Read Talaud 2 SAMUEL 1 Bible Online

2 SAMUEL 1 - Talaud bible

2 SAMUEL 1

¹Napawe i Saul natete, i Daud nabelengke wuassu pangalo namaddon taumatan Amalek, ana see natana'e su Ziklag rua allo al᷊annune.

²Tiṛṛabbine, nirumantate sangkatou umbasanna wuassu paddasananni Saul. Maola'a tatiala lullal᷊o i tou nanggesa'a laungnge wuṛṛu nangaddon leta'a su wowon puane. I tou inaite ringanni Daud wuṛṛu niumal᷊intudda su saruanne.

³I Daud naiwal᷊o si tou, “Wuassuapa i'o?” I tou sinumimbakka, “Allangngu naatal᷊angnga wuassu paddasanannu taumatan Israel.”

⁴I Daud naiwal᷊o, “Wattia'e apa apan buatte nariaddi!” Umbasanna udde sinumimbakka, “Tantaran kami tinumal᷊angnga wuassu pangalo, wuṛṛu manambo apan nate, nasutta lai i Saul wuṛṛu i Yonatan.”

⁵“Ereapa i'o naasingkatta?” aiwal᷊on Daud si tou.

⁶I tou sinumimbakka, “Allangngu nassuhanne isudde su Wowon Gilboa, ana see naasilo si Saul uasandakka su sambeangnge, wuṛṛu manga kereta see lai tantaran seetta uasa'e awal᷊o, maranite mamangalo si tou.

⁷I Saul nanaile liudde, ne naasilo si ya'u, ana see i ya'u niwagoanne, ne i ya'u sinumimbakka, “I ya'u, Tuangku.”

⁸I tou naiwal᷊o isai ya'u, ne i ya'u udde namasingkatta si tou manungku i ya'u taumatan Amalek.

⁹Ana see i tou nabbisara si ya'u, ‘Wette isindi, wuṛṛu patete i ya'u! I ya'u nal᷊essa wahewalla, wuṛṛu maraniten mate.’

¹⁰Ne i ya'u nangundanin tou, wuṛṛu i ya'u namate, ana waugu i ya'u masingkatta manungku amungkangu i tou manawo ana waugu lomete tate mararisikka, i tou sarun mate lai. Ana see i ya'u nanganu araposan araratuanna su puane wuṛṛu hal᷊angnga wuassu ta'iakke, ana see niapi'u inawarendi ringanni Tuangku.”

¹¹Naaringikka watti'a udde i Daud nanggesa'a laungnge ana waugu massusa, wuṛṛu anambon tantarane na'ola'a aroddi lai.

¹²I mangitou lulluai wuṛṛu lullal᷊o see lai tawe umanna naddatingngu ṛabbi ana waugu i Saul wuṛṛu i Yonatan, see lai tumana'u Israel, al᷊aṛṛana'u MAWU, ana waugu tumaniten manambo apan nate sulal᷊ummu pangalo udde.

¹³Wua'udde i Daud naiwal᷊o ana'a esakka apan uaapiddu watti'a udde, “I'o wuassuapa?” Sasimbakke, “Allangngu indi taumatan Amalek, sangkatou rumaratingnga su wanuan Tuangku.”

¹⁴I Daud nabbisara, “Waṛṛani atonna i'o mamate ratu apan nipilen MAWU!”

¹⁵Ana see i tou namaggo sangkatou suwallattu tantarane wuṛṛu namarenta, “Patete i tou!” Taumata udde namonggo'a taumatan Amalek udde na'oman sara nate.

¹⁶I Daud nabbisara taumatan Amalek udde, “I'o sassane apan nangema'u ṛuumanna pateanna indi su ririnu ringannu nanga'u manungku ratu apan nipilen MAWU buatte nipatenu!”

¹⁷Wua'udde i Daud nangantari lal᷊allu indi si Saul wuṛṛu si Yonatan,

¹⁸wuṛṛu namarenta tadea'u aantari indi iaṛṛa'a su walahannu Yehuda. (Aantari indi uawoṛṛetta sulal᷊ummu Wuken Yazar).

¹⁹“Israel, su manga wuiddu, poiaroddi marau natete atumannaṛṛanne, manga esakku wanua, i mangitou naṛṛaate maola'a maraṛṛamagu wanua.

²⁰Antimanna manga taumatan Gat tawe maaringikka watti'a udde. Antimanna manga lal᷊anna addio'a su Askelon tawe maasomba watti'a udde. Arie ma'oman sara wawinen Filistin lumala'a arie ma'oman sara wawine apekka maggahio lal᷊uassa.

²¹Ei manga wuiddu Gilboa, paddaringikka wisara'u; Arie ma'oman sara wal᷊angngukka wuṛṛu uranna maaṛṛolo si'o! Wala'ewe mamara wuṛṛu maṛṛasa leta'u wawail᷊annu wuṛṛu wadda'a. Ana waugu ete poiaroddi nirangkalle allungngu taumata waṛṛani. Wuṛṛu allungngi Saul nitaiante, tate lai lananna.

²²Anaanni Yonatan matohassa, maapate. Hal᷊elen Saul tawe mandangngu mamate seetta, manginsue ro'appa.

²³I Saul wuṛṛu i Yonatan, aroddi masaṛṛionto'a wuṛṛu arangnguanna; sidutu uaaukka sulal᷊ummu wiakka wuṛṛu papate; i mangitou mallihaṛṛanna wuassu manu'a garuda mattohasanna wuassu singa saṛṛentumuwo.

²⁴Ei, wawinen Israel, lalluaiten Saul, tuangnga ratu! Apan nappeddetta si'o ringannu laubba maṛṛamu apan maṛṛamaga, wuṛṛu nallogakka si'o ringannu wul᷊awanna permata apan maṛṛansangnga.

²⁵Natete manga atummannaṛṛanne, natete su tampan papangaloanna wuṛṛu su manga wuidda mal᷊annabba I Yonatan uawatadda, namantikka.

²⁶I Yonatan, ei tuṛṛangku, naungku massusa, ana waugu si ya'u, i'o tumaniten maarega. Darangngunu si ya'u lembon mawantuga, ewe'e lai nangillembo wuassu darangngun bawine.

²⁷Natete manga atumannaṛṛannu wanua. Manga ahiddi mangitou tate gunane!”