Read Talaud PANDARIADDI 46 Bible Online

PANDARIADDI 46 - Talaud bible

PANDARIADDI 46

¹I Yakub nandiahite al᷊awo'u pussaane ana see inaite. Na'oma su Bersyeba i tou nangonggolu sasamba su Ruata apan sassubanni Ishak iamangnge.

²Sulal᷊ummu sambau aellega su tempo ṛabbi, Ruata nabbisara si tou, “I Yakub, i Yakub!” “I ya'u, Mawu,” sasimbakke.

³“I Ya'u Ruata, Ruata apan sassubbannu iamangngu,” wisara-Ne. “Arie pa'ata'utta inai watukku Mesir. I Ya'u sarun mandiadi papapulunnu balahanna apan bahewalla poiaroddi.

⁴I Ya'u sarun tumantalongnga si'o watukku Mesir, wuṛṛu mangapiddu papapulunnu mabelengnga apia su wanua indi. I Yusuf sidutu su sandiṛṛannu napawe papatenu nia'omanna.”

⁵Ana see i Yakub nanantangken Bersyeba. Al᷊aṛṛanangnge nallurannu iamangngi mangitou see ana'a awingngi mangitou su kereta apan nionggolu ratu Mesir.

⁶I mangitou lai nangapiddu winatangnga papadul᷊iananna wuṛṛu al᷊awo'u darotongnga apan niasombanganni mangitou su Kanaan, ana see inaite watukku Mesir. I Yakub nangapiddu papulunne sarangkanambone, eteudde

⁷anambon ana'a pulunne esakka wuṛṛu wawine.

⁸Manga amonanni Yakub apan tinumantalongnga watukku Mesir eteudde;

⁹i Ruben, ana'a pahul᷊u; manga anangnge: i Henokh, i Palu, i Hezron wuṛṛu i Karmi.

¹⁰I Simeon, manga anangnge: i Yemuel, i Yamin, i Ohad, i Yakhin, i Zohar wuṛṛu i Saul ana'a wuṛṛu awingnge sangkatou wawinen Kanaan.

¹¹I Lewi; manga anangnge: i Gerson, i Kehat wuṛṛu i Merari.

¹²I Yehuda; manga anangnge: i Syela, i Peres wuṛṛu i Zerah, wuṛṛu ana'i Yehuda waine, eteudde i Er wuṛṛu i Onan nate su Kanaan. Manga ana'i Peres: i Hezron wuṛṛu i Hamul.

¹³I Isakhar; manga anangnge: i Tola, i Pua, i Ayub wuṛṛu i Simron.

¹⁴I Zebulon; manga anangnge: i Sered, i Elon wuṛṛu i Yahleel.

¹⁵I mangitou sarangkanambone udde ana'a apan niasungkangi Lea si Yakub su Mesopotamia, wal᷊ine wua isudde lai anangnge wawine aranne i Dina. Nariaddi papapulunni Yakub wuassu awingnge i Lea sarangkanambone tallun pul᷊o talu su atoune.

¹⁶I Gad; manga anangnge: i Zifyon, i Hagi, i Syuni, i Ezbon, i Eri, i Arodi wuṛṛu i Areli.

¹⁷I Asyer; manga anangnge; i Yimna, i Yiswa, i Yiswi wuṛṛu i Beria wuṛṛu i Serah, wawinen mangitou. Manga ana'i Beria eteudde i Heber wuṛṛu i Malkiel.

¹⁸I Sire mapul᷊o annumma su atoune udde papapul᷊unni Yakub wuassi Zilpa, eteudde allangnga wawine apan nionggoli Laban si Lea, anangnge wawine.

¹⁹I Rahel awingngi Yakub uatahuanna darua ana'a, eteudde i Yusuf wuṛṛu i Benyamin.

²⁰Su Mesir i Yusuf naasomba ana'a darua, eteudde i Manasye wuṛṛu i Efraim apan niasungkangngu awingnge i Asnat, ana'i Potifera, apan uaagassa manara imam su Heliopolis.

²¹I Benyamin; manga anangnge; i Bela, i Bekher, i Asybel, i Gera, i Naaman, i Ehi, i Ros, i Mupim, i Hupim wuṛṛu i Ared.

²²Siri mapul᷊o appatta uddewe papapulunni Yakub wuassu awingnge i Rahel.

²³Manansunna i Dan; anangnge i Husim.

²⁴I Naftali; manga anangnge; i Yahzeel, i Guni, i Yezer wuṛṛu i Syilem.

²⁵Siri pitu uddewe papulunni Yakub wuassi Bilha, allangnga wawine apan nionggoli Laban si Rahel anangnge.

²⁶Papapulunni Yakub apan nabatukku Mesir sarangkanambone annumu pul᷊o annumma su atoune, tawe nasutta manga mananambone.

²⁷Al᷊aṛṛana'i Yusuf apan nasungkanga su Mesir ruan katou, na'oman sara amonanni Yakub su Mesir sarangkanambone pitun pul᷊o su atoune.

²⁸I Yakub nandolokki Yehuda niumamatta malliu ṛoro iapawago si Yusuf tadea'u maisasomban iamangnge su Gosyen. Napawe i mangitou na'omate su Gosyen,

²⁹I Yusuf sinuma'e kereta inai maisasomban iamangnge isudde. Su tempo i mangitou nassomba, i Yusuf naṛṛa'uppa iamangnge wuṛṛu mal᷊annu lulluai.

³⁰I Yakub nabbisara si Yusuf, “Orassa indi ya'u maapulute mate, ana waugu buatte naasilo wuṛṛu naasingkatta manungku i'o ta'e wiakka.”

³¹Ana see i Yusuf nabbisara manga tuṛṛangnge wuṛṛu manga ana'u tuṛṛangnge waine, “I ya'u inaite wuṛṛu mamasingkatta su ratu manungku manga tuṛṛangku wuṛṛu manga ana'u tuṛṛangku apan uatana'a su Kanaan nirumantate.

³²I ya'u sarun mabbal᷊o manungku i yamiu manga mallal᷊u'adda domba wuṛṛu sapi, wuṛṛu uaapidden manga winatangnga wuṛṛu al᷊awo'u pussa'ang kamiu.

³³Amungkangu ratu mamago si yamiu wuṛṛu maiwal᷊o manaranu,

³⁴wal᷊oa'a si tou manungku i yamiu indi mamamadul᷊i winatangnga ro'en ta'e maradio'a, naal᷊ihidda al᷊amonan kamiu. Ringannu aroddi tou sarun mandolokki yamiu matana'a su wageangngu leta'u Gosyen.” I Yusuf namasingkatu olangnge udde ana waugu taumatan Mesir mammendamma addio'a maggahawen manga mallal᷊u'adda winatangnga.