Read Talaud PANDARIADDI 8 Bible Online

PANDARIADDI 8 - Talaud bible

PANDARIADDI 8

¹Ruata tawe maabul᷊in Nuh wuṛṛu al᷊awo'u winatangnga su sampunna ringanni tou sulal᷊ummu apalla udde. Ruata napatiuppu anginna, na'oman sara ua'e udde mannatakke u'eṛṛotta.

²Anambon al᷊imatan ua'e su wantan dunia wuṛṛu al᷊awo'u sasabangannu ua'e su langitta niṛṛapingan-Ne. Uranna naddote,

³wuṛṛu ua'e mabbawote. Napawe nal᷊iudde 150 su allone, ua'e tate tumaniten mal᷊al᷊umma.

⁴Su allo appul᷊one pitu wul᷊anna appitune, apalla udde nisiladde su sambau puiddu panenteannu Ararat.

⁵Ua'e sidutu u'eṛṛotta wuṛṛu su allo paarorone wul᷊anna appul᷊one, manga puiddu wowone ia asilote.

⁶Napawe appatu pal᷊o su allone nal᷊iudde, i Nuh namu'a sambau sungketu apalla,

⁷wuṛṛu namallossu sambau manu'a gagak. Manu'a udde tawe nabelengnga su apalla, ewe'e sidutu tuttalla'a mammal᷊iwutta na'oman sara ua'en manawangnga udde neṛṛota atonna.

⁸Tantal᷊anna udde i Nuh namallossu sambau manu'a merpati tadea'u maasingkatta tanne ua'e neṛṛote ara'e taambe.

⁹Arawe ana waugu ua'e ta'e maṛṛammon dunia, manu'a merpati udde tawe naasomba arumanne. Ne i tou nabelengke su apalla; i Nuh nanogokku limane ana see i tou niapasuttate.

¹⁰I Nuh nallaṛṛado pitu allo lai, ana see namallossu manu'a merpati udde apia.

¹¹Su wawallone manu'a udde nabelengnga ringanni tou uaapiddu sangkul᷊appa rongngu zaitun ta'e wakku su sasumigge. Orassa udde i Nuh naasingkatta manungku ua'e neṛṛotte.

¹²Napawe naṛṛaddo pitu allo lai, i tou namallossu merpati udde paasa lai; wuṛṛu paassa udde manu'a udde tate nabelengnga ringanni tou.

¹³Su tempo i Nuh uukke 601 su tonnane, su allo paarorone wul᷊anna paarorone, ua'e mangke neṛṛote atonna. I Nuh namilassa atuppu apalla udde, wuṛṛu na'ellega uapal᷊iwutta si tou. I tou naasilo manungku leta'a mamarate.

¹⁴Su allo ruan pul᷊o pitu wul᷊anna aruane, runia namarate.

¹⁵Ana see Ruata nabbisarate si Nuh,

¹⁶“Sabbangke wuassu apalla udde ringannu awingngu, al᷊aṛṛanangngu wuṛṛu manga awingngi mangitou.

¹⁷Paasabanga'e al᷊awo'u manu'u winalanganna wuṛṛu winatangnga waine, wahahewalla ara'e maradio'a, tadea'u i mangitou wotongnge maṛṛite wuṛṛu massal᷊iawukka su ahewallu runia.”

¹⁸Ana see i Nuh sinumabbangke wuassu apalla udde suadio'a ringannu awingnge, al᷊aṛṛanangnge wuṛṛu manga awingngi mangitou.

¹⁹Anambon manu'u winalanganna wuṛṛu winatangngu ammaranne sinumabbangnga wuassu apalla udde, sambau-sambau tumuṛṛuutu walahanne.

²⁰I Nuh napararisikku sambau mezbah hunan MAWU. I tou nanganu sambau su wallattu manu'u winalanganna wuṛṛu winatangnga waine apan tawe ipappalli, ana see nionggolla su MAWU naola'a sambau sasamba itattambunna su wowon mezbah udde.

²¹Hal᷊urun sasamba apan mawangngi udde naal᷊uassa naungngu MAWU, wuṛṛu i Tou nabbisara sulal᷊ummu naungnga, “I ya'u tate lai mamontoga runia indi ana waugu inolaannu taumata; i Ya'u masingkatta manungku ro'en i tou ta'e dario'a, ṛingirannu taumata udde lal᷊eo. I ya'u tate saran paassa mamate alawo'u riadianna wiakka naal᷊ihidda ere buatte Ta'u niola'a indi.

²²Tantal᷊anna ta'e pia dunia indi, sidutu pia tempo mangasi'a wuṛṛu tempo mangitingnga, tempo masunge wuṛṛu tempon padissa, tempo mamara wuṛṛu tempo manguranna, allo wuṛṛu ṛabbi.”