Read Talaud PANDARIADDI 26 Bible Online

PANDARIADDI 26 - Talaud bible

PANDARIADDI 26

¹Su wanua udde nirumantate lai ṛutumma ere lai buatte nariaddi su tempon Abraham. I Ishak sinumaruanna si Abimelekh, ratun taumatan Filistin, su Gerar wuṛṛu madorongnga matana'a poiaroddi.

²Olangnge udde niolangnge ana waugu MAWU buatte namasilon batanganne si tou wuṛṛu nabbisara, “Imbaṛṛangnga inai watukku Mesir; atana'e su wanua indi, ere buatte Ta'u nirolokka si'o.

³I Ya'u sarun mallu'adda wuṛṛu mangal᷊amatta si'o. Ahewallu wageangngu leta'a indi sarun Ta'u ionggolla si'o wuṛṛu su papapulunnu. I Ya'u sarun manipussu paaire apan buatte Ta'u nionggolla si Abraham iamangngu.

⁴I Ya'u sarun mangonggola si'o ana'a papapulunna anambone ere anumpitanna su langitta, wuṛṛu ahewallu leta'a indi sarun Ta'u ionggola si mangitou. Anambon balahanna su runia sarun sumal᷊ande si Ya'u tadea'u i Ya'u mangal᷊amatta si mangitou ereapa i Ya'u buatte nangal᷊amatta papapulunnu.

⁵I Ya'u sarun mangal᷊amatta si yamiu, ana waugu i Abraham buatte naddaringikka si Ya'u wuṛṛu uapadul᷊i al᷊awo'u tita wuṛṛu parenta-U.”

⁶Nariaddi Ishak natana'e su Gerar.

⁷Su tempo manga taumata isudde naiwal᷊o su ola'i Ribka, i Ishak sinumimbakka manungku i tou tuarine, wuṛṛu wal᷊ine awingnge. I Ishak matta'uttu manga taumata udde sarun mamate si tou tadea'u maasomba si Ribka apan maṛṛamaga udde.

⁸Napawe i Ishak uatana'e manga pira tempo al᷊annune poiaroddi, su allo sambau i Ratu Abimelekh nallinge wuassu jandelane, wuṛṛu i tou naasilo i Ishak tantal᷊anna uasasaṛṛiologi Ribka.

⁹Ne i tou namago si Ishak wuṛṛu nabbisara, “Wal᷊inewe wawine udde awingngu? Anio i'o nabbal᷊o manungku i tou tuarinu?” I Ishak sinumimbakka, “I ya'u naṛṛingidda, i ya'u sarun pateanna amungkangu mabbal᷊o manungku i tou awingku.”

¹⁰“Apa apan buatte niolangngu si yami?” unni Abimelekh. “Sangkatou wuassu wallatu tumana'u soa'u wotongnge matiilla ringannu awingngu, wuṛṛu amungkangngu olangnge udde mariaddi, ete i'o pandansilanannu pasasal᷊an kami udde.”

¹¹Wua'udde i Abimelekh napaanaungnga anambon tumanangnge arendi, “Isai-sai apan manal᷊awa'u taumata indi ringannu awingnge, sarun iṛṛuumanna pateanna.”

¹²I Ishak nangasi'u wualanna wuṛṛu nabbaille su wanua udde, wuṛṛu tonna udde i tou naasomba hessine maṛṛasutta anambone wuassu wualanna apan niasingnge, ana waugu MAWU nangal᷊amata si tou.

¹³Pa'aalane a'atambanna wuṛṛu i tou naola'e marasak.

¹⁴Taumatan Filistin naungnge lal᷊eo si tou ana waugu i tou uatahuanna manambo allangnga, ammul᷊annu domba wuṛṛu sapi.

¹⁵Ana see nisoopante mangitou paṛṛihi apan buatte nial᷊i manga allangngi Abraham su tempo i tou ta'e wiakka.

¹⁶Wua'udde i Abimelekh nabbisara si Ishak, “Passal᷊iute wuassu wanuang kami. I'o nangillembote uataṛṛino wuassu i yami.”

¹⁷Nariaddi Ishak nanantangken wanua udde wuṛṛu naddasante su Wawal᷊annu Gerar. Isudde i tou natana'a manga pira tempo al᷊annune.

