Read Talaud PANDARIADDI 32 Bible Online

PANDARIADDI 32 - Talaud bible

PANDARIADDI 32

¹I Yakub nanassukku amatanne. Ana see manga pira mala'ekatta nirumanta naisasomban tou.

²Napawe i Yakub naasilo si mangitou, i tou nabbisara, “Indi rasannu Ruata,” waugu udde tampa udde nissagon tou Mahanim.

³Wua'udde i Yakub nandolokku manga pira daroloṛṛanne umamatta malliu ṛoro waussi tou watukku wanua Edom inai maisasomban Esau, iaangnge.

⁴I Yakub nabbisara si mangitou, “Waloa'a su iaangku Esau arendi, ‘I ya'u Yakub, allangngu. Al᷊annune indi ya'u uatana'a ringanni Laban.

⁵Orassa indi ya'u uatahuante sapi, keledai, domba, ambinga wuṛṛu manga allangnga. I ya'u mapaapidu watti'a si tuangku, ringannu antimma i tuangku sarun mal᷊uassa.’ ”

⁶Su tempo manga daroloṛṛanna nabelengke apia ringanni Yakub, i mangitou nabbisara, “I yami buatte wua dinganni Esau, iaangngi Tuangnga wuṛṛu orassa indi i tou sulal᷊ummu amatanna inawarea maisasomban Tuangnga. I tou rumanta ringannu uaapiddu appatu ṛasutta su atoune.”

⁷Naaringikka udde i Yakub tumanite nata'utta wuṛṛu mappawangnga. Ana see manga taumata apan su sampunna ringanni tou nitahia nabbal᷊i ruang kawageanganna, aroddi lai domba, ambinga, sapi wuṛṛu untane.

⁸Su ṛingiranne, “Amungkangu i Esau rumanta wuṛṛu mamangalo wageangnge paarorone, ne wageangnge aruane wotongnge manal᷊amatta watanganne.”

⁹Wua'udde i Yakub niumal᷊iomanna, “Oh Ruata, apan sassubannu iupungku Abraham, wuṛṛu iamangku i Ishak, daringiṛṛewe i ya'u! MAWU buatte nandolo'u mapul᷊e mabelengnga watukku wanua'u wuṛṛu manga tuṛṛangku. Wuṛṛu MAWU naddiandi sarun mangatokku al᷊awo'u hausanna apan mapia si ya'u.

¹⁰I ya'u tawe su ṛinone manengkamma al᷊awo'u darangngu wuṛṛu apan buatte niapal᷊iatta'u MAWU si ya'u. Su tempo i ya'u niumamatta tinumumbe Sal᷊ukku Yordan, i ya'u tawe uaapiddu apa-apa tumbau ta'inna. Orassa i ya'u nirumantate apia ringannu ruang kawageanganna indi.

¹¹I ya'u sumal᷊ande ringannu atonna, liuaawe i ya'u wuassu iaangku i Esau. I ya'u matta'utta aṛṛengenne i tou rumanta mamangalo wuṛṛu mamate si yami sarangkanambone, see lai wawine wuṛṛu manga ana'a.

¹²Paanaungewe manungku MAWU buatte naddiandi sarun mangatokku al᷊awo'u apapia si ya'u wuṛṛu mangonggola si ya'u papapulunna apan manambo. Tawe saran sangkatou apan botongnge mandeengnga ana waugu anambone naal᷊ihidda anne su apanne.”

¹³Napawe nanaṛṛabbi isudde, i Yakub nanganu sambageanganna wuassu manga winatangngi tou ionggola si Esau. Aonggola udde eteudde: dua ṛasutta ambinga wawine, ruan pul᷊o ambinga esakka, dua ṛasutta domba wawine, ruan pul᷊o domba esakka, tallu pul᷊o unta apan tantal᷊anna mappasusu, suadio'a ringannu anangnge, appatu pul᷊o sapi wawine, mapul᷊o sapi esakka, ruan pul᷊o keledai wawine wuṛṛu mapul᷊o keledai esakka.

