Read Talaud PANDARIADDI 34 Bible Online

PANDARIADDI 34 - Talaud bible

PANDARIADDI 34

¹Su allo sambau, i Dina ana'i Yakub wuṛṛu i Lea, wawine, nattembo manga pira wawinen Kanaan.

²Napawe i Sikhem, ana'i Hemor taumatan i Hewi apan naola'a ratu su wageangnge udde naasilo si Dina, maṛṛuala udde tinal᷊angnge, ana see nilal᷊eon tou.

³Arawe i tou tumanite ninumemman i Dina, na'oman sara piate naungnga si Dina wuṛṛu maddea'a tadea'u maṛṛuala udde lai pia naungnga si tou.

⁴Unni Sikhem su iamangnge, “I ya'u madorongnga Iamangnga mattinsahadda tadea'u maasomba maṛṛuala udde maola'a wageangku. I ya'u mapulu atonna mawingngi tou.”

⁵I Yakub naaringikka manungku anangnge buatte nilal᷊eo awawantuge, arawe ana waugu manga anangnge tantal᷊anna uariaga manga winatangnga su wadda'a, i tou tawe napa'ola'a apa-apa tantal᷊anna i mangitou taambe napul᷊e.

⁶I Hemor, iamangngi Sikhem, nirumanta ringanni Yakub inai ma'a'atokki tou.

⁷Naṛṛindo'a su tempo udde manga ana'i Yakub napul᷊e wuassu wadda'a. Naaringikka watti'a udde, i mangitou niṛṛumindu'a wuṛṛu lembon massa'u. Ana waugu ringannu nandal᷊eo ana'i Yakub udde, i Sikhem buatte nalobbossa anambon taumatan Israel.

⁸Unni Hemor si Yakub, “Ana'u i Sikhem, pia apulu su ana'u Tuṛṛangnga; i ya'u sumal᷊ande tadea'u Tuṛṛangnga mamalan ana'u ma'awingngi tou.

⁹Wette i ite mabbaidda manungku balahannu Tuṛṛangnga wuṛṛu balahannu i yami wotongngete ma'awingnga.

¹⁰Ne manga Tuṛṛangnga wotongngete matana'a suadio'a ringanni yami su wanua indi; suapawe ipa'apulun Tuṛṛangnga. Manga tuṛṛangnga wotongnge mabbal᷊u'a ringannu tawe sal᷊awangnge wuṛṛu manahuanna darotongnga.”

¹¹Wua'udde i Sikhem nabbisara iamangngi Dina wuṛṛu manga iaangnge, “Suungete darorongku indi, ne i ya'u sarun mangonggolu apa apan ipaapulun kamiu.

¹²Wal᷊oa'e lal᷊antakke apa apan ipaapulun kamiu, wuṛṛu tantuna'e wul᷊awannu awingnge. I ya'u sarun mangonggola al᷊awo'u apan doronganni yamiu, addonganne i yamiu mamala'u maawingngu maṛṛuala udde.”

¹³Ana waugu i Sikhem buatte nandal᷊eo awawantugu tuari mangitou i Dina, manga ana'i Yakub nangawusu si Sikhem wuṛṛu si Hemor iamangnge.

¹⁴Unni mangitou su taumata darua udde, “I yami massili mamalan tuarin kami ma'awingnga ringannu taumata apan tawe nisunatta.

¹⁵I yami tumba'u ma'apulun darorongngi yamiu udde ringannu sambau riandi, eteudde: I yamiu ṛinone mabbal᷊i ere i yami, atappasanne anambon esakka su wallati yamiu ṛinone sunatanna.

¹⁶Wua'udde i yami sarun manuungngu darorongngu su ola'u pa'a'awingnga lo'a udde. I yami sarun mamanua su wallati yamiu wuṛṛu mabbal᷊i walahanna sambau ringanni yamiu.

