Read Talaud PANDARIADDI 9 Bible Online

PANDARIADDI 9 - Talaud bible

PANDARIADDI 9

¹Ruata nangal᷊amatta si Nuh wuṛṛu al᷊aṛṛanangnge lapiddu nabbisara, “Pabbalage ringannu manambo, tadea'u papapulunnu mamanua su ahewallu runia.

²Al᷊awo'u manu'u winalanganna wuṛṛu inassa see lai manga winatangnga waine sarun mata'unnu. I mangitou sarangkanambone sulal᷊ummu taṛṛinonu.

³Sarangkanambone udde wotongnge maola'a annu, ere lai manga sasuanna ma'elomma; sarangkanambone Ta'u ionggolla si'o maola'a annu.

⁴Tumba'u sambau apan tawe wotongnge annananni yamiu eteudde ṛemessa apan ta'e pia daṛṛane, ana waugu niawane udde ta'e sulal᷊ummu daṛṛa.

⁵Suapan taumata wuṛṛu winatangnga apan namate taumata sarun Ta'u iṛṛuumanna pateanna.

⁶Taumata niola'a lihidde ere i Ya'u; ana waugu udde, isai-sai apan mamate taumata, i tou sassane sarun pateannu taumata lai.

⁷Ore, i yamiu rinone mabbalaga manambo, tadea'u papapulunnu mamanua su ahewallu runia.”

⁸Ruata nabbisara si Nuh wuṛṛu al᷊aṛṛanangnge,

⁹“Orassa indi i Ya'u ma'ola'a paaire ringanni yamiu wuṛṛu ringannu papapulunnu,

¹⁰wuṛṛu ringannu al᷊awo'u riadianna apan hiakka, eteudde manga manu'u winalanganna wuṛṛu anambon binatangngu amaranne, ore sarangkanambone apan sinumabbangnga wuassu apalla udde suadio'a ringanni yamiu.

¹¹Indiwe paaire-U si yamiu; i Ya'u ma'ire manungku al᷊awo'u riadianna apan biakka tate lai pateannu manawangnga. Tate lai manawangnga apan mangammon dunia indi.

¹²Maola'a sambau tatialan paaire saran mal᷊annu-l᷊annu, apan Ta'u olaanna ringanni yamiu wuṛṛu ringannu al᷊awo'u riadianna apan biakka,

¹³ne Ta'u iaddo randipakka ara'e naggialo su winabbawa maola'a sambau tatialan paaire-U ringannu runia.

¹⁴Suapan tempo, napawe i Ya'u mallindumma langitta ringannu winabbawa, ana see randipakka ara'e naggialo udde asiloanna,

¹⁵i Ya'u sarun mannaungnga pa'aire-U si yamiu wuṛṛu su al᷊awo'u riadianna biakka, eteudde manungku manawangnga tate lai mamate al᷊awo'a apan wiakka.

¹⁶Napawe randipakka asiloanna su winabbawa, i Ya'u sarun ma'ellega wuṛṛu mannaungnga paaire-U sarangkal᷊o'enge ringannu al᷊awo'u riadianna wiakka su runia.

¹⁷Eteudde tatialan pa'aire-U apan Ta'u nionggolla su al᷊awo'u riadianna apan biakka su runia.”

¹⁸Al᷊aṛṛana'i Nuh apan nasossokka wuassu apalla eteudde i Sem, i Yafet wuṛṛu i Ham. (I Ham uddewe yamangngi Kanaan.)

¹⁹Siri tallu ana'i Nuh uddewe naola'a yupungngu al᷊amonan anambon taumata su runia.

²⁰I Nuh sangkatou mabbawailla, wuṛṛu ete i tou apan paarorone na'ola'a waillu anggore.

²¹Napawe i Nuh na'inumma anggore, i tou niwu'anne. Niluatta laungnge ana see i tou natiilla tantol᷊e sulal᷊ummu rasanne.

²²Napawe i Ham, eteudde yamangngi Kanaan, naasilo manungku yamangnge tantol᷊e, i tou sinumabbangnga wuṛṛu namasingkattu olangnge udde su tuṛṛangnge ruan katou.

²³Wua'udde i Sem wuṛṛu i Yafet nanganu sambau jubah wuṛṛu niwatadda su wambangngi tarua. I tarua niumamatta uatal᷊iudda sinumutta su rasanna udde wuṛṛu nangoossa yamangnge ringannu jubah udde. Itarua namiṛṛingngu hati tadea'u tawe maasilo yamangngi mangitou apan uatantol᷊e udde.

²⁴Napawe i Nuh natimpu'ote wuassu wu'anne wuṛṛu naasingkatta pallal᷊agun ana'a ṛembone su watanganne,

²⁵i tou nabbisara, “Niawontohante i Kanaan! I tou sarun maola'a allangnga al᷊aleoanne su manga tuṛṛangnge.

²⁶Paddalote MAWU, Ruatan Sem! I Kanaan sarun maola'a allangngi Sem.

²⁷Antimanna Ruata mangonggollu al᷊amatta si Yafet ringannu manggewalla tampa atatanaanne. Antimanna pappulunne mamanua suadio'a ringannu papapulunni i Sem. I Kanaan sarun maola'a allangngi Yafet.”

²⁸Napawe wua nammanawangnga udde, i Nuh ta'e nabbiakka 350 su tonnane lai.

²⁹I tou nate su uukka 950 su tonnane.