Read Talaud 2 SAMUEL 7 Bible Online

2 SAMUEL 7 - Talaud bible

2 SAMUEL 7

¹MAWU ual᷊u'adda si Ratu Daud wuassu al᷊awo'u sal᷊awa'u seenne, na'oman sara i tou wotongnge naapamanua sulal᷊ummu wal᷊en araratuanne.

²Ne ratu nabbisarate si Nabi Natan, “Pa'ellege, i ya'u indi uatana'a su wal᷊en araratuanna apan niola'a wuassu alu cemara wuassu Libanon, sumbal᷊i Wantallu Pa'airen Duata tumba'u sasahipunanna sulal᷊ummu rasanna!”

³I Natan sinumimbakka, “Amata'e al᷊awo'u hol᷊agi Tuangnga, ana waugu MAWU mantul᷊ungngi Tuangnga.”

⁴Arawe ṛabbi udde lai MAWU nabbisara si Natan,

⁵“Roote wuṛṛu wal᷊oa'a si Daud allang-Ku tanata-U indi, ‘I'o tawe suṛṛinone ma'ola'a wal᷊e-U.

⁶Ro'en walahannu Israel Ta'u nipallossa wuassu Mesir naddatingngu orassa indi, taambe saran paassa i Ya'u natana'a su sambau wal᷊en, arawe sidutu mammal᷊intadda wuṛṛu mattana'a su sambau rasanna.

⁷Su al᷊annune i Ya'u mammal᷊intadda suadio'a ringannu walahannu Israel, taambe saran paassa i ya'u naiwal᷊o su manga piaṛṛangnge apan buatte Ta'u nipile anio i mangitou tawe mapararisikku wal᷊e-U wuassu alu cemara wuasen Libanon.’

⁸Ana waugu udde, i Natan, pasingkata'e su allang-Ku Daud, manungku i Ya'u, MAWU Apan Lembontaṛṛino, nabbisara si tou, ‘I'o buatte Ta'u nial᷊appa wuassu manaranu mallu'adda domba su wadda'a wuṛṛu Ta'u nitenega maola'a ratun pabbawala-U Israel.

⁹I Ya'u buatte nakkundinganna si'o su al᷊awo'u amatannu, wuṛṛu manga seennu buatte Ta'u nipate sutempo i'o napapangalo. I'o sarun tumelengnga ere lai manga piaṛṛangnge apan ahewal᷊anne su runia.

¹⁰See lai pabbawala-U Israel buatte Ta'u nisaddianna tampa wuṛṛu Ta'u nirolokka i mangitou mamanua isudde, tadea'u i mangitou wotongnge mabbiakka ringannu matammudda, taweddu manal᷊awa'a lai. Ro'en i mangitou naranta su leta'a indi dorone, wuṛṛu lai Ta'u nitenega manga piaṛṛa'i mangitou, i mangitou buatte nipangaloannu manga taumata apan maapulun araṛṛagissa, arawe olangnge udde tawe nariaddi apia. I Ya'u maddiandi manungku i'o sarun marau wuassu al᷊awo'u hatin seetta, wuṛṛu i Ya'u lai sarun mangonggollu papapulunna si'o.

¹²Allo addantane, napawe nia'omante papatenu, wuṛṛu i'o ilabbinga su labbingu al᷊amonanu, sangkatou wuassu anangngu esakka sarun Ta'u itenega maola'a ratu. Ete i tou apan mapararisikku wal᷊e-U. Araratuanne sarun Ta'u tohassanna wuṛṛu saran mal᷊annu-l᷊annu sangkatou papapulunne sarun mamarenta maola'a sangkatou ratu.

¹⁴I Ya'u sarun maola'a iamangnge, wuṛṛu i tou sarun maola'a ana-U. Amungkangu i tou ma'ola'a pasasal᷊a, i tou sarun Ta'u iṛṛuumanna ere sangkatou iamangnga makkuumannu anangnge.

¹⁵Arawe i Ya'u sidutu ma'ola'a apapia si tou uasul᷊ungngu pa'aire-U. Pa'aire-U si tou sidutu Ta'u aagasanna, wal᷊ine ere buatte Ta'u niola'a si Saul apan Ta'u niiru wuassu aiananne tadea'u i'o wotongnge maola'a ratu.

