Read Talaud PANDARIADDI 44 Bible Online

PANDARIADDI 44 - Talaud bible

PANDARIADDI 44

¹Tantal᷊anna udde i Yusuf namarenta su tembonannu amonanne, “Loṛṛoiten gandumma karongngu manga taumata udde, suapan botongnge iaapiddi mangitou, wuṛṛu taṛṛoa'a roittu sangkatou-sangkatou sulal᷊ummu karongnga su wowon gandumma udde.

²Taṛṛoa'a lai piala sal᷊aa'u sulal᷊ummu karongngu tuari mangitou ṛembonne, suadio'a ringannu roitta wawaekka gandummi tou.” Mangangimbe udde tinumuṛṛutte parenta udde.

³Su allo tiṛṛabbine, maṛṛanggapa atonna, i Yusuf nattal᷊ei manga tuṛṛangnge, ana see i mangitou inaite ringannu keledai mangitou.

⁴I mangitou taambe marau wuassu soa udde, su tempo i Yusuf nabbisara su tembonannu amonanna, “Paal᷊ihakka enggene manga taumata udde. Napawe niaenggenante, wal᷊oa'a si mangitou, ‘Anio apapia niwal᷊isanni yamiu al᷊al᷊eo?

⁵Anio i yamiu nanna'o piala sal᷊a'an pussa'an tuangku? Piala udde ipappaanne pa'inumanna wuṛṛu ipanni'atta. I yamiu buatte na'ola'a al᷊al᷊eo apan bahewa!’ ”

⁶Napawe mangangimbe udde na'omate ringannu manga tuṛṛangngi Yusuf, i tou namasingkattu apa apan niwal᷊on i Yusuf.

⁷I mangitou sinumimbakka, “Apa pandumanni Tuangnga? Yami massalu manungku yami tawe na'ola'a aroddi!

⁸I Tuangnga sassane masingkatta manungku roitta apan niasombanganni yami sulal᷊ummu manga karongngi yami su wowon gandumma udde, buatte niapaawelengngi yami si Tuangnga. Nariaddi tawe nanna'o sal᷊a'a ara'e wul᷊awanna, wuassu wal᷊en gubernure!

⁹I Tuangnga, unnu wisara saranapa udde niasombanganna su sangkatou suwallati yami, wala'e i tou iṛṛuumanna mate, wuṛṛu i yami maola'a allangngi Tuangnga.”

¹⁰Mangangimbe udde nabbisara, “Aroddite; arawe tumba'u si tou apan piala udde niasombanganna, ete i tou apan maola'a allangku; ingana'a waine wotongnge mapul᷊e.”

¹¹Ana see ringannu nasasaṛṛawutta i mangitou sambau-sambau nanossokka wuṛṛu namu'a manga karongnge.

¹²Mangangimben i Yusuf udde namarikissa manga karongnga udde ringannu ma'udduppa, nanattakka wuassu karongngi iapa pahul᷊u na'oman sara karongngi iapa ṛembonne, wuṛṛu piala udde niasombanganna sulal᷊ummi karongngi Benyamin.

¹³Manga iaangnge lembon massusa na'oman sara nanggesa'a manga laubbi mangitou. I mangitou nalluranna keledai mangitou wuṛṛu nabelengnga watukku soa.

¹⁴Su tempo i Yehuda wuṛṛu manga tuṛṛangnge na'omate su wal᷊en Yusuf, i tou ta'e isudde, wuṛṛu i mangitou niumal᷊intudda su saruanne.

¹⁵Ne i Yusuf nabbisarate, “Apate niola'i yamiu udde? I yamiu wagga manungku taumata ere i ya'u indi wotongnge maasingkatta inolaannu apan dal᷊eo ringannu wal᷊iimata?”

¹⁶“Yami taweddu ipabbisara, Tuangku?” sasimbakki Yehuda. “Ereapa yami wotongnge mapaasal᷊a wuṛṛu mapaaṛṛinon batanganni yami? MAWU Ruata buatte napal᷊iatta'u pasasal᷊an kami. Orassa indi yami sarangkanambone allangngi Tuangnga, wal᷊ine tumba'u i tou apan niasombanganna piala udde.”

