Read Talaud PANDARIADDI 49 Bible Online

PANDARIADDI 49 - Talaud bible

PANDARIADDI 49

¹Wua'udde i Yakub namago manga anangnge wuṛṛu nabbisara, “Paammule isindi, marani'u. I ya'u sarun mamasingkatta si yamiu apa sarun apendamanni yamiu su allon sal᷊immurine;

²Pa'ammule, manga ana'i Yakub, Paddaringikke si Israel, iamangngu.

³I Ruben, ana'u pahul᷊une, ete i'o auatangku, wua paarorone wuassu atatoha'u. I'o awaṛṛanianne wuṛṛu atohasanne su wallatu anambon ana'u.

⁴I'o hampa umio'a naal᷊ihidda ua'e, na'oman sara wal᷊inewe paarorone; ana waugu i'o natiilla ringannu awingku waine, i'o na'ola'a angngo su tatiil᷊annu iamangngu.

⁵I Simeon wuṛṛu i Lewi sangkatuṛṛangnga; ahiddi mangitou araṛṛagissa.

⁶I ya'u maddiri tomantalongnga ammul᷊annu pa'aire mangitou, aroddi lai tawe su ammul᷊anni mangitou. Ana waugu i mangitou mammate sulal᷊ummu asasa'u, napaal᷊omen sapi waugu lal᷊umanna'a.

⁷Niawontohante asasa'u mangitou, ana waugu ete pia lembone. Niawontohante asasa'u mangitou ana waugu tumaniten maṛṛagissa. I ya'u sarun mapaatal᷊ei mangitou su ahewallu Israel. I ya'u sarun manal᷊iawukki mangitou su wallatu anambon balahanna.

⁸I Yehuda i'o sarun tumambo manga seennu; manga tuṛṛangngu sarun maddalo si'o wuṛṛu umal᷊intudda su saruannu.

⁹I Yehuda naal᷊ihidda singa saṛṛen tumuwo; i tou namate seenne, ana see nabelengnga su sal᷊akke; i tou nagaṛṛuannata ana see nilumallowanga, wuṛṛu tawe saran sangkatou apan baṛṛani manal᷊asa'i tou.

¹⁰I Yehuda sarun mangagassa ta'innu araratuanna, papapalunne sarun mamarenta saran mal᷊annu-l᷊annu. Manga walahanna sarun mangapiddu aonggolla, wuṛṛu umal᷊intudda ringannu uasuṛṛubbawa su saruanne.

¹¹Ana'u keledaine ni'iitti tou su punnu alu, punnu anggore apan apianne. I tou mabbansalla laungnge ringannu anggore, anggore maṛṛamu naal᷊ihidda daṛṛa.

¹²Matane maṛṛamu ana waugu na'inumma anggore, isine mawira ana waugu na'inumma susu.

¹³I Zebulon sarun mamanua su winggin tahal᷊oangnga; manga apalla sarun mabbal᷊ango su appanne; naddatinggu Sidon passarannu wageangnge.

¹⁴I Isakhar naal᷊ihidda keledai matohassa apan ual᷊allowangnga su wallatu so'annu winabbawane.

¹⁵I tou na'ellega aroddi apiane tampa udde wuṛṛu aroddi aṛṛamage wanua udde, ne i tou niumaru'ute mal᷊uassa iapapasanna, wuṛṛu niwata'a iapamanara ere allangnga.

¹⁶I'o Dan, sarun makkuungngu walahannu sassane i'o sarun maola'a ṛuanganna ere ṛuanganna waine su Israel.

¹⁷I'o naal᷊ihidda atoanna su wiwikku lal᷊anna, atoanna mawisa su winggin dal᷊anna addio'a apan nangi'i paallu awal᷊o na'oman sara nawareta sumasa'ene.

¹⁸Oh MAWU, asasal᷊amatta apan buatte nianggola, ete udde ta'u raṛṛaddoanna.

¹⁹I Gad, i'o sarun pangaloannu mangangaṛṛo, ewe'e i'o mawal᷊i'a mangaṛṛo si mangitou.

²⁰I Asyer, wiakku mangke manambo wuṛṛu mangkapia, i'o sarun manaddia wiakku manga ratu.

²¹I Naftali, naal᷊ihidda rusa napallossa, mangkaṛṛamaga al᷊aṛṛanangnge.

²²I Yusuf naal᷊ihidda keledai saṛṛen tumuwo keledai matengnga maranin al᷊imatang kua'e, tuttatal᷊angnga su sendekku wowone.

²³Seetta mammangalo ringannu araṛṛaggissa, nangenggenna si tou ringannu papiti'a wuṛṛu anaanna.

²⁴Arawe i Yusuf sidutu matohassa ta'iakke, sidutu matohassa anaanne, ana waugu taṛṛinon Mallal᷊u'adda Lembon Matohassa, Ruatan i Yakub, Mamamadul᷊in Israel.

²⁵Ruatan iamangngu nantul᷊ungngu; Apan Lembon Taṛṛino nangal᷊amatta si'o ringannu uranna wuassu langitta wuṛṛu ua'e wuassu wantan leta'a. Ringannu ana'a wuṛṛu sapi,

²⁶gandumma wuṛṛu wunga. Al᷊amattu Ruatan iamangngu nangillembo wuassu pa'a'ala manga wowone apan timmadete. Antimanna umonto'e anambon al᷊amatta udde su wowon puan i Yusuf, su wowon pakkanne. Ete i tou apan apianne su wallatu manga tuṛṛangnge.

²⁷I Benyamin uddewe serigala mal᷊aṛṛaga. Su tempo marua allo i tou mannametta pabbawiakke. Su tempo ṛabbi i tou mattahia ina'ul᷊ene.”

²⁸Eteudde mapul᷊o dua ṛuangannu Israel, wuṛṛu manga wisara apan niwisaran iamangngi mangitou napawe nangonggolu tabbean patatal᷊ei si mangitou sambau-sambau.

²⁹Wua'udde i Yakub nananata manga anangnge, “Tate mal᷊annu lai ya'u sarun mapul᷊e ere al᷊amona'u. I ya'u labbinga'a su sandiṛṛanni mangitou sulal᷊ummu liangnga su Makhpela, su samba'an da'i Mamre su leta'u Kanaan. I Abraham buatte namalli liangnga wuṛṛu wawail᷊anna maranine wuassi Efron taumatan Het maola'a pallabinganna.

³¹Isudde nilabbingnga i Abraham wuṛṛu i Sara, i Ishak wuṛṛu i Ribka; wuṛṛu isudde lai pia labbingngi Lea.

³²Wawail᷊anna wuṛṛu liangnga isudde buatte niwallianna wuassu taumatan Het. I ya'u labbinga'e isudde.”

³³Napawe i Yakub buatte nananata su manga anangnge, i tou nilumallowangke ana see natete.