¹⁸I tou na'al᷊i apia manga paṛṛihi apan buatte nial᷊i su tempon Abraham wuṛṛu buatte nisoopannu taumatan Filistin su pananantangngi Abraham. Manga paṛṛihi udde nissagon aranne uasul᷊ungnga ere nissagon iamangnge.

¹⁹Manga allangngi Ishak na'al᷊i paṛṛihi su Wawal᷊annu Gerar udde wuṛṛu naasangkalla ua'e manambo-nambo.

²⁰Arawe manga mallal᷊u'adda winatangnga su Gerar nattatiakka ringannu manga mallal᷊u'adda winatangngi Ishak. Unni mangitou, “Ua'e indi ua'eng kami.” Ana waugu udde paṛṛihi udde nissagon Ishak “Patatiakka”.

²¹Manga allangngi Ishak na'al᷊i paṛṛihi waine apia, ne nariadite lai patatiakka su ola'u paṛṛihi udde lai. Ana waugu udde paṛṛihi udde nissagon Ishak “Pasaseetta”.

²²Wua'udde i tou nangingkatta wua isudde wuṛṛu na'al᷊i paṛṛihi atallune. Paassa indi tawe naola'a patatiakka. Ana waugu udde paṛṛihi udde nissagon Ishak “Apapallossa”. Wisarane, “Orassa indi MAWU buatte nangonggolla si ite loakke matana'a su wanua indi, wuṛṛu i ite sarun maala isindi”.

²³Wua'udde i Ishak niumamatte wuṛṛu na'omate su Bersyeba.

²⁴Su ṛabbi udde MAWU naipasilon batangan-Ne si tou wuṛṛu nabbisara, “Ete i Ya'u MAWU Ruatan iamangngu Abraham. Arie pa'ata'utta; i Ya'u sarun mallu'adda si'o. I Ya'u sarun mangal᷊amatta si'o wuṛṛu mangonggollu papapulunna apan manambo si'o ana waugu pa'aire-U si Abraham allang-Ku.”

²⁵Ana see i Ishak napararisikku sambau mezbah wuṛṛu nassubba MAWU su tampa udde. I tou naddasante isudde wuṛṛu manga allangnge naal᷊i paṛṛihi waine lai.

²⁶Su allo sambau nirumantate i Abimelekh wuassu Gerar, suadio'a ringanni Ahuzat, mananantirone, wuṛṛu i Pikhol, tembonannu tantarane, inai maisasomban Ishak.

²⁷Ne i Ishak naiwal᷊ote, “Anio i yamiu rumanta maisasomba'u orassa indi, sumbal᷊i dorone i yamiu nasseetta wuṛṛu nallimbuakka si ya'u wuassu wanuan kamiu?”

²⁸Ana see i mangitou sinumimbakka, “Orassa indi yami masingkatte manungku MAWU ual᷊u'adda si'o wuṛṛu tumuṛṛuttu addapati yami, mappianne i ite ma'ola'a pa'aire. Passalute

²⁹manungku i'o tawe ma'ola'a al᷊al᷊eo si yami, su ereapa i yami lai tawe ma'ola'a al᷊al᷊eo su saruannu. I yami mapate si'o wuṛṛu namalanu inai ringannu paddarame. Nasemakke si yami manungku MAWU nangal᷊amatta si'o.”

³⁰Wua'udde i Ishak nanaru si mangitou, wuṛṛu i mangitou niumante wuṛṛu na'inumma.

³¹Tiṛṛabine marua allo maṛṛanggapa, sangkatou-sangkatou masi pa'irete apan nitohassu sasalu. Ana see i Ishak nabbisaraten sal᷊amatte umamatta si mangitou wuṛṛu nattal᷊eite i mangitou sanggaweanna.

³²Su allo udde lai manga allangngi Ishak nirumanta wuṛṛu nangalae si tou su ola'u paṛṛihi apan buatte nial᷊i mangitou. Unni mangitou, “I yami naasangkalle ua'e.”

³³Ana see paṛṛihi udde nissagon Ishak “Sasalu”. Uddewe al᷊amonane soa udde na'oman sara nissago Bersyeba.

³⁴Napawe i Esau uukke appaten pul᷊o su tonnane, i tou na'awingngu ruan katou maṛṛuala wuassu walahanni Het, eteudde i Yudit ana'i Beeri, wuṛṛu i Basmat ana'i Elon.

³⁵Wawine darua udde napaasusan biakki Ishak wuṛṛu i Ribka.