¹⁷Unni Yusuf, “Tawe! I yamiu madiri ma'ola'a aroddi! Tumba'u i tou apan niasombanganna piala udde sarun maola'a allangku. Ingana'a waine wotongngete ringannu iamangngu.”

¹⁸I Yehuda inai nangundanin i Yusuf wuṛṛu nabbisara, “Ampunge, Tuangku, wala'awe allangngu maggahatton Tuangnga. Arie masa'u allangngu; Tuangku ere lai ratu Mesir sassane.

¹⁹I Tuangku buatte naiwal᷊o si yami indi, ‘Apa i yamiu ta'e pia iamangnga ara'e tuṛṛanganga waine?’

²⁰Yami sinumimbakka, ‘Iamangngi yami timmadete wuṛṛu tuarin kami niasungkanga su tempo iamangngi yami uukke matanggake. Iaangnge inangnga sambau wuassu tuarin kami indi natete, nariaddi orassa indi ete i tou apan ta'e wiakka wuassi tarua, wuṛṛu iamangnga lembon marangngu si tou.’

²¹I Tuangku nandolokki yami napaapiddi tou inawarendi, tadea'u i Tuangku wotongnge maasilo si tou,

²²ana see yami sinumimbakka manungku ana'a udde tawe maṛṛae wuassu iamangnge; amungkangu i tou maṛṛae wuassu iamangnge, iamangngi yami sarun mate.

²³Wua'udde i Tuangku nabbisara, ‘I yamiu tawe wotongnge sumaruanna si ya'u apia amungkangngu tawe uaapiddu tuarinu udde.’

²⁴Su tempo yami nabelengnga ringannu iamangngi yami, yami namasingkatta si tou wisaran Tuangku udde.

²⁵Wua'udde iamangngi yami nandolokki yami nirumanta apia inawarendi mamalli anna.

²⁶Yami sinumimbakka, ‘Yami tawe maaranta poiaroddi, ana waugu tawe wotongnge sumaruanna gubernure amungkangngu tuarin kami ṛembonne tawe tumantalongnga. Yami tumba'u wotongnge inai poiaroddi amungkangngu i tou lai iapidda.’

²⁷Wua'udde iamangnge nabbisara, ‘I yamiu masingkatta manungku i Rahel, awingku tumba'u pia duang katou ana'a.

²⁸Iapa pahul᷊une nanantangkute. I tou buatte niaṛṛatu winatangnga mal᷊aṛṛagga, ana waugu sara orassa indi ya'u tate naasilo si tou.

²⁹Amungkangngu i yamiu manganu ana'a ṛembonne indi wuassia'u, wuṛṛu mariaddi asasilaka si tou, asasusa apan niapaarantang kamiu si ya'u udde sarun maawawa papate'u, ana waugu i ya'u indi timmadete.’ ”

³⁰“Ana waugu udde, Tuangku,” unni Yehuda si Yusuf, “amungkangngu allangngu mabelengnga ringannu iamangngi yami tawe uaapiddu tuarin kami udde, yami sarun mate. Niawane ete su ana'a udde, wuṛṛu i tou timmadete atonna na'oman sara asasusa apan iapiddi yami si tou sarun maawawa papatene.

³²Ana see lai allangngu buatte na'ire su iamangngu allangngu manungku allangngu maola'a wataṛṛun ana'a udde. Allangngu nabbisara si tou, manungku amungkangngu allangngu tawe napangapiddu ana'a udde mabelengnga ringanni tou apia, ete allangngu apan mamasanna ṛuumanna su alo'engngu pabbiaṛṛanna.

³³Nariaddi, allangngu sumal᷊ande, Tuangku, walaawe allangngu matana'a isindi maola'a allangngi Tuangku manal᷊i tuaring kami indi; wala'e i tou mapul᷊e suadio'a ringannu manga iaangnge.

³⁴Ereapa allangngu wotongnge mabelengnga ringannu iamangngi yami amungkangngu ana'a udde tawe uaapidda? Allangngu tawe maataṛṛangnga maasilo asasusa apan maṛṛia'a su iamangngi yami udde.”