¹⁷Arawe amungkangu i yamiu madiri manengkamma manga rianding kami, wuṛṛu madiri sunatanna, i yami sarun mangul᷊e apia maṛṛuala udde wuṛṛu iapidda mapul᷊e.”

¹⁸I Hemor wuṛṛu i Sikhem mammendamma manga riandi udde su ṛinone,

¹⁹wuṛṛu i Sikhem mal᷊uassa manuungngu riandi udde ana waugu i tou maapulun i Dina. Su wallatu anambon ṛuanganne, ete i Sikhem apan pia saṛṛaungnge.

²⁰Wua'udde i Hemor wuṛṛu i Sikhem inaite watukku tampa paammul᷊anna su ngara pasallangannu soa, wuṛṛu nabbisara su tumana'u soa mangitou arendi,

²¹“Manga taumatan Israel udde haweng kite. Nariaddi wala'e i mangitou matana'a su wanua indi suadio'a ringanni ite wuṛṛu walate i mangitou inai su al᷊awo'u tampa apan ipapulu mangitou. Wanua indi mal᷊al᷊angnga atonna si mangitou. I ite wotongnge ma'awingngu manga maṛṛualan mangitou, wuṛṛu i mangitou lai wotongnge maawingngu manga maṛṛualan kite.

²²Arawe manga taumata udde tumba'u mappulu matana'a susambau ringanni ite wuṛṛu mabbal᷊i walahanna sambau ringanni ite ringannu sambau riandi, eteudde: anambon esakka su wallati ite ṛinone sunatanna ere lai i mangitou.

²³Ne anambon ammul᷊annu winatangngi mangitou wuṛṛu al᷊awo'u darotongngi mangitou mabbal᷊i pussa'ang kite. Nariaddi wette i ite umirete darorongngi mangitou tadea'u i mangitou matana'a su sampunna ringanni ite.”

²⁴Anambon tumana'u soa apan uaammulla udde niumiren darorongngi Hemor wuṛṛu i Sikhem, ana see anambon esakka saṛṛen tumuwo su soa udde nisunatta.

²⁵Tallu allo wua'udde, napawe manga taumata esakka udde ta'e uapendamma atataddu'a ana waugu nisunatta, ruan katou ana'i Yakub, eteudde iaangngi Dina aranne i Simeon wuṛṛu i Lewi, nanganu hal᷊elen tarua, ana see ringannu mal᷊anna-l᷊annaba sinumutta sulal᷊ummu soa. Wua'udde itarua namate anambon taumata esakka isudde,

²⁶nasutta lai i Hemor wuṛṛu i Sikhem. Ana see itarua nangal᷊appa si Dina wuassu wal᷊en i Sikhem niapidda napul᷊e.

²⁷Napawe pamamate udde nal᷊iudda, manga ana'i Yakub waine nangaṛṛo soa udde maola'a wawal᷊issa ana waugu tuari mangitou buatte nilal᷊eo awawantuge.

²⁸I mangitou nanganu ammul᷊annu ambinga domba, sapi, keledai, wuṛṛu al᷊awo'a sulal᷊ummu soa wuṛṛu su wadda'a.

²⁹I mangitou nanganu anambon darotongnga apan maarega, nanametta anambon bawine wuṛṛu al᷊aṛṛana'a wuṛṛu al᷊awo'u lal᷊oṛṛon manga wal᷊en su soa udde.

³⁰I Yakub nabbisara si Simeon wuṛṛu si Lewi, “Iradua napaasusa'u. Orassa indi taumatan Kanaan wuṛṛu taumatan Feris wuṛṛu anambon tumana'u wanua indi sarun mandantingku. Manga taumatan kite matul᷊u; amungkangu manga tumana'u wanua udde maammula mandoappa wuṛṛu mamangalo si ya'u, anambon amonanni ite pateanna.”

³¹Arawe i mangitou sinumimbakka, “I yami tawe mapaawalan tuaring kami niola'a naal᷊ihidda wawine masandaga.”