Read Talaud 2 SAMUEL 13 Bible Online

2 SAMUEL 13 - Talaud bible

2 SAMUEL 13

¹I Absalom parinsin Daud pia sangkatou tuari wawine apan maṛṛamaga, aranne i Tamar. I Amnon parinsin Daud wuassu awingnge waine, pia naungnga si Tamar,

²wuṛṛu maapulu mattiilla suadio'a ringanni tou. Arawe udde tawe mariaddi si tou ana waugu i Tamar taambe na'awingnga wuṛṛu tawe wotongnge maggawen esakka. Amnon sidutu maṛṛingiddu olangnge udde na'oman sara i tou nirumadda'a.

³I Amnon pia sangkatou hawe apan pande, aranne i Yonadab ana'i Simea iaangngi Daud.

⁴I Yonadab nabbisara si Amnon, “Anio i parinsi mamiallo ellehanna aroddi massusa? Pia apa?” I Amnon sinumimbakka, “I ya'u pia naungnga si Tamar, tuarin Absalom tuṛṛangku udde.”

⁵Ana see i Yonadab nabbisara si tou, “Udde mal᷊uassa! Lallowangke su tatattereanna, wuṛṛu pangawusute maradda'a. Napawe iamangngu rumanta mattembo si'o, wal᷊oa'a si tou, ‘Papa, wala'ewe i Tamar rumanta tadea'u i tou mangonggollo anna si ya'u. Amungkangu wotongnge i ya'u lai ma'ellega si tou mallaha anna isindi, ya'u wotongnge umanna.’ ”

⁶Wua'udde i Amnon nilumallowangnga su tampa tatattereanna mammahia maradda'a. Napawe i Ratu Daud nirumanta mattembo si tou, i Amnon nabbisara si Daud, “Iamangku, wala'awe i Tamar rumanta mallaha kukisse su saruangku isindi; tadea'u i ya'u wotongnge umanna.”

⁷Wua'udde i Daud napaapiddu tanata si Tamar su wal᷊en araratuanna, wisarane, “Roote su wal᷊en iaangngu Amnon, wuṛṛu i tou lahaite anna.”

⁸Ana see i Tamar inaite poiaroddi wuṛṛu naaratingnga i Amnon ual᷊allowangnga su tampa atatiil᷊anna. I Tamar nanganu addio'a taponna, ana see su saruanni Amnon i tou nanadia kukisse lahanna.

⁹Wua'udde kukisse niapassabbangnga wuassu tampane wuṛṛu ana see nisaru. Arawe i Amnon maddiri umanna. I tou nabbisara, “Doloṛṛa'e sarangkanambone paasabbanga'a wua isindi!”

¹⁰Napawe anambon taumata sinumabbangke wuassu wabbo'a udde, i Amnon nabbisarate si Tamar, “Apira'e kukisse udde inawarendi, su tampa atatiilangku, wuṛṛu wangal᷊ete i ya'u!” I Tamar tinumuṛṛutta.

¹¹Arawe sutempo i Tamar nanogokku kukisse udde si tou, i Amnon nangagassa maṛṛuala udde lapiddu nabbisara, “Tuari, wette atiille ringangku!”

¹²“Eh, arie, pahul᷊u!” sasimbakku maṛṛuala udde. “Arie i'o mamata'u ma'ola'a inolaanna apan dal᷊eo udde! Olangnge udde tawe saran paassa niola'a su Israel.

¹³Amungkangu mariaddi aroddi, hati'u indi iwuni suapa? See lai i'o sarun al᷊uandahannu taumatan Israel. Mappianne i'o maggahatton ratu, ratu sarun maapulu i ya'u maola'a awingngu.”

¹⁴Arawe i Amnon maddiri maddaringikka, ne ana waugu i tou mattohasanna, tuarine udde niwata'a ringannu atatohassa, ana see i tou natatambaten tou.

¹⁵Arawe wua'udde i Amnon maddantinten Tamar wuṛṛu ararantinne udde maggewal᷊anna wuassu apulun naungnge paarorone. Ana see i tou nabbisara tuarine udde, “Sabbangnga!”

¹⁶I Tamar sinumimbakka, “Eh, anio aroddi pahul᷊u? Amungkangu i'o mallimbuakka si ya'u, al᷊al᷊eo udde maggewal᷊anna wuassu inolaanna apan buatte niolangngu tanginna!” Arawe i Amnon maddiri maddaringikka.

¹⁷I tou namaggo mangangimbene sassane ana see nabbisara, “Apira'a wawine indi watukku liudde, wuṛṛu ṛuura'e ngara!”

¹⁸Mangangimbe udde tinumuṛṛutta parentane udde. Laubbi Tamar eteudde Juba mal᷊o'engnga wuṛṛu ta'iakke lai mal᷊o'engnga. Sutempo udde manga maṛṛuala apan taambe naawingnga naramme malluṛṛen laubba ereudde.

