Read Talaud PANDARIADDI 41 Bible Online

PANDARIADDI 41 - Talaud bible

PANDARIADDI 41

¹Napawe nal᷊iute rua tonna, ratun Mesir nabbal᷊iawa, manungku i tou tantal᷊anna uarisikka su winggin Sal᷊ukku Nil.

²Inaṛṛombaganne pitu sapi apan mangkatawa wuṛṛu pisine lullendapa, sinumabangnga wuassu sal᷊ukka udde ana see niumante nannal᷊o su winggin sal᷊ukka udde.

³Wua'udde pitu sapi waine sinumabangnga lai; manga winatangnga udde maṛṛasa wuṛṛu ete pisi uapi'unna duṛṛi. Manga sapi maṛṛasa udde uarisikka su sandiṛṛannu manga sapi matawa, su winggin sal᷊ukka udde.

⁴Wua'udde manga sapi maṛṛasa nangallupa manga sapi matawa. Wua'udde ratu napu'ote wuassu atatiille.

⁵Wua'udde i tou niamatiilanna wuṛṛu nabbal᷊iawa apia. Sulal᷊ummu wal᷊iawane i tou naasilo pitun dae gandumma apan pia loṛṛone wuṛṛu nal᷊ahate uatuwo su gandumma sangkalu.

⁶Wua'udde tinumuwote lai pitun rae gandumma waine, apan maṛṛisitta wuṛṛu tinumolangnga ana waugu anginnu wadda'a.

⁷Ana see rae gandumma maṛṛisitta udde nangallupa pitun rae apan pia loṛṛone tanginna. Wua'udde ratu napu'ote wuṛṛu naatutukka manungku i tou buatte nabbal᷊iawa.

⁸Marua allone ratu sussinggawangke, ana waugu udde i tou nandolokka niapawago anambon taṛṛa pani'atta wuṛṛu taumata pia asingkanne su Mesir. Ana see nabbati'u wal᷊iawane si mangitou, arawe tawe saran sangkatou apan botongnge manal᷊a'an atappasanne.

⁹Wua'udde mangangimben ua'e namasingkatta ratu, “Allo indi allangngu ṛinone manga'u pasasal᷊an allangngu.

¹⁰Dorone i Tuangnga massa'u su mangangimben doti wuṛṛu si ya'u allangngu, ana see i yami nitaṛṛo sulal᷊ummu tutupanna, su wal᷊en tembonannu mandariagan araratuanna.

¹¹Su ṛabbi sambau iambua nabbal᷊iawa, wuṛṛu wal᷊iawang kami uapapaṛṛala atappasanne.

¹²Sangkatou umbasanna taumatan Ibrani poiaroddi lai ringanni yami. I tou mangangimbe tembonannu mandariagan araratuanna udde. Iambua nabbatti'u wal᷊iawa si tou, ana see i tou nanal᷊a'an atappasannu wal᷊iawa udde.

¹³Nilumiatta'e sarangkanambone natipussa ere buatte niwal᷊one, eteudde: i Tuangnga napaawelengngu allang su manaran allangu paarorone, arawe naṛṛuumanna patenna mangangimben doti udde.”

¹⁴Ne ratu nandolokka niapaal᷊appa si Yusuf, wuṛṛu ringannu mal᷊ihakka i tou niapaasabanga wuassu tutupanna. Napawe i Yusuf buatte naipol᷊o wuṛṛu nangganti laubba, i tou sinumaruante ratu.

¹⁵Ratu nabbisara si tou, “I ya'u buatte nabbal᷊iawa, wuṛṛu tawe saran sangkatou apan botongnge manal᷊a'an atappasanne. Piaddu namasingkatta si ya'u manungku i'o wotongnge manal᷊a'an bal᷊iawa.”

¹⁶I Yusuf sinumimbakka, “Wal᷊ine allangi, Tuangku, ewe'e Ruata apan sarun mangonggolu tal᷊aane apan naṛṛino.”

¹⁷Ana see ratu nabbisarate, “I ya'u nabbal᷊iawa manungku i ya'u tantal᷊anna uarisikka su winggin Sal᷊ukku Nil.

¹⁸Ana see sinumabangke wuassu sal᷊ukka udde pitu sapi apan mangkatawa wuṛṛu pisine lullendappa, ana see mannatakke u'anna nannal᷊o su winggin sal᷊ukka udde.

