Read Talaud PANDARIADDI 50 Bible Online

PANDARIADDI 50 - Talaud bible

PANDARIADDI 50

¹I Yusuf natingkaṛṛa'an batanganne su iamangnge apiddu lulluai wuṛṛu nangari'a hatine.

²Ana see i Yusuf namarenta taṛaṛa ola'a winal᷊unanna tawe mawukku'a iapa rampa-rampa winal᷊unanni Yakub.

³Manara udde al᷊annune appatu pul᷊o su allone, eteudde su tempo apan inanaramanna iappaatta ma'ola'a rampa-rampa winal᷊unanna. Taumata Mesir nilumal᷊on i Yakub, pitun pul᷊o su allone al᷊annune.

⁴Napawe nasuete tempon lullal᷊o, i Yusuf nabbisara su manga mamanaran araratuanna, “Wal᷊oa'a tanata indi su ratu,

⁵‘Su tempo iamangngu allanga maranite mate, allangngu nirolokka massalu si tou, manungku allangnga sarun mallabingngi tou sulal᷊ummu labingnga apan buatte niola'a su leta'u Kanaan. Ana waugu udde, wala'awe allangngu inai mallabingngu iamangngu allangnga. Wua'udde allangnga sarun mabelengnga.’ ”

⁶Ana see ratu nabbisarate, “Roote pallabingngu iamangngu ere buatte nipa'irenu si tou.”

⁷Ana see i Yusuf inaite mallabingngu iamangnge. Anamabon mamanaran araratuanna, manga timma-timmadu araratuanna wuṛṛu anambon tembonannu Mesir, inai suadio'a ringanni Yusuf.

⁸Amonanne, tuṛṛa-tuṛṛangnge, wuṛṛu ana'u tuṛṛangnge waine inai lai. Tumba'u ana'a maradio'a wuṛṛu winatangngi mangitou tinantangnga su leta'u Gosyen.

⁹Tantara apan uasa'e kereta wuṛṛu awal᷊o tinumantalongnga lai, na'oman sara mallal᷊aṛṛenggenna udde mal᷊o'engnga atonna.

¹⁰Napawe i mangitou na'omate su tampan taumata mammuulla gandumma su Goren-Haatad, su samba'an ra'in Sal᷊ukku Yordan, i mangitou nilumallu ringannu massusa wuṛṛu tingikka ma'ikkata. I Yusuf na'ola'a lal᷊aghun lullal᷊o, pitu allo al᷊annune.

¹¹Su tempo manga tumana'u Kanaan naasilo lal᷊alo su Goren-Haatad udde, i mangitou nabbisarate, “Asusawe eteapa lal᷊aghun lal᷊alon taumata Mesir udde!” Ana waugu udde tampa udde nissago Abel-Mizraim.

¹²Etearoddi manga ana'i Yakub tinumuṛṛutta tanatan i Yakub si mangitou.

¹³I mangitou nangapiddu winal᷊unanne watukku Kanaan wuṛṛu nilabingnga su liangngu Makhpela, su samba'an da'i Mamre, su wawail᷊anna apan buatte niwallianni Abraham wuassi Efron taumatan Het udde, apan maola'a pallal᷊abinganna.

¹⁴Napawe i Yusuf buatte nallabingngu iamangnge, i tou nabelengke waatukku Mesir suadio'a ringannu manga tuṛṛangnge wuṛṛu anambon taumata apan uatantalongnga si tou nallabingngu iamangnge udde.

¹⁵Napawe iamangngi mangitou natete, manga iaangngi Yusuf nabbisara, “Ereapate amungkangngu i Yusuf mangune wuṛṛu ma'apulu mabbal᷊issa al᷊al᷊eong kite dorone?”

¹⁶Ana waugu i tou napaapiddu tanata indi si Yusuf, “Tantal᷊anna iamangngi ite taambe nate,

¹⁷i tou nandolokki yami iapawal᷊o si'o arendi, ‘Ampungewe pasasal᷊a dorone apan niola'u manga iaangngu si'o.’ Nariaddi, naola'a manga allangngu Ruata apan sassubannu iamangngi ite, yami sumal᷊ande, ampungewe pasasal᷊a apan buatte niola'i yami.” I Yusuf nalluai napawe naasengkamma tanata udde.

¹⁸Ana see manga tuṛṛangnge sassane nirumanta wuṛṛu niumal᷊intudda su sandiṛṛanne apiddu nabbisara, “Yami indi allangngu.”

¹⁹Arawe i Yusuf nabbisara si mangitou, “Arie pa'ata'utta; ana waugu i ya'u tawe mapaṛṛuumanna naal᷊ihidda Ruata.

²⁰I yamiu buatte nabbaidda ma'ola'a al᷊al᷊eo si ya'u, arawe Ruata namal᷊u al᷊al᷊eo udde nabbal᷊i apapia, tadea'u apa apan nariaddi paarorone udde maasalamatta anambon taumata apan mabbiakka orassa indi.

²¹Arie passinggawangnga. I ya'u sarun manuungngu hausanni yamiu wuṛṛu al᷊aṛṛana'i yamiu.” Etearoddi i tou napaatammudu naungngi mangitou ringannu manga wisara apan masaṛṛionto'a, na'oman sara i mangitou naluasse.

²²I Yusuf sidutu uatana'a su Mesir ringannu manga tuṛṛangnge; i tou nabbiakka na'oman sara uukke maṛṛasutta mapul᷊o su tonnane.

²³I tou ta'e naasilo ana'a pulunni Efraim. I tou lai ta'e napabbuwunna manga ana'i Makhir, eteudde pulunni Manasye, naola'a anangnge sassane.

²⁴Wisarane su manga tuṛṛangnge, “Papate'u maranite, arawe Ruata sarun sidutu mammadul᷊i si yamiu wuṛṛu mamiaṛṛa'i yamiu sumabangnga wuassu wanua indi, watukku wanua apan buatte pina'ire-Ne ringannu sasalu si Abraham, i Ishak wuṛṛu si Yakub.”

²⁵Ana see i Yusuf nandolokku anambon ana'u tuṛṛangnge massalu, wisarane, “Pa'irete si ya'u, manungku napawe Ruata mamiaaṛṛa'i yamiu watukku wanua udde, i yamiu lai sarun mangapiddu winal᷊unangku.”

²⁶Wua'udde i Yusuf natete su Mesir su uukka maṛṛasutta mapul᷊o su tonnane. I mangitou namuraten rampa-rampa su winal᷊unanne wuṛṛu niaddo su wasungnga.