Read Talaud PANDARIADDI 33 Bible Online

PANDARIADDI 33 - Talaud bible

PANDARIADDI 33

¹I Yakub naasilo si Esau nirumanta ringannu appatu ṛasutta taumatane. Ana waugu udde i tou nattahia manga anangnge su wallati i Lea, i Rahel wuṛṛu ruan katou awingnge su liudde.

²Awingnge su liudde ruan katou suadio'a ringannu anangnge niaddo su saruanne, wua'udde i Lea suadio'a ringannu manga anangnge, ana see i Rahel wuṛṛu i Yusuf su liudde atonna.

³I Yakub u'amatta su saruanni mangitou sarangkanambone, wuṛṛu apiddu mangundanin iaangnge, i tou nassuba na'oman sara paapitu.

⁴Arawe i Esau tinumal᷊angnga naisasomban i Yakub, ana see naṛṛa'uppa ana see nangari'a. Wuṛṛu ruan katou taumata udde ual᷊al᷊uaite.

⁵Napawe i Esau naasilo anambon bawine wuṛṛu manga ana'a udde, i tou naiwal᷊o, “ Isai i mangitou apan suadio'a ringannu indi?” “I mangitou manga ana'u,” sasimbakki Yakub, “Ruata nangonggolu manga ana'a udde si ya'u.”

⁶Wua'udde manga awingnge su liudde niumamatte ringannu manga ana'i mangitou, ana see nassubba.

⁷Wua'udde nirumantate i Lea suadio'a ringannu manga anangnge, wuṛṛu panginsueanne i Yusuf wuṛṛu i Rahel nangundani ana see i mangitou sarangkanambone nassubba.

⁸I Esau naiwal᷊o, “Apa pandumannu ringannu taumata aroddi anambone apan nassomba'u tanginna?” I Yakub sinumimbakka, “Tadea'u ipalluassa naungngu Iaangnga.”

⁹Arawe i Esau nabbisara, “Nasuungke darotongku, ariete i'o mangonggolu aonggola si ya'u.”

¹⁰Unni Yakub, “Arie! Amungkangu i ya'u buatte nalluassa naungngu Iaangnga, sengkampe sasamba'u indi. Si ya'u, naasilo hatin Iaangnga ere lai naasilo hatin Duata, ana waugu Iaangnga aroddi masaṛṛionto'a si ya'u.

¹¹I ya'u sumal᷊ande, sengkampe sasamba apan buatte niapi'u indi. Ruata buatte nangonggolu naungnga mapia si ya'u wuṛṛu nangonggolu al᷊awo'u sarangkanambone apan ta'u hagausanna.” I Yakub sidutu mammata'a na'oman sara i Esau nanengkamma aonggola udde.

¹²Ana see i Esau nabbisara, “Wette i ite masasadia inaite, i ya'u sarun umamatta malliu ṛoro si yamiu.”

¹³I Yakub sinumimbakka, “Iaangnga masingkatta manungku manga ana'u indi ta'e lome, wuṛṛu i ya'u ṛinone maadunna ringannu anambon binatangnga apan tantal᷊anna ta'e mappasusu. Amungkangngu ul᷊uhanna mal᷊iha-l᷊ihakka, salaiwe tumba'u allo massallo, ne anambon ammul᷊annu winatangnga udde sarun mate.

¹⁴Amatte palliu ṛorote, i ya'u manantuṛṛutte ringannu mal᷊iwue. I ya'u sarun umamatta masaṛṛawutta ringannu winatangnga wuṛṛu manga ana'u indi ma'oman sara ma'enggenna Iaangnga su Edom.”

¹⁵Unni Esau, “Amungkangngu aroddi, mappianne i ya'u manantangngu manga pira taumata'u si'o.” Arawe i Yakub sinumimbakka, “Ariete mattinsahadda, i ya'u tumbau maapulu malluassa naungngu Iaangnga.”

¹⁶Etearoddi i Esau nabelengnga poi watukku Edom.

¹⁷Arawe i Yakub inaite watukku Sukot, ana see napararisikku wal᷊en tou wuṛṛu tampan passiringannu manga winatangnge. Ana waugu udde tampa udde nissago Sukot.

¹⁸Sulal᷊ummu amatanna wuassu Mesopotamia, i Yakub na'omate ringannu sal᷊amatta su soa i Sikhem su wanua Kanaan, ana see nangattingngu rasanne su sambau wadda'a maranin soa udde.

¹⁹Wadda'a tampan paddasananne udde niwallianne wuassu papapulunni Hemor, iamangngi Sikhem, ringannu arega maṛṛasutta roitta sal᷊a'a.

²⁰Wua'udde i tou napararisikku mezbah isudde wuṛṛu nissagon tou “El, Ruatan Israel”.