¹⁹Wua'udde sinumabangke lai pitu sapi waine, apan maṛṛasa wuṛṛu ete pisi uapi'unna duṛṛi. Taambe saran paassa i ya'u naasilo sapi aroddi alal᷊eine su ahewallu Mesir.

²⁰Manga sapi maṛṛasa udde nangallupa pitu sapi apan mangkatawa tanginna.

²¹Arawe napawe wua'udde manga sapi maṛṛasa udde ta'e lai maṛṛasa. Ana see i ya'u napu'ote wuassu atatiilla.

²²Wua'udde i ya'u niamatiil᷊anna wuṛṛu nabbal᷊iawa apia, manungku i ya'u naasilo pitun rae gandumma apan pia loṛṛone wuṛṛu nal᷊ahate, uatuwo su gandumma sangkalu.

²³Ana see tinumuwo lai pitun rae gandumma apan maṛṛasa wuṛṛu tinumolangnga ana waugu anginnu wadda'a.

²⁴Raen gandumma apan maṛṛasa udde nangallupa rae apan pia loṛṛone tanginna. Buatte ta'u niwatti'a wal᷊iawa'u darua udde su manga taṛṛa pani'atta, arawe tawe saran sangkatou wotongnge maatal᷊a'an atapasanne.”

²⁵Ana see unni Yusuf su ratu, “Wal᷊iawa darua udde uasul᷊ungnga atappasanne; Ruata buatte namasingkatta si Tuangku sarangkanambone apan sarun olaanne.

²⁶Sapi pitu apan matawa udde eteudde pitu tonna, wuṛṛu pitu raen gandumma apan pia loṛṛone udde eteudde pitu tonna lai; itarua uasul᷊ungnga atappasanne.

²⁷Sapi pitu apan maṛṛasa, apan sinumabangnga nanansunna, see pitun dae gandumma apan maṛṛasa wuṛṛu tinumolangnga ana waugu anginnu wadda'a udde eteudde tempon araṛṛutumma al᷊annune pitu tonna.

²⁸Su ereapa apan buatte niapasingkattu allangu si Tuanga, Ruata buatte namasilo si Tuanga sarangkanambone apan olaanne.

²⁹Sarun dumanta pitu tonna maṛṛatubba tempon al᷊al᷊aidda su ahewallu wanua Mesir.

³⁰Wua'udde sarun dumanta pitu tonna al᷊aṛṛutumma, wuṛṛu tempon al᷊al᷊aidda udde sarun abbul᷊iananna atonna, ana waugu tempon al᷊aṛṛutumma udde masaddata atonna na'oman sara wanua udde naṛṛagassa.

³¹

³²Waliawan i Tuangku nariaddi paarua, udde atappasanne manungku olangnge udde buatte tinantunnu Ruata wuṛṛu manungku Ruata mapaamatta ringannu mal᷊ihakka.

³³Ana waugu udde, mappianne i Tuangku mamile sangkatou pande wuṛṛu pia asingkatta wuṛṛu mangonggolu taṛṛino si tou iapaatokku wanua indi.

³⁴I Tuangku lai ṛinone mapatenegu manga mammamanara waine, wuṛṛu mangonggola si mangitou taṛṛino ipadorongnga wageangnga al᷊imane wageangnga wuassu al᷊awo'u pangitinganna gandumma al᷊annune pitu tonna su tempon al᷊al᷊aidda udde, ana see iammulla su manga soa wuṛṛu riaganna.

³⁵

³⁶Gandumma udde sarun maola'a saddian anna al᷊annune pitu tonna al᷊aṛṛutumma apan sarun dumanta su Mesir. Ringannu aroddi tumanangnge tawe mate amal᷊unusanna.”

³⁷Ratu wuṛṛu manga mamanangan araratuanne sangkire su ṛiini Yusuf udde.

³⁸Ana see ratu nabbisara si mangitou, “I ite tawe maasomba taumata waine apan botongnge maasampal᷊iu si Yusuf, ana waugu i tou aehetannu ghaṛṛahon Duata.”

³⁹Ne ratu nabbisara si Yusuf, “Ruata buatte namasingkattu sarangkanambone indi si'o, nariaddi natualage manungku i'o mappandeanna wuṛṛu massingkatanna wuassu al᷊awo'u taumata.

