Read Talaud PANDARIADDI 38 Bible Online

PANDARIADDI 38 - Talaud bible

PANDARIADDI 38

¹Iraṛṛangngo su tempo udde i Yehuda nanantangngu manga tuṛṛangnge wuṛṛu natana'a suadio'a ringanni Hira, sangkatou esakka niarantanne wuassu soan Adulam.

²Isudde i Yehuda naggawen sangkatou maṛṛualan Kanaan, ana'i Sua, ana see itarua na'awingnga.

³Ana'i tarua pahul᷊u esakka, nisaggon iamangnge i Er.

⁴Ana'a aruane, esakka lai, nisaggon tou i Onan.

⁵Ana'a atallune lai esakka, wuṛṛu nisaggon tou i Syela. Su tempo i Syela niasungkanga i Yehuda tantal᷊anna su Kezib.

⁶I Yehuda nangawingngu anangnge i Er, anangnge pahul᷊une ringanni Tamar.

⁷Pallal᷊aghun i Er tumaniten dal᷊eo atonna, na'oman sara MAWU nasa'u wuṛṛu namate si tou.

⁸Ana see i Yehuda nabbisara si Onan tuarin i Er, “Roote ringannu inawal᷊uannu iaangngu, wuṛṛu atiille ringanni tou. Suunga'e manaranu ringanni tou, ana waugu i'o tuarin awingnge; ringannu aroddi iaangngu wotongnge maasomba pallaṛṛite.”

⁹Arawe i Onan masingkatta manungku manga anangnge sarun tawe maola'a pussaane. Nariaddi, suapan i tou matatamban inawal᷊uannu iaangnge udde, sal᷊ingnge niwalan tou maramme su liudde tadea'u iaangnge tawe maasomba pallaṛṛite.

¹⁰Inolaanne udde naasa'u MAWU, wuṛṛu MAWU namate si tou lai.

¹¹Wua'udde i Yehuda nabbisarate si Tamar mananambone udde, “Pabbelengke su wal᷊en hagurangngu wuṛṛu atana'e isudde ere sangkatou inawal᷊uanna maddatingngu ana'u i Syela mahewalla.” I tou nabisara aroddi ana waugu matta'utta aṛṛengenne i Syela sarun pateannu MAWU lai, ere iaangnge ruan katou. Ne i Tamar napul᷊ete watukku wal᷊en hagurangnge.

¹²Manga pira tempo nal᷊iudda awingngi Yehuda nate. Napawe nasuete tempone lullal᷊o, i Yehuda nangahe si Hira, hawene wuassu Adulam udde, inai watukku Timna, su tampa manga dombane pappol᷊oanna wambul᷊une.

¹³I Tamar naaringikka watti'a manungku i Yehuda la'iananne sarun dumanta su Timna mamol᷊o wambul᷊u manga dombane.

¹⁴Ne i tou nanal᷊iu laubbu inawal᷊uanne ringannu laubba waine. Hatine nilindumanna, ana see i tou inuma'iante su ngara pasallangannu soan Enaim, apan addone su lal᷊anna mattudan Timna. I Tamar masingkatta atonna manungku i Syela ana'i Yehuda ṛembonne, wahewalle, arawe i tou taambe lai niawingnga ringannu umbasanna udde.

¹⁵Napawe i Yehuda naasilo si Tamar, su sunnane wawine udde wawine masandaga, ana waugu hatine lal᷊indumanna.

¹⁶Ana see i Yehuda nangundanin tou su winggin dal᷊anna udde, wuṛṛu nabbisara, “Pira apan dorongannu?” I tou wagga manungku wawine udde mananambone sassane. I Tamar sinumimbakka, “Walate i Tuangnga.”

¹⁷I Yehuda nabbisara apia, “I ya'u sarun mangonggola si'o samba'u ana'u ambinga saṛṛen tumuwo.” Sasimbakki Tamar, “Wotongnge, sawal᷊iate pia wataṛṛune, ma'oman sara i Tuangnga mapaapidu ambinga udde.”

¹⁸“Apa wataṛṛune?” aiwal᷊on i Yehuda. Sasimbakki Tamar, “Onggol᷊a'e si ya'u cappan Tuangnga ringannu tal᷊ine wuṛṛu lai ta'inna apan aagasanni Tuangnga udde.” I Yehuda nangonggolu manga saranapa udde si tou, ana see itarua natatambate, wuṛṛu i Tamar piate illoṛṛo.

¹⁹I Tamar napul᷊ete watukku wal᷊ene wuṛṛu nalluatta lal᷊indummu hatine, ana see nalluṛṛen laubbu inawal᷊uanne apia.

²⁰Manga pira tempo wua'udde i Yehuda nandolokki Hira, hawene, iapa'untuddu ambinga udde wuṛṛu mangul᷊e apia manga saranapa apan buatte nionggoli tou maola'a wataṛṛu, arawe i Hira tawe naasangkalla wawine udde.

²¹I Hira mangke ma'iwal᷊o manga taumata su Enaim, “Suapa wawine masandaga apan inanaramanne ual᷊aṛṛaddo su winggin dal᷊anna indi?” “Tawe saran paassa pia bawine masandaga isindi,” sasimbakki mangitou.

²²Ana see i Hira nabelengke apia ringanni Yehuda wuṛṛu nabbisara, “I ya'u tawe maasangkalla wawine udde. Tumuṛṛutu manga taumata poiaroddi tawe saran paassa pia wawine masandaga isudde.”

²³Unni Yehuda, “Wala'e manga saranapa udde onggol᷊a'e si tou, sawal᷊iate i ite tawe maasomba asasili. I ya'u buatte mattinsahadda mamaekka, arawe i'o tawe naasangkalla si tou.”

²⁴Iraṛṛangngo tallu wul᷊ana wua'udde i Yehuda naaringikka watti'a manungku i Tamar mananambone buatte nail᷊al᷊ihidda wawine masandaga wuṛṛu piate illoṛṛo. Ana see i Yehuda mamarenta, “Al᷊appe i tou wuṛṛu tambuna'e ma'oman sara mate!”

²⁵Tantal᷊anna i Tamar niapidda su liudde, i tou nananata la'iananne, wisarane, “I ya'u piate illoṛṛo wuassu taumata apan uatahuanna manga saranapa indi. Parikisete isai tatahuannu cappa ringannu tal᷊ine wuṛṛu ta'inna indi.”

²⁶I Yehuda naaillal᷊a manga saranapa udde wuṛṛu nabbisara, “Wawine udde tawe sal᷊ane. I ya'u tawe naatipussa manara'u si tou; ṛinone i ya'u mangawingngi tou ringannu ana'u i Syela.” I Yehuda tate lai natatamban Tamar.

²⁷Napawe nia'omante tempone i Tamar mangunsiwe, inauranna i tou manungkangu ana'a ṛindua.

²⁸Tantal᷊anna i tou mangunsiwe, sangkatou suwallatu ana'a ṛindua udde napasabangngu limane, ana see biangnga nangagassa ta'iakka udde wuṛṛu niwa'issu wananna maṛṛamu. Wisarane, “Ana'a udde masungkanga paarorone.”

²⁹Arawe ana'a udde namelengngu ta'iakke apia, wuṛṛu eteudde ana'a sambau nisungkanga paarorone. Wua'udde biangnga nabbisara, “Nariaddi etearoddi olangngu mamata'a sumabbangnga!” Ne ana'a apan niasungkanga paarorone udde nissagon tou i Peres.

³⁰Wua'udde niasungkangke tuarine apan limane pia banannane maṛṛamu. I tou nisaggo i Zerah.