Read Talaud 1 MARARATU 10 Bible Online

1 MARARATU 10 - Talaud bible

1 MARARATU 10

¹Ratun banua Syeba naaringikka su ola'u atatelengngi Salomo. Ne i tou nirumanta watukku Yerusalem manal᷊u'atta si Salomo ringannu aiwal᷊o apan masahadda.

²I tou nirumanta raṛundinganannu manambo taumata wuṛṛu unta apan nasaddattu luranna rampa-rampa, watu permata, wuṛṛu marasai wul᷊awanna. Sutempo nassomban Salomo, ratu udde nangonggollu al᷊awo'u hatin aiwal᷊o apan tawe iaṛṛingidde.

³Anambon aiwal᷊o udde wotongnge niasimbaṛṛanni Salomo, tawe saran sambau apan masahadda si tou.

⁴Ratu udde na'ellega sassane apanden Salomo. I tou na'ellega wal᷊en araratuanna apan niola'i Salomo,

⁵ola'u pamamanara manga mammamanaran araratuanne, wuṛṛu laubbu uasulungnga wuṛṛu wal᷊en mangitou. I tou na'ellega anna wuṛṛu ua'e apan nisaru, ola'u mangangimbe andeangnga, wuṛṛu manga sasamba apan nionggolli Salomo su Wal᷊en MAWU. Sarangkanambone udde naaola'a ratun banua Syeba tinumiangnga wuṛṛu niagukke.

⁶Ne i tou nabbisarate si Ratu Salomo, “Al᷊awo'a apan ta'u niaringiṛṛanna su wanua'u su ola'i Tuangnga wuṛṛu apapanden Tuangnga, udde mangke atonna!

⁷Dorone i ya'u tawe mangimanna, arawe napawe i ya'u nirumanta wuṛṛu ma'ellega ringannu mata'u sassane, wakkute udde i ya'u nangimanna. Mangke atonna al᷊awo'a apan ta'u niaringiṛṛanna udde taambe mattangnga wuassu apa apan aellehangku orassa indi. Inauranna apapande wuṛṛu paa'alan Tuangnga mannamboanna marau wuassu apa apan niapasingkatta si ya'u.

⁸Lal᷊umanna'awe eteapa manga awingngi Tuangnga! Wuṛṛu al᷊uassawe eteapa manga mammamanara apan sidutu mammanara hunan Tuangnga na'oman sara wotongnge maaringikka wuassi Tuangnga sassane al᷊awo'u al᷊aṛṛa'a apan maapande!

⁹Dalo so MAWU, Ruatan Tuangnga! Ringannu nanenegi Tuangnga naola'a ratun Israel, MAWU napal᷊iatta'a aroddi al᷊uanne i Tou si Tuangnga. Tawe panginsueanne i Tou mandangngu walahannu Israel; ana waugu udde i Tou namile si Tuangnga naola'a ratun mangitou, tadea'u i Tuangnga wotongnge mandisikku tita wuṛṛu atatul᷊idda.”

¹⁰Wua'udde ratun banua Syeba udde nanantilla si Salomo manga aonggolla apan niapidde, eteudde nilumebbe wuassu 4.000 su kilone wul᷊awanna wuṛṛu marasai watu permata see rampa-rampa. Tate saran paassa lai i Salomo nanarimmattu rampa-rampa apan aroddi anambone ere nionggollu ratun banua Syeba udde si tou. (

¹¹Manga apalli Hiram apan uaapiddu wul᷊awanna wuassu Ofir ionggolla si Salomo, see uaapiddu lai marasai watu permata wuṛṛu alu cendana.

¹²Alu udde nipaatti Salomo ipa'ola'a manga tarali su Wal᷊en MAWU wuṛṛu wal᷊e atatanaannu ratu; wuṛṛu lai niola'a kecapi wuṛṛu gambus hunan ingana'a mangangantari. Manga alu udde eteudde alu cendana apianne apan buatte niapidda watukku Israel; tate saran paassa taumata maasilo alu apianne ereudde.)

¹³Wal᷊ine wuassu manga aonggola apan inanaramanne ia'onggolli Salomo, i tou lai nangonggola su ratu wuassu wanua Syeba udde al᷊awo'a apan niroronganne. Wua'udde napul᷊ete ratu watukku wanuane suadio'a ringannu anambon mallal᷊aṛenggene.

¹⁴Suapan tonna i Ratu Salomo mannarimmatta maranin 23.000 su kilone wul᷊awanna,

¹⁵taambe nareengnga manga auntunganna wuassu mabbal᷊u'a, wuṛṛu manga wose wuassu maddaragangnga, manga ratun Arab see manga gubernure Israel.

¹⁶I Salomo na'ola'a 200 allungnga wahewalla wuassu wul᷊awanna nisassalla. Wul᷊awanna apan nipa'atta pina'ola'a allungnga udde iraṛṛangngo anambone pitu kiloharamma.

¹⁷I tou lai na'ola'a 300 allungnga wul᷊awanna apan ma'addio'anna. Wul᷊awanna apan nipa'atta pina'ola'a suapan allungnga maraddio'a udde iraṛṛangngo dua kilo, sarangkanambone wul᷊awanna nisassalla. Anambon allungnga udde sasahipunanna su balai apan aranne Balai Mahurangngu Libanon.

¹⁸I tou lai na'ola'a sambau adderan araratuanna apan bahewalla wuṛṛu nilogaṛṛannu wul᷊awanna tutune.

¹⁹Addera udde pia ta'iakke, wuṛṛu su ruan ba'ane pia paal᷊uanna singa. Su liuddu addera udde pia paal᷊uanna puan sapi. Adeṛṛa udde lai pia annumma tal᷊ataddu tuadde.

²⁰Su pentakke aiṛṛi wuṛṛu su pentakke aikkatanna suapan tal᷊ataddu tuadda udde pia paal᷊uannu singa — sarangkanambone mapul᷊o dua su waune. Tawe saran paassa pia adderan araratuanna ereudde su al᷊awo'u araratuanna.

²¹Anambon saranapa pa'inumanni Salomo niola'a wuassu wul᷊awanna, wuṛṛu anambon saranapa su Balai Mahurangngu Libanon niola'a lai wuassu wul᷊awanna tutune. Taweddu niola'a wuassu sal᷊a'a, ana waugu su tempon Salomo taumata massunna sal᷊a'a udde tawe aregane.

²²I Salomo lai uatahuanna manambo apalla wahewalla apan massenggotta suaddio'a ringannu manga apalli Ratu Hiram. Tallu tonna paasa manga apalla udde mabbelengnga ringannu uaapiddu wul᷊awanna, sal᷊a'a, gadinga, mangki wuṛṛu manu'u winalanganna merak.

²³I Ratu Salomo ma'alanna wuṛṛu mappandeanna wuassu al᷊awo'u ratu su runia indi.

²⁴Anambon taumata su ahewallu runia mattinsahadda maddea'a maisasomban Salomo tadea'u maddaringikka al᷊aṛṛa'a masiṛṛongnga apan nionggollu Ruata si tou.

²⁵I mangitou sangkatou-sangkatou nirumanta ringannu uaapiddu aonggolla hunan Salomo. I mangitou nangonggollu manga saranapa sal᷊a'a, wul᷊awanna, laubba, lutangnga, rampa-rampa, awal᷊o wuṛṛu bagal. Etearoddi suapan tonna mallal᷊isansunna.

²⁶I Salomo na'ola'a tantaran pangalo apan anambone 1.400 keretan pangalo wuṛṛu 12.000 tantara uasa'e awal᷊o. Sambageanganna niaddone su Yerusalem wuṛṛu lambene su al᷊awo'u soa waine.

²⁷Sulal᷊ummu tempon Salomo uaparenta, su Yerusalem sal᷊a'a naola'a ere saranapa wiasa ere lai watu, wuṛṛu alu cemaran Libanon ete pia seregge ere alu cemara wiasa.

²⁸Ringannu nappa'attu manga maddaragangngu ratu, awal᷊o niranta wuassu Mesir wuṛṛu Kilikia,

²⁹wuṛṛu manga keretan pangalo niranta wuassu Mesir. Awal᷊o sambau aregane 150 roitta sal᷊a'a, wuṛṛu sambau keretan pangalo aregane 600 roitta sal᷊a'a. Wua'udde wuassu manga maddaragangnga udde lai manga awal᷊o wuṛṛu manga keretan pangalo udde niwalu'a apia su manga ratun Het wuṛṛu manga ratun Siria.