Read Talaud PANDARIADDI 35 Bible Online

PANDARIADDI 35 - Talaud bible

PANDARIADDI 35

¹Su allo sambau Ruata nabbisara si Yakub, “Ete i Ya'u Ruata apan naipasilon batangan-Ne si'o su tempo i'o tinumal᷊angngu iaangngu i Esau. Inaite paal᷊ihakka watukku Betel. Atana'e isudde wuṛṛu pararisiṛṛa'e samba'u mezbah huna'u.”

²Ana see i Yakub nabbisara su amonanne wuṛṛu su anambon taumata apan suadio'a ringanni tou, “I ite inaite wua isindi mabatukku Betel. Isudde i ya'u sarun mapararisikku mezbahu Duata apan buatte nantul᷊ungku su tempon asasusa'u wuṛṛu apan buatte nallu'adda su al᷊o'engngu amatangku. Nariaddi rammea'e paal᷊uannu manga monganna apan sasahipunannu; pa'ola'e lal᷊aghun pamamaresi wadangnga wuṛṛu palluṛṛeten laubba waresi.”

⁴Ana see i mangitou manantillu anambon paal᷊uannu monganna si Yakub apan sasahipunanni mangitou wuṛṛu lai ngante-ngante mangitou. Anambon saranapa udde nial᷊in i Yakub su al᷊ungngu alu wahewalla maranin soan i Sikhem.

⁵Su tempo i Yakub wuṛṛu ammul᷊annu amonanne inaite, Ruata nandantan atata'utta su tumana'u manga soa maranine, na'oman sara i mangitou tawe nangenggenna si Yakub wuṛṛu ammul᷊annu amonanne.

⁶Ana see i mangitou na'omate su leta'u Kanaan su soan Betel apan dorone aranne Lus.

⁷Isudde i Yakub napararisikku mezbah wuṛṛu tampa udde nissago “El-Betel”, ana waugu Ruata buatte naipasilon batangan-Ne si tou isudde su tempo i tou tinumal᷊angngu iaangnge.

⁸Poiaroddi lai Debora, mamamadul᷊i si Ribka, nate ana see nilabbingnga su al᷊ungngu alu wahewalla su samba'an timukku soa udde. Ana waugu udde alu udde nissago “Alu Lal᷊uai”.

⁹Napawe i Yakub nabelengke wuassu Mesopotamia, Ruata naipasilon batangan-Ne apia si tou wuṛṛu nangal᷊amatta si tou.

¹⁰Wisara Ruata si tou, “I'o tate lai isaggo i Yakub, ewe'e i Israel.” Etearoddi i tou nissagon Ruata i Israel.

¹¹Ana see Ruata nabbisara apia, “Ete i Ya'u Ruata Lembontaṛṛino. I'o pabbalage ringannu manambo-nambo! I'o sarun manossokku manga balahanna wuṛṛu maola'a iamangngu al᷊amona manga ratu.

¹²Wanua apan buatte Ta'u nionggola si Abraham wuṛṛu si Ishak, sarun Ta'u ionggola si'o wuṛṛu su papapulunnu.”

¹³Wua'udde Ruata nanantangngi Yakub.

¹⁴Su tampan Duata nabbisara si Yakub; i tou namasi'u sambau watu pananaunganna. Ana see watu udde nionggola su Ruata ringannu nallal᷊innu anggore wuṛṛu lanan zaitun su wowone.

¹⁵Tampa udde nissagon tou “Betel”.

¹⁶Wua'udde i Yakub wuṛṛu ammul᷊annu taumatane nanantangken Betel. Su tempon i mangitou ta'e marau wuassu Efrata, nia'omante tempone i Rahel mangunsiwe. Arawe anangnge masahadda isungkangnga.

¹⁷Su tempon taddu'u pangangunsiwene nangillembote, nabbisarate mapapanden mangunsiwe si tou, “Paahewalla naungngu, i Rahel, anangngu esakka apia.”

¹⁸Arawe i Rahel maraniten mate, wuṛṛu su tempo i tou manginsuete sasangngone, ana'a udde nissagon tou i Ben-Oni arawe nissagon iamangnge i Benyamin.

¹⁹Napawe i Rahel natete, i tou nilabbingnga su winggin dal᷊anna apan matuda watukku Efrata, apan orassa indi aranne Betlehem.

²⁰I Yakub napararisikku sambau watu pananaunganna isudde, wuṛṛu naddatingngu orassa indi lai labbingngi Rahel ta'e tatialannu watu udde.

²¹Wua'udde i Yakub nanassukku amatanne, ana see namasi'u rasanne su sambau tampa sumabbi candi Eder.

²²Tantal᷊anna i mangitou uatana'a su tampa udde i Ruben natiilla ringanni Bilha, awingngu iamangnge su liudde. Olangnge udde niasingkatanni Yakub, wuṛṛu i tou nasa'u atonna. I Yakub uatahuanna siri mapul᷊o dua ana'a esakka.

²³Manga ana'i Lea eteudde i Ruben (ana'i Yakub pahulu), i Simeon, i Lewi, i Yehuda, i Isakhar wuṛṛu i Zebulon.

²⁴Manga ana'i Rahel eteudde i Yusuf wuṛṛu i Benyamin.

²⁵Manga ana'i Bilha, allangngi Rahel eteudde i Dan wuṛṛu i Naftali.

²⁶Manga ana'i Zilpa, allangngi Lea eteudde i Gad wuṛṛu i Asyer. Manga ana'a udde niasungkanga su Mesopotamia.

²⁷Ana see i Yakub na'omate ringanni Ishak iamangnge, su tampa atatanaanne su Mamre maranin Hebron. (Dorone i Abraham iupungnge, uataana'a lai poiaroddi).

²⁸Su uukka apan timmadete, eteudde maṛṛasutta ual᷊un pul᷊o su tonnane, i Ishak nate wuṛṛu nilabbingngi Esau, i Yakub wuṛṛu manga anangnge.