Read Talaud PANDARIADDI 4 Bible Online

PANDARIADDI 4 - Talaud bible

PANDARIADDI 4

¹Wua'udde i Adam natatambaten i Hawa, awingnge, ne wawine udde piate illoṛṛo. I tou nanungkangken sangkatou ana'a wuṛṛu nabbisara. “Ringannu aakannu MAWU i ya'u naasombate sangkatou ana'a esakka.” Ne ana'a udde nissagote i Kain.

²Ana see i Hawa nangunsiweten sangkatou ana'a esakka apia, aranne i Habel. I Habel naola'a mallal᷊u'adda domba, arawe i Kain nabbal᷊i mabbawailla.

³Manga pira tempo wua'udde i Kain nanganu sangkawageanganna wuassu inasaharanne ana see nionggolla su MAWU.

⁴Ana see i Habel nanganu ana'u domba pahul᷊une sambau wuassu manga dombane, niṛṛata, ana see nangonggollu wageangnge apiane su MAWU. MAWU mal᷊uassa si Habel wuṛṛu aonggolle,

⁵arawe nanol᷊a'i Kain wuṛṛu aonggolle. I Kain mangke nasa'u atonna, wuṛṛu hatine naṛṛamutta.

⁶Ne MAWU nabbisarate si Kain, “Anio i'o massa'u? Anio hatinu tumanite nasa'u?

⁷Amungkangngu i'o ma'ola'a apapia, i'o umamminna; o arawe amungkangngu i'o ma'ola'a al᷊al᷊eo, ne rosa uaṛṛadote sumutta sulal᷊ummu naungngu. Rosa sarun uataṛṛino wadangngu arawe i'o ṛinone mangindaun tou.”

⁸Ana see unni i Kain si Habel, tuarine, “Wette iaddua inai su wailla.” Su tempo itarua na'omate isudde, i Kain namangalo wuṛṛu namate si Habel tuarine.

⁹MAWU naiwal᷊o si Kain, “Suapa i Habel, tuarinu?” Kain sinumimbakka, “I Ya'u wagga. Apa ṛinone i ya'u ual᷊u'adda tuari'u?”

¹⁰Ana see MAWU nabbisara, “Anio i'o ma'ola'a inolaanna apan maata'utta udde? Daṛṛan tuarinu uui si ya'u wuassu leta'a, naal᷊ihidda tingikka sussal᷊ande madorongnga wawal᷊inne.

¹¹Niawontohante i'o ma'oman sara mattinsahadda su leta'a. Leta'a udde luatte nangiṛṛuppa daṛṛan tuarinu, ere ola'u niwu'a moṛṛongnge ipanengkamma daṛṛan tuarinu udde sutempo i'o namate si tou.

¹²Amungkangngu i'o massuanna, leta'a sarun tawe mangonggollu hessine; i'o sarun maola'a mamamal᷊intadda apan tawe tampa atatanaanna su runia.”

¹³Ne wisaran Kain su MAWU, “Ṛuumanna udde tumaniten mawakkatta, i Ya'u tawe maapasanna.

¹⁴I'o nallimbuakka si Ya'u wuassu leta'a indi, marau wua dingan-Nu. I Ya'u sarun maola'a mamamal᷊intadda apan tawe tampa atatanaanna su runia, wuṛṛu i Ya'u sarun pateannu al᷊awo'u taumata apan massomba'u.”

¹⁵Arawe MAWU nabbisara, “Tawe. Amungkangngu i'o pateanna, ne maola'a wawal᷊inne, siri pitu nasutta lai iapa namate si'o udde sarun pateanna lai.” Wua'udde MAWU naniala si Kain tadea'u isai-sai apan massombane tawe mamate si tou.

¹⁶Ana see i Kain nassal᷊iute wuassu saruannu MAWU Ruata wuṛṛu natana'e su leta'a aranne “Pamamal᷊intaanna” su samba'an da'in Eden.

¹⁷I Kain wuṛṛu awingnge naasomba ana'a esakka, apan nionggol᷊annu aranne i Henokh. Wua'udde i Kain napararisikku sambau soa wuṛṛu soa udde nissago tumuṛṛuttu arannu anangnge udde.

¹⁸I Henokh iamangngi Irad. I Irad iamangngi Mehuyael, i Mehuyael iamangngi Metusael, wuṛṛu i Metusael udde iamangngi Lamekh.

¹⁹I Lamekh ruan katou awingnge, i Ada wuṛṛu i Zila.

²⁰I Ada nanungkangngi Yabal wuṛṛu papapulunni Yabal eteudde walahanna apan uapaddul᷊i winatangnga wuṛṛu uatana'a su rasanna.

²¹Tuarine aranne i Yubal, wuṛṛu papapulunni Yubal eteudde mananalangnga kecapi wuṛṛu wansi.

²²I Zila nanungkangngi Tubal-Kain, wuṛṛu papapulunne ma'ola'a al᷊awo'u hatin saranapa wuassu witu'a wuṛṛu atta'a. Tuarin Tubal-Kain wawine aranne i Naama.

²³Nabbisarate i Lamekh su awingnge darua, “Ada wuṛṛu Zila, paddaringikka! Sangkatou umbasanna ta'u pateanna ana waugu buatte nango'a si ya'u.

²⁴Amungkangngu pitung katou ana waugu ipabbal᷊issa papaten i Kain, ne pitun pul᷊o pitu su atoune sarun pateanna amungkangngu i ya'u pateanna.”

²⁵I Adam wuṛṛu awingnge naasomba sangkatou ana'a esakka apia. Unni Hawa, “Ruata buatte nangonggollu ana'a esakka si ya'u maola'a hahantin Habel, apan buatte nipaten Kain.” Ana waugu udde i Hawa nanagon ana'a udde i Set.

²⁶I Set pia ana'a esakka aranne i Enos. Ete su tempo udde taumata nanattakka mannagon arannu MAWU napawe massubba.