¹⁶I'o sidutu uatahuanna papapulunna, wuṛṛu araratuannu sarun Ta'u olaanna mattaṛṛangnga saran mal᷊annu-l᷊annu. Sarangkal᷊o'engnge sangkatou wuassu papapulunnu sarun mamarenta maola'a sangkatou ratu.’ ”

¹⁷Ana see i Natan namasingkatta si Daud sarangkanambone apan buatte niapal᷊iatta'u Ruata si tou.

¹⁸Ana see i Ratu Daud sinumutate sulal᷊ummu Rasannu MAWU. I tou niuma'ianna wuṛṛu niumal᷊iomanna, “Oh MAWU Apan Atanggaṛṛanne, i ya'u wuṛṛu amonangku tawe sulal᷊anne manengkamma al᷊awo'u apapia apan niapasilo-Nu si ya'u su al᷊annune indi.

¹⁹Ewe'e lai inolaannu MAWU nangillembo lai wua isudde, Oh MAWU Apan Atanggaṛṛanne; I'o buatte na'ola'a pa'aire su papapulungku sutempo apan sarun dumanta. Wuṛṛu olangnge udde niapasilo-Nu si ya'u, salaiwe i ya'u tumba'u sangkatou taumata, oh MAWU Apan Atanggaṛṛanne!

²⁰Apa lai apan botongnge ta'u iwal᷊o Si'o? I'o masingkattu sarangkanambone su ola'u allang-Ngu indi.

²¹Sulal᷊ummu pa'aire-Nu wuṛṛu wuassu apulu-Nu sassane I'o na'ola'a manga inolaanna wahewalla udde ipangaṛṛa'a allang-Ngu indi.

²²I'o lembon mawantuga, oh MAWU Ruata, tumba'u I'o Ruata, taweddu nassul᷊ungngu MAWU. Yami masingkattu olangnge udde ana waugu buatte niapasingkatta ro'en dorone.

²³Su ahewallu runia tawe walahanna ere Israel. Israel sambau walahanna apan buatte nipallossu MAWU wuassu patataṛṛuallangnga tadea'u maola'a al᷊aṛṛanang-Ngu sassane. Al᷊awo'u inolaanna apan bahewalla wuṛṛu maatiangnga apan niolang-Ngu si mangitou, na'ola'a aran-Nu tinumelengnga su ahewallu runia. Manga walahanna waine suadio'a ringannu manga monganni mangitou buatte nilimbuaṛṛan-Nu sutempo al᷊aṛṛanang-Ngu inaite mapapangalo.

²⁴Walahannu Israel buatte niolang-Ngu al᷊aṛṛanang-Ngu sassane saran mal᷊annu-l᷊annu, wuṛṛu I'o oh MAWU, naola'a Ruatan mangitou.

²⁵Ne orassa indi, oh MAWU Ruata, antimanna I'o manohassa saran mal᷊annu-l᷊annu pa'aire apan niwisara-Nu su ola'u watangangku wuṛṛu papapulungku. Antimanna I'o mappaamattu sarangkanambone apan buatte nipa'ire-Nu udde.

²⁶Su al᷊awo'u tampa taumata sidutu mammantuga aran-Nu wuṛṛu mabbisara, ‘MAWU Apan Lembontaṛṛino eteudde Ruatan Israel.’ Ne saran mal᷊annu-l᷊annu sangkatou wuassu papapulungku sarun mamarenta maola'a ratu su walahanna indi.

²⁷MAWU Apan Lembontaṛṛino! I ya'u mamaṛṛani batangangku manduittu aal᷊iomanna indi Si'o, ana waugu I'o sassane buatte nangonggolla si ya'u manungku ana'a papulunna sarun olaan-Nu ratu su walahanna indi.

²⁸Oh MAWU Apan Lembontanggaṛanne, Tumba'u I'o Ruata; anambon pa'aire-Nu niapaatipussu I'o MAWU, wuṛṛu olangnge apan maṛṛansangnga udde buatte pina'ire-Nu si ya'u.

²⁹Ana waugu udde, i ya'u sumal᷊ande, antimanna mangal᷊amatta papapulungku tadea'u sarangkal᷊o'engnge i mangitou sidutu uapendamma darangngu-Nu. Oh MAWU Apan Lembonatanggaṛanne, sarangkanambone udde buatte pina'ire-Nu, ne papapulungku sarun sidutu al᷊amatan-Nu saran mal᷊annu-l᷊annu.”