⁴⁰I'o sarun ta'u itenega maola'a gubernure, wuṛṛu tumana'u sarangkanambone sarun tumuṛṛutta parentanu. Tumba'u i ya'u apan lembon uataṛṛino wuassi'o.”

⁴¹Wua'udde ratu nalluatta wuassu tal᷊imadone sinsinga apan hahambarannu tatialan araratuanna, ana see niluṛṛe su tal᷊imadon i Yusuf apiddu nabbisara, “Ringannu indi i'o ta'u itenega maola'a gubernure su ahewallu Mesir.” Wua'udde i tou nalluṛṛen juba linen apan al᷊ussa si Yusuf, wuṛṛu niwul᷊ele su ullekane sambau ṛate wul᷊awanna.

⁴²

⁴³Ana see i tou nangonggola si Yusuf sambau keretan araratuanna aruane maola'a sasa'eanne, wuṛṛu mandariaga awawantugu ratu u'amatta su saruannu kereta udde apiddu u'ui, “Ore! Paamata'a! Paamata'a!” Etearoddi i Yusuf nitenega naola'a gubernure su ahewallu Mesir.

⁴⁴Unnu ratu si tou, “Tumba'u i ya'u ratu wuṛṛu i ya'u mamasingkatta manungku amungkangu tawe wuassu asingkannu tawe saran sangkatou su ahewallu Mesir wotongnge mammanara.”

⁴⁵Ana see ratu nangonggolu sambau arannu Mesir si Yusuf, eteudde i Zafnat-Paaneah. I tou lai nangonggolu sangkatou awingnge aranne i Asnat, ana'i Potifera apan naola'a imam su soan Heliopolis. I Yusuf uukke tallun pul᷊o su tonnane su tempo i tou nanattaka mammanara ringannu ratu Mesir. Ne i Yusuf nanantangken wal᷊en araratuanna wuṛṛu inaite namal᷊iwutta ahewallu araratuanna.

⁴⁶

⁴⁷Sulal᷊ummu tempo pitu tonna napenen al᷊al᷊aidda udde, leta'a nangonggolu hessine apan manambo-nambo.

⁴⁸Gandumma udde niammuli Yusuf ana see sinahipunna su manga soa. Sulal᷊ummu sambau soa i tou nanahipunna gandumma hessin manga wailla su al᷊indongannu soa udde.

⁴⁹Gandumma apan niammuli tou udde aroddi anambone na'oman sara i Yusuf nangillol᷊o mangnguukka, ana waugu anambone naal᷊ihidda anne su winggin tahal᷊oangnga.

⁵⁰Tantal᷊anna tempon ṛutumma udde taambe nia'omanna, i Asnat awingngi Yusuf nanungkangu ruan katou ana'a esakka.

⁵¹Unni Yusuf, “Ruata buatte na'ola'a si ya'u naabul᷊in al᷊awo'u asasusa'u wuṛṛu su ṛuangannu iamangku.” Ana waugu udde ana'a paarorone nissagon tou “I Manasye”.

⁵²“Ruata buatte nangonggolu manga ana'a si ya'u sulal᷊ummu tempon asasusa'u,” ana see anangnge aruane nissago “i Efraim”.

⁵³Pitu tonna tempon al᷊al᷊aidda apan buatte niapendamannu wanua Mesir udde nasuete.

⁵⁴Ne nirumantate pitu tonna tempon ṛutumma, ere buatte nipasingkatti Yusuf. Su ahewallu runia nariadite ṛutumma, arawe su ahewallu Mesir pia anna uaraddo.

⁵⁵Napawe tumana'u Mesir mannattake maapendamma lunussa, i mangitou nadorongnga anna su ratu. Ana see ratu nandolokki mangitou ringanni Yusuf wuṛṛu tinumuṛṛutta al᷊awo'u apa apan nirolokki Yusuf si mangitou.

⁵⁶Napawe tempon ṛutumma udde mangke a'atambanna wuṛṛu a'apendamante su ahewallu wanua, i Yusuf namu'ate al᷊awo'u wal᷊ingkaka wuṛṛu nabbal᷊u'u gandumma su taumatan Mesir.

⁵⁷Wuassu ahewallu runia manga taumata nirumanta watukku Mesir mamalli gandumma si Yusuf, ana waugu ṛutumma udde masaddate atonna su al᷊awo'u tampa.