Read Talaud 1 MARARATU 12 Bible Online

1 MARARATU 12 - Talaud bible

1 MARARATU 12

¹I Rehabeam inaite watukku Sikhem, ana waugu anambon tumana'u Israel su wageangngu sawannakka buatte na'ammulla poiaroddi manenegi tou maola'a ratu.

²Sutempo udde i Yerobeam ana'i Nebat ta'e su Mesir ana waugu tinumal᷊angngu watanganne wuassi Ratu Salomo. Sutempo i tou naaringikka su ola'i Rehabeam, i tou nabbelengnga watukku Israel.

³Tumana'a su wageangngu sawannakka namaggo si Yerobeam, ana see i mangitou inaite suaddio'a sinumaruanna si Rehabeam. Unni mangitou,

⁴“I Salomo iