu inangngene nionggol᷊anni tou aonggolla apan maarega.

⁵⁴Wua'udde allangngi Abraham wuṛṛu manga taumatane niumante wuṛṛu na'inumma, ana see nanaṛṛabite isudde. Napawe i mangitou napu'ote tiṛṛabine, allangnga udde nabbisara, “Walaawe i ya'u mapul᷊e ringannu mawu'u.”

⁵⁵Arawe iaangnge wuṛṛu inangngi Ribka nabbisara, “Walaawe i Ribka matana'a ringanni yami al᷊annune iraṛṛangngo sangkamisa ara'e mapul᷊o allo lai, wua'udde i tou wotongnge inai.”

⁵⁶Arawe allangnga udde nabbisara, “Ariewe mama'ungnga si ya'u. MAWU na'ola'a amatangku pia gessine; walaawe i ya'u mapul᷊e ringannu mawu'u.”

⁵⁷I mangitou sinumimbakka, “Weete i ite mamago si Ribka wuṛṛu maiwal᷊o tanne adapanne ereapa.”

⁵⁸Ana see i mangitou namago si Ribka wuṛṛu naiwal᷊o, “I'o mappulute tumantalongnga taumata indi?” Maṛṛuala udde sinumimbakka, “Ore, i ya'u mappulu.”

⁵⁹Ne i mangitou namalaten Ribka wuṛṛu mallal᷊u'adde inai ringannu allangngi Abraham wuṛṛu manga taumatane. Ana see i mangitou nangal᷊amatta si Ribka ringannu manga wisara indi, “Antimanna i'o, Ribka mabbal᷊i inangngu taumata nambo! Antimanna papapulunnu mapasuṛṛubawa manga soan seenne!”

⁶⁰

⁶¹Wua'udde i Ribka nandiahite suadio'a ringannu manga wawine saṛṛen tumuwo apan naola'a allangnge, ana see sinuma'ete unta wuṛṛu inaite tinumantalongnga allangngi Abraham udde.

⁶²Tantal᷊anna udde i Ishak nirumantate wuassu wadda'a lol᷊okka, sinumabbi paṛṛihi apan isassago “I Tou Apan Sidutu Uaintanno si Ya'u” wuṛṛu natana'e su samba'an timukku Kanaan.

⁶³Su sambau wawallo i tou sinumabbangnga wuassu rasanne inai u'a'amatta su wawail᷊anne, ana see i tou naasilo manga unta inawarea.

⁶⁴Napawe i Ribka naasilo si Ishak, i tou sinumossokka wuassu untane,

⁶⁵wuṛṛu naiwal᷊o allangngi Abraham udde, “Isai esakka su wailla udde apan u'amatta mattudan kite?” “I tou mawu'u,” sasimbakku allangnga udde. Ana see i Ribka nanganu nasane wuṛṛu pinallindumma hatine.

⁶⁶Wua'udde allangnga udde nabbatti'a si Ishak al᷊awo'a apan buatte nimanarane.

⁶⁷Wua'udde i Ishak nangapiddi Ribka sinumutta sulal᷊ummu rasanni Sara inangnge, wuṛṛu i tou natambaten Ribka. I Ishak marangngu si Ribka; ne nal᷊uasse naungngi Ishak apan massusa ana waugu niapateannu inangnge.