Read Talaud PANDARIADDI 42 Bible Online

PANDARIADDI 42 - Talaud bible

PANDARIADDI 42

¹Napawe i Yakub naaringikka manungku pia gandumma su Mesir, i tou nabbisarate su al᷊aṛṛanangnge, “Anio i yamiu matammu-tammuda?

²I ya'u naaringikka manungku pia gandumma su Mesir; roote poiaroddi wuṛṛu pamallite gandumma tadea'u i ite tawe mate amal᷊unusanna.”

³Ana see inaite siri mapul᷊o iaangngi Yusuf udde mamalli gandumma su Mesir.

⁴Arawe i Yakub tawe namalan i Benyamin, tuarin i Yusuf sidutu, inai suadio'a ringanni mangitou, ana waugu i tou matta'utta ṛombanganne mariaddi asasilaka ringannu anangnge udde.

⁵Ana waugu al᷊aṛutumma su wanua Kanaan, al᷊aṛṛana'i Yakub suadio'a ringannu manambo taumata waine nirumanta mamalli gandumma su Mesir.

⁶Apan mabbal᷊u'u gandumma su manga taumata wuassu ahewallu runia eteudde i Yusuf, apan naola'a gubernuren Mesir. Ana waugu udde manga iaangngi Yusuf nirumanta wuṛṛu nassubba su saruanne.

⁷Napawe i Yusuf naasilo manga iaangnge, i tou naaillal᷊a si mangitou, arawe i tou mammahia tawe naaillal᷊a. Ringannu maṛṛagissa i tou naiwal᷊o si mangitou, “I yamiu taumata wuassuapa?” “Yami taumatan Kanaan. Yami nirumanta mamalli anna,” sasimbakki mangitou.

⁸Salaiwe i Yusuf naaillal᷊a manga iaangnge, arawe i mangitou tawe naaillal᷊a si tou.

⁹Ana see i tou naanaungnga wal᷊iawane su ola'i mangitou. Wuṛṛu nabbisarate i tou, “I yamiu indi matataṛṛaso'o; i yamiu nirumanta manniata suapa al᷊allomen banuan kami.”

¹⁰“Tawe, i Tuangku,” sasimbakki mangitou. “Yami, manga allangu, Tuangnga nirumanta tumba'u mamalli anna.

¹¹Yami indi sangkatuṛṛangnga, Tuangku. Yami indi taumata mapia, wal᷊ine matataṛṛaso'o.”

¹²I Yusuf nabbisara si mangitou, “Awusu! I yamiu nirumanta inawarendi manniata suapa al᷊allomen banua indi.”

¹³I mangitou sinumimbakka, “Yami indi siri mapul᷊o dua sangkatuṛṛangnga, Tuangku, yami ana'u iamangnga sambau su wanua Kanaan. Sangkatou su wallati yami natete wuṛṛu iapa ṛembonne poi suadio'a ringannu iamangngi yami.”

¹⁴“Mangke atonna ere su wisara'u,” sasimbakki Yusuf, “i yamiu indi matataṛṛaso'o.

¹⁵I ya'u maapulu maannammi si yamiu: I ya'u massalu ringannu arannu ratu manungku i yamiu tawe maatantangngu wanua indi amungkangu iapa tuarinu ṛembone udde tawe rumanta inawarendi.

¹⁶Sangkatou su wallati yamiu mangal᷊appa si tou. Ingana'a waine taṛṛanganna maddatingngu manga wisaranu udde atonna. Amungkangu tawe, ringannu arannu ratu i yamiu indi matataṛṛaso'on seetta!”

¹⁷Wua'udde i mangitou nitaṛṛo su tutupanna tallu allo al᷊annune.

¹⁸Su allo atallune i Yusuf nabbisara si mangitou, “I ya'u taumata apan matta'utta wuṛṛu matuṛṛutta Ruata. I yamiu sarun ta'u ipallossa ringannu sambau pa'aire.

¹⁹Tadea'u maasingkatta manungku i yamiu indi taumata mapia, sangkatou wuassu wallati yamiu sarun taṛṛanganna sulal᷊ummu tutupanna; ingana'a waine wotongngete mapul᷊e wuṛṛu mangapiddu gandumma apan niwallianni yamiu su amonannu apan tantal᷊anna uatataṛṛangnga lunussa.

²⁰Wua'udde i yamiu ṛinone mangapiddu tuarinu iapa ṛembonne udde ringangku. Udde tialane manungku wisaranu udde atonna, wuṛṛu i yamiu tawe ta'u iṛṛuumanna pateanna.” I mangitou niumiren ṛaṛṛawesu gubernure udde.

²¹Ana see i mangitou uahahattote sangkatou ringannu sangkatou, “Ne, orassa indi i ite niṛṛuumanna ana waugu pasasal᷊a su tuarin kite dorone; i tou ma'iontolla arawe i ite ma'ielembaga, salaiwe i ite maasilo manungku i tou uatataṛṛangnga asasusa. Ana waugu udde i ite orassa indi naapendampe asasusa indi.”