¹⁶I tou nattahia manga winatangnga udde nabbal᷊i manga pirang kawageanganna ana see sambau-sambau nitantilla su sangkatou allangnge. Wisarane si mangitou, “Amata'e palliu ṛoro si ya'u, wuṛṛu paariagai ana see pia ballanne ammul᷊anna sambau ringannu ammul᷊anna manansunna.”

¹⁷I Yakub namarenta su allanga paarorone, “Amungkangu iaangku i Esau massombanu, wuṛṛu maiwal᷊o, ‘Isai mawunu? Manu suapa? Isai tatahuannu manga winatangnga apan uaapidda si'o udde?’

¹⁸Ne simbakke, ‘darotongngu allangngu i Yakub. I tou napaapiddu indi maola'a sasamba si Esau, mawune. Allangngu i Yakub sassane mattuṛṛuta si yami.’ ”

¹⁹Su allangnge aruane, atallune wuṛṛu su anambon taumata apan niapamanara mallu'adda manga ammul᷊annu winatangnga udde, nionggol᷊annu parenta apan uasul᷊ungnga. Ana waugu i Yakub maṛṛingidda i tou wotongnge masal᷊o'i Esau ringannu aonggola udde, na'oman sara amungkangngu massombate, i Esau wotongnge magampungnga si tou.

²¹Nariadi i tou napaawawa aonggola udde dorone, ewe'e i tou sassane nanaṛṛabbi su rasanna.

²²Su ṛabbi udde lai i Yakub napu'ote ana see nangapiddu ruan katou awingnge, awingnge su liudde wuṛṛu siri mapul᷊o assa anangnge, tinumumbe Sal᷊ukku Yabok.

²³Napawe buatte nalliu mangitou, i tou nabelengnga wuṛṛu napaapidu al᷊awo'u pussaane watukku samba'an sal᷊ukka.

²⁴Arawe i tou natantangke sassane. Ne nirumantate sangkatou esakka nallaṛṛawa'i Yakub naddatingngu maranin nallo.

²⁵Napawe taumata udde naapendamma manungku i tou tawe maauntungnga sulal᷊ummu pallaṛṛawa'a udde, i tou namuulla si Yakub su tapannangnge, na'oman sara pasasondoṛṛannu tapanangnge naggal᷊isa.

²⁶Ana see unnu taumata udde, “Pallosa'a i ya'u; tate mal᷊annu lai matannallo sumabbangke.” I Yakub sinumimbakka, “I ya'u tawe mamallosi i Tuangnga, tabbene'e amungkangu i Tuangnga mangal᷊amatta si ya'u.”

²⁷“Isai arannu?” aiwal᷊on taumata udde, “I Yakub” sasimbakke.

²⁸Taumata udde nabbisara, “Arannu wal᷊inewe i Yakub. I'o buatte nallaṛṛawa'u Ruata wuṛṛu ringannu taumata, wuṛṛu i'o naauntunga; ana waugu udde arannu niwalute i Israel.”

²⁹I Yakub nabbisara, “Wal᷊oa'e aranni Tuangnga.” Arawe taumata udde sinumimbakka, “Tawe su ṛinone i'o maiwal᷊on arangku!” Ana see i Tou nangal᷊amatte si Yakub.

³⁰Wua'udde i Yakub nabbisara, “I ya'u buatte nassomba uahahati ringannu Ruata, wuṛṛu i ya'u ta'e wiakka.” Ana waugu udde tampa udde nissagon tou Pniel.

³¹Su tempo matannallo sumabangke, i Yakub nanantangken Pniel, wuṛṛu i tou u'ento ana waugu passondorannu tapanangnge naggal᷊isa.

³²Naddatingngu orassa indi lai papapulunni Israel tawe uminassa ṛemessa apan ua'oossa tapanna'u winatangnga, ana waugu i Yakub buatte nipuulla su tapannangnge.