Read Talaud PANDARIADDI 45 Bible Online

PANDARIADDI 45 - Talaud bible

PANDARIADDI 45

¹I Yusuf tate maataṛṛangnga apendamme su saruannu manga mamanarane. Ana waugu udde i tou nandolokki mangitou nanantangngu tampa udde tadea'u i tou wotongnge mamasingkatta su manga tuṛṛangnge isai i tou ṛinone.

²Napawe manga mamanarane nanantangken tampa udde, i Yusuf nilumuaite ma'ikka-ikkata, na'oman sara manga taumatan Mesir su luddu tampa udde naaringikka, wuṛṛu watti'a udde na'omate su wal᷊en araratuanna.

³I Yusuf nabbisara su manga tuṛṛangnge, “I ya'u indi Yusuf. I Papa ta'e wiakka?” Naasilo udde manga tuṛṛangnge mangke nata'utta atonna na'oman sara tawe naasimbakka.

⁴Ana see i Yusuf nabbisara si mangitou apia, “Wette isindi.” I mangitou nangundani, wuṛṛu i tou nabbisara apia, “I ya'u i Yusuf, apan buatte niwal᷊u'i yamiu su Mesir.

⁵Arie paata'utta ara'e sumassilu watangannu ana waugu i ya'u buatte niwal᷊u'i yamiu. Ṛinone Ruata sassane buatte nangapi'u isindi malliuṛṛoro si yamiu tadea'u manal᷊amatta taumata manambo.

⁶Orassa indi wakkute tonna aruane wuassu tempon ṛutumma, wuṛṛu al᷊annune lima tonna lai taumata tawe mamasolla ara'e mangitingnga.

⁷I ya'u buatte niapiddu Ruata malliu ṛoro wuassi yamiu ana see manal᷊amatta si yamiu ringannu olangnge apan ma'atiangnga indi, wuṛṛu tadea'u maataṛṛangnga asasal᷊ammatti yamiu wuṛṛu maapanassukku pappapulunni yamiu.

⁸Nariaddi, waline i yamiu naaola'a si ya'u isindi, ewe'e Ruata. Ete i Tou na'ola'a si ya'u mammamanaran datu Mesir atanggaṛṛanne. I ya'u tinantil᷊annu taṛṛino su ahewallu amonannu araratuanne wuṛṛu su ahewallu Mesir.

⁹Orassa indi, paal᷊ihakke i yamiu mabelengnga ringannu iamangnga wuṛṛu wal᷊oa'a si tou manungku i Yusuf, anangnge, nabbisara arendi, ‘Ruata buatte na'ola'a si ya'u uataṛṛino su ahewallu Mesir; rantate paal᷊ihakka.

¹⁰I Papa wotongnge matana'a su wageangngu Gosyen, marani'u — iamangnga, ringannu ana'a pulunna, domba, ambinga, sapi wuṛṛu al᷊awo'u darotongngu iamangnga.

¹¹Amungkangngu iamangnga su Gosyen, i ya'u wotongnge mamadul᷊i iamangnga. Tempon ṛutumma al᷊annune ta'e lima tonna lai wuṛṛu i ya'u sarun mangatokka tadea'u iamangnga, amonanna wuṛṛu winatangngi papa tawe asueannu anna.’ ”

¹²I Yusuf nabbisara apia, “Orassa indi yamiu naasilote sassane, i'o lai Benyamin, manungku i ya'u atonna-tonna i Yusuf.

¹³Wal᷊oa'e su iamangngi ite aroddi ahewalle taṛṛino'u isindi, su Mesir, wuṛṛu wattia'a si tou al᷊awo'a apan niasiloanni yamiu. Ana see paal᷊ihakka mangapiddi tou inawarendi.”

¹⁴Wua'udde i tou naṛṛa'uppa si Benyamin, tuarine udde, ana see nilumuai; i Benyamin nilumuai lai apiddu naṛṛa'uppa si Yusuf.

¹⁵Wua'udde, ringannu ta'e lulluai, i Yusuf naṛṛa'uppa anambon tuṛṛangnge wuṛṛu nangari'a si mangitou. Wua'udde i mangitou uahahattote ringanni tou.

¹⁶Napawe su wal᷊en araratuannu ratu niaringikka manungku manga tuṛṛangngi Yusuf nirumanta, ratu wuṛṛu manga mamanarane lai mal᷊uassa naungnge.

¹⁷Ana see ratu nabbisara si Yusuf, “Doloṛṛa'e manga tuṛṛangngu udde malluranna keledai mangitou ringannu gandumma wuṛṛu paapul᷊ea'e watukku Kanaan

¹⁸tadea'u mangal᷊appa iamangngu wuṛṛu amonanni mangitou ana see pangingkatte inawarendi. I ya'u sarun mangonggola si mangitou leta'a apan apianne su Mesir, wuṛṛu i mangitou wotongnge mabiakka ringannu nasuungnga wuassu hessin leta'a udde.

¹⁹Doloṛṛa'e lai i mangitou wua'isindi mangapiddu manga pira kereta palluranannu awingnga wuṛṛu manga ana'i mangitou apan ta'e maradio'a, wuṛṛu pallarunannu iamangngi mangitou.

²⁰I mangitou salaiwe tate maṛṛingiddu manga saranapa mangitou apan natantangnga, ana waugu apan apianne su ahewallu Mesir sarun mabbal᷊i pussa'a mangitou.”

²¹Manga al᷊aṛṛana'i Yakub tinumuṛṛutta parentan ratu udde. I Yusuf nangonggolu manga pira kereta si mangitou, ere buatte nirolokku ratu, wuṛṛu lai wal᷊unna su amatanna.

²²I tou lai nangonggola si mangitou sangkatou-sangkatou samparassa laubba wakku, arawe si Benyamin, i tou nangongglu tallu ṛasutta roitta sal᷊a'a wuṛṛu liman parassa laubba wakku.

²³I tou lai napaapidda su iamangnge mapul᷊o keledai apan lal᷊uranannu manga saranapa apianne wuassu Mesir, wuṛṛu mapul᷊o keledai lai lal᷊uranannu gandumma, roti wuṛṛu anna waine apan annananna su amatanna watukku Mesir.

²⁴Wua'udde i tou napaamate manga tuṛṛangnge, apiddu nabbisara si mangitou, “Imbaṛṛangnga matatiakka su lal᷊anna.”

²⁵I mangitou nanantangken Mesir wuṛṛu napule watukku Kanaan ringanni Yakub iamangngi mangitou.

²⁶“I Yusuf ta'e wiakka!” unni mangitou si tou. “I tou uataṛṛino ahewallu Mesir!” Naaringikka watti'a udde, i Yakub niagukke, wuṛṛu tawe mangimanna si mangitou.

²⁷Arawe napawe i mangitou nabbatti'u sarangkanambone apan niwisaran Yusuf si mangitou, wuṛṛu napawe i tou naasilo kereta apan niapaapiddi Yusuf iapaal᷊appa wuṛṛu iapaapiddi tou watukku Mesir, i tou natimpu'ote wuassu ṛingiranne.

²⁸“Ana'u Yusuf ta'e wiakka!” wisarane. “Tumba'u udde apan ipaapulu'u! I ya'u sarun inai wuṛṛu ma'ellega si tou tantal᷊anna i ya'u taambe nate.”