¹⁹Ana see i Tamar nangaddon awu su puane, wuṛṛu nanggesa'a jubane, ana see niumamatta lapiddu uataappa hatine ringannu limane ruan ba'a, lapiddu lulluai.

²⁰Napawe i Absalom naasilo si tou, i tou naiwal᷊ote, “Apa i Amnon tanginna nandal᷊eo si'o? Uddita'e tuari'u, ariete paṛṛingira'a. I tou uddewe iaangngu, nariaddi arie papasingkata'a hatto udde sisai-sai.” Ana see i Tamar nangindaun batanganne su wal᷊en Absalom, wuṛṛu i tou tumaniten massusa see tumaniten mal᷊annabba.

²¹I Ratu Daud naaringikka ola'u arariadianna udde, ne i tou mangke nasa'u.

²²I Absalom nangune atonna si Amnon wuṛṛu tate lai maggatton tou ana waugu i tou buatte nassawa si Tamar tuarine.

²³Rua tonna wua'udde i Absalom na'ola'a andeangngu panggahuntinga wambul᷊un domba su Baal-Hazor, maranin soan Efraim, ne i tou nangimbe anambon parisin datu.

²⁴I tou sinumaruanna si Ratu Daud wuṛṛu nabbisara, “Papa, i ya'u ma'oala'a andeangngu pangguhintinga wambul᷊un domba. Doronganna i Papa lai rumanta su andeangnga udde ringannu manga piaṛṛa'u mammamanaran wal᷊en araratuanna.”

²⁵Arawe ratu sinumimbakka, “Arie, Ana'u, ana waugu amungkangu yami sarangkanambone rumanta, yami sarun mapaasusanu.” I Absalom sidutu mammata'a, arawe iamangnge sidutu maddiri rumanta. I tou tumba'u namalan Abasalom.

²⁶Ana see i Absalom nabbisarate, “Amungkangu aroddi, wala'awe tuṛṛangku i Amnon suadio'a ringanni yami.” Ratu sinumimbakka, “Lasa'e patantalonga'a i tou.”

²⁷Arawe ana waugu i Absalom sidutu mammata'a, panginsueanne i Daud nandolokki Amnon wuṛṛu anangnge esakka sarangkanambone apan baine tumantalongnga si Absalom. (Ana see i Absalom nanarun anna apan apianne si mangitou.)

²⁸I tou namarenta manga allangnge, “Paellehe paapia-pia, napawe i Amnon wu'ante ana waugu na'inumma anggore, i ya'u sarun mamarenta, wua'udde patete i tou. Arie pa'ata'utta. I ya'u te sumaruanna olangnge udde. Pammanarate ringannu waṛṛani wuṛṛu imbaṛṛangnga mapapaddua!”

²⁹Manga allangnga udde tinumuṛṛutta parentan Absalom, ana see i mangitou namatete si Amnon. Naasilo udde manga esakka ana'i Daud waine sinuma'e awal᷊one sambau-sambau wuṛṛu tinumal᷊angnga.

³⁰Tantal᷊anna i mangitou ta'e su amatanna mapul᷊e, pia taumata namasingkatta si Daud, “I Absalom buatte namate anambon esakka ana'i Tuangnga — tawe saran sangkatou apan ta'e wiakka!”

³¹Ratu dirumarisikka, ana see nanggesa'a laungnge ana waugu massusa, wuṛṛu nilumallowanga su leta'a. Anambon mammamanarane nanggesa'a lai laubbi mangitou.

³²Arawe i Yonadab ana'i Simea iaangngi Daud nabbisara, “Tuangnga, arie passinggawanga wuṛṛu arie paṛṛingidda manungku ana'i Tuangnga esakka sarangkanambone natete. Tumba'u i Amnon nate, ana waugu natualage manungku eteudde apan ipaapulun Absalom ro'en i Tamar tuarine nisawan Amnon.

³³Nariaddi arie pangimanna manungku manga parinsin Tuangnga natete abbi, ana waugu nate tumba'u i Amnon.”

³⁴Tantal᷊anna udde i Absalom tinumal᷊angke. Mandariaga wal᷊en araratuanni Daud naasilo manambo taumata nirumanta sussossokka waussu wowone su lalal᷊annu Horonaim. Ne i tou inaite ringannu ratu wuṛṛu namasingkattu olangnge udde.

³⁵Ana see i Yonadab nabbisara si Daud, “Uddete manga parinsin Tuangnga! Atonna ere niwal᷊on allangngu tanginna.”

³⁶Wakkute nuddussa i tou mabbisara, sinumuttate manga parinsin Daud sulal᷊ummu wal᷊en. I mangitou lulluaite ana waugu massusa.

³⁷I Absalom nassal᷊iu watukku wal᷊en araratuannu ratun banua Gesur, eteudde ringanni Talmai ana'i Amihur. I tou natana'a isudde al᷊annune tatallu su tonnane. I Daud mal᷊annu nilumal᷊on Amnon,

³⁹arawe napawe i Daud tate massusa, i tou naanaungke si Absalom.