²²I Ruben nabbisara, “Wal᷊inewe dorone i ya'u buatte nabbisara si yamiu tadea'u ana'a udde arie lal᷊eoanna. Arawe i yamiu madiri maddaringikka. Ne orassa indi papatene niwal᷊issanna si ite.”

²³I Yusuf naasunna sasinaukki mangitou, arawe i mangitou tawe naasingkatta olangnge udde, ana waugu i mangitou uahahatton Yusuf ringannu mappaattu sangkatou mananappasu wisara.

²⁴I Yusuf nanantangngi mangitou, ana see nilumuai. Napawe wotongngete mapagahatto apia, i tou nabelengnga ringanni mangitou, ana see nangehetta si Simeon, wuṛṛu niapaṛṛapussa si tou su saruannu anambon tuṛṛangnge.

²⁵I Yusuf namarenta tadea'u manga karongnga apan niapiddu manga iaangnge lo'roannu gandumma, wuṛṛu roitti mangitou sambau-sambau nitaṛṛo sulal᷊ummu manga karongnga udde. Wuṛṛu lai i mangitou nionggol᷊annu anna maola'a wal᷊unna su amatanna. Parentane udde niraringiṛṛanna.

²⁶Wua'udde manga iaangngi Yusuf nalluranna su keledai mangitou gandumma apan buatte niwallianna udde, ana see inaite nanantangngu tampa udde.

²⁷Su tampa i mangitou nanaṛṛabbi, sangkatou wuassi mangitou namu'a karongngu gandumma wuṛṛu mapaannu keledai. I tou naasangkalla roitta su wowon gandumma udde.

²⁸“Roi'u niapaawelengnga,” auine su manga tuṛṛangnge. “Pa'ellega, indi sulal᷊ummu karongku!” Naungngi mangitou nabbal᷊i nata'utta, wuṛṛu ringannu matta'utta i mangitou ua'aiwal᷊ote, “Apate niola'u Ruata si ite?”

²⁹Su tempo na'omate su Kanaan, i mangitou nabbatti'a su iamangngi mangitou sarangkanambone apan buatte niapendamanni mangitou. Unni mangitou,

³⁰“Gubernuren Mesir mabbisara ringannu maṛṛagissa si yami wuṛṛu mangngansilla si yami mattataṛṛaso'o wanuane.

³¹Yami sinumimbaka, ‘Yami taumata mapia, wal᷊ine mattataṛṛaso'o, yami taumata matul᷊idda.

³²Yami sarangkanambone mapul᷊o dua sangkatuṛṛangnga, ana'u iamangnga sambau, wuṛṛu sangkatou natete, wuṛṛu iapa ṛembonne poi ringannu iamangnga su Kanaan.’

³³Gubernure udde nabbisara, ‘I ya'u maapulu mattiala si yamiu tadea'u maasingkatta tanne i yamiu taumata matul᷊idda. Sangkatou wuassi yamiu ṛinone matana'a, ingana'a waine wotongngete mapul᷊e mangapiddu gandumma su amonannu apan tantal᷊anna uatataṛṛangnga lunussa.

³⁴Napawe i yamiu mabelengnga uaapiddu tuarin kamiu ṛembonne, i ya'u sarun maasingkatta manungku i yamiu wal᷊ine matataṛṛaso'o, ewe'e taumata matul᷊idda. Ne tuṛṛangngu apan tinaṛṛangangku udde sarun ta'u iwelengnga si yamiu wuṛṛu i yamiu wotongnge matana'a su wanua indi wuṛṛu walate apulu mabbal᷊u'a.’ ”

³⁵Wua'udde, napawe i mangitou nallal᷊innu manga karongngi mangitou, i mangitou naasomba tampan doitti mangitou sambau-sambau lal᷊oṛṛoannu roitta; ana see i mangitou lembon matta'utta, see iamangngi mangitou lai.

³⁶Ana see iamangngi mangitou nabbisarate, “Ete i yamiu naaola'a si ya'u niawul᷊iannu ana'u. I Yusuf tate baddi'a lai; i Simeon tate baddi'a lai; wuṛṛu orassa indi yamiu lai mangapiddi Benyamin. Wal᷊ine hampa asasusa'u!”

³⁷Ana see i Ruben nabbisara iamangnge, “Tantil᷊a'e i Benyamin si ya'u, i Papa; sarun ta'u iapidda apia, amungkangngu tawe, i Papa wotongnge mamate ana'u esakka darua udde.”

³⁸Arawe i Yakub nabbisara, “Tawe! I Benyamin tawe wotongnge iapididi yamiu; iaangnge natete wuṛṛu orassa indi ete i tou apan ta'e wiakka. Aṛṛengenne i tou maasomba asasilaka su amatanna udde. I ya'u indi timmadete, wuṛṛu asasusa apan niapiddi yamiu si ya'u udde sarun mandantan papate'u.”