Read Talaud PANDARIADDI 28 Bible Online

PANDARIADDI 28 - Talaud bible

PANDARIADDI 28

¹Wua'udde i Ishak namago si Yakub, ana see nangal᷊amatta si tou apiddu nabbisara, “Imbaṛṛangnga i'o maawingngu maṛṛualan Kanaan.

²Roote watukku Mesopotamia, ringannu amonanni Betuel, iupungngu, wuṛṛu paawingken sangkatou su wallatu ana'u tuṛṛangku Laban.

³Antimanna Ruata Lembon Taṛṛino mangal᷊amatta pa'a'awingngu wuṛṛu mangonggolla si'o ana'a papapulunna apan manambo, ma'oman sara i'o maola'a al᷊amonan balahanna manambo!

⁴Antimanna MAWU mangal᷊amatta si'o wuṛṛu papapulunnu, ere lai Tou buatte nangal᷊amatta si Abraham, wuṛṛu antimanna i'o manahuanna leta'a apan wawanuannu indi, apan buatte nionggolu Ruata si Abraham!”

⁵Etearoddi i Ishak namallossi Yakub inai watukku Mesopotamia, ringanni Laban, ana'i Betuel taumatan Aram udde. I Laban eteudde iaangngi Ribka inangngi Yakub wuṛṛu i Esau.

⁶I Esau naaringikka manungku i Ishak buatte nangal᷊amatta si Yakub wuṛṛu namallossi tou watukku Mesopotamia madea'a awingnga isudde. Wuṛṛu lai su tempo i Ishak nangal᷊amatta si Yakub, i tou naningaddi Yakub maawingngu maṛṛualan Kanaan.

⁷Wua'udde lai Esau masingkatta manungku i Yakub mararingikka wisaran hagurangnge wuṛṛu nabatukken Mesopotamia.

⁸Ne i Esau naasunnate manungku i Ishak, iamangnge maddirin wawinen Kanaan,

⁹ana waugu udde i Esau inaite ringanni Ismael, ana'i Abraham, wuṛṛu na'awingngu ana'i Ismael aranne i Mahalat, tuari Nebayot.

¹⁰I Yakub nanantangngu Bersyeba wuṛṛu inaite watukku Haran.

¹¹Napawe matannallo umattuppe i tou na'omate su sambau tampa, ana see i tou nanaṛṛabite isudde. I tou nilumallowangke matiilla; puane uaillul᷊unna su sambau watu.

¹²Wua'udde i tou nabbal᷊iawate manungku i tou naasilo sambau tuadda uasaṛṛadda su runia wuṛṛu pentakke naddatingngu langitta wuṛṛu manga mala'ekatta uapapal᷊ele lullintukka su tuadda udde.

¹³Wuṛṛu MAWU uarisikka su sandiṛṛanne apiddu nabbisara, “Ete i Ya'u MAWU, Ruata apan raddaloanni Abraham wuṛṛu i Ishak. I Ya'u sarun mangonggolla si'o wuṛṛu su papapulunnu leta'a apan lal᷊allowangannu indi.

¹⁴Papulunnu anambone ere awu su runia. I mangitou sarun manggewalla leta'i mangitou watukku al᷊awo'u tampa, wuṛṛu wua si'o wuṛṛu papapulunnu, i Ya'u sarun mangal᷊amatta anambon balahanna su runia.

¹⁵Paanaunge, i Ya'u sarun mantul᷊ungnga wuṛṛu mallu'adda si'o, su al᷊awo'u tampa amatannu, wuṛṛu i'o sarun Ta'u iapidda mabelengnga watukku wanua indi. I Ya'u tawe manantangngu maddatingngu sarangkanambone Ta'u niola'a su alawo'u apa apan pina'ire-U si'o.”

¹⁶Ana see i Yakub natimpu'ote wuassu atatiille wuṛṛu nabbisara, “MAWU udde isindi, su tampa udde, wuṛṛu wakkute orassa indi ya'u naasingkatta!”

¹⁷I tou nata'utta ana see nabbisara, “Aṛṛaubba eteapa tampa indi! Indiwe wal᷊en Duata, ngaran pasallangannu surga.”

¹⁸Tiṛṛabine marua allo maṛṛanggappa, i Yakub nabbuatta, ana see nanganu watu apan nipaatti tou maola'a aillul᷊unanna wuṛṛu niapararisikka naola'a watu pananaunganna. I tou nallal᷊innu lanan zaitun su wowon batu udde niola'a tumba'u ionggola su Ruata.

¹⁹I tou nanagon tampa udde Betel. (Dorone aranne Lus).

²⁰Ana see i Yakub nassalute, “Amungkangngu MAWU mantul᷊ungnga wuṛṛu mallu'adda si ya'u su amatangku indi apiddu mangonggolu anna wuṛṛu laubba si ya'u

²¹maddatingngu i ya'u mawelengnga apia su wal᷊en iamangku ringannu sal᷊amatta, MAWU sarun maola'a Ruata'u.

²²Wuṛṛu i ya'u sarun mangonggolu samban wuassu mapulon kawageanganna su MAWU wuassu al᷊awo'a apan nionggolu MAWU si ya'u. Watu pananaunganna apan ta'u niapaarisikka indi sarun maola'a tampa patataṛṛamawuanna su MAWU.”