Read Talaud 2 SAMUEL 4 Bible Online

2 SAMUEL 4 - Talaud bible

2 SAMUEL 4

¹Papapulunni Saul apan baine eteudde i Mefiboset, ana'i Yonatan. I tou peṛṛo ro'en uukke ta'e lima tonna, eteudde sutempo i Saul wuṛṛu i Yonatan nate. Ana waugu sutempo watti'u papaten tarua nirumanta wuassu soan Yizreel, inangnga mandariaga si Mefiboset nanal᷊uru ana'a udde ana see tinumal᷊angnga; arawe ana waugu wawine udde uasasaṛṛawutta, ana'a udde nanawi na'oman sara niumento. Napawe i Isyboset parinsinni Saul naaringikka manungku i Abner buatte nipate su Hebron, ikkanne nawul᷊ite, wuṛṛu anambon walahannu Israel nabbal᷊i matta'utta. I Isyboset pia ruan katou piaṛṛa'u tantara apan naola'a tembonanne inai mapapangalo; sangkatou aranne i Baana, sangkatou lai aranne i Rekhab. Itarua ana'i Rimon, wuassu Beerot ruanganni Benyamin. (Beerot nasutta wageangngu leta'i Benyamin. Tumanangnge tutune nassal᷊iute watukku Gitaim wuṛṛu namanuate poiaroddi.)

⁵Ruan katou piaṛṛangnge udde, eteudde i Rekhab wuṛṛu i Baana inaite watukku wal᷊en Isyboset wuṛṛu na'omate isudde sutempo allattune, sutempo i Isyboset mangillol᷊o allo.

⁶Wawine mandariaga wal᷊en udde aamatiil᷊anna sutempo mammaresi gandumma ana see i tou natiille. Ana waugu udde i Rekhab wuṛṛu i Baana naal᷊inso'a sinumutta.

⁷Itarua nasal᷊a sinumutta su wabbo'a atatiil᷊anni Isyboset apan tantal᷊anna mattiilla mal᷊angnga, ana see nangusu'a si tou na'oman sara nate. Itarua namonggo'a puane wuṛṛu niapidda napul᷊e. Saṛṛabbi tuudda itarua u'amatta su Wawal᷊annu Yordan.

⁸Wua'udde itarua nanantillu puan Isyboset udde si Daud su Hebron lapiddu nabbisara, “Indite puan Isyboset ana'i Saul, seetti Tuangnga apan pia pandumma mamate si Tuangnga. Allo indi MAWU buatte nabbal᷊issa inolaanni Saul wuṛṛu papapulunni si Tuangnga.”

⁹Arawe i Daud sinumimbakka, “MAWU apan biakka, apan buatte nanal᷊amatta si ya'u wuassu al᷊awo'u asasilaka, masingkatta manungku wisara'u indi naṛṛino.

¹⁰Sutempo su Ziklag pia taumata apan namasingkatta si ya'u manungku i Saul natete, sunnane manungku i tou uaapiddu watti'a mapia. Arawe i tou buatte ta'u nisametta wuṛṛu nipate. Eteudde lal᷊antakke apan ta'u nionggolla si tou maola'a wawal᷊issu watti'a apan niapidde udde.

¹¹Lembon awakkatanne lai ṛuumanna apan sarun ta'u iema'a su taumata lal᷊eo apan buatte namate taumata tawe sal᷊ane wuṛṛu tantal᷊anna mattiilla su wal᷊ene sassane! Orassa indi ya'u mabbal᷊issa si'o su ola'u pamamate udde, wuṛṛu manginsue si yamiu wuassu wowon dunia indi!”

¹²Wua'udde i Daud namarenta tantarane iapapate si Rekhab wuṛṛu si Baana. Napawe puan buatte nipate, lima wuṛṛu leddane nipototta wuṛṛu niele maranin li'u. Arawe puan Isyboset udde nianu wuṛṛu nilabbinga su soa udde lai sulal᷊ummu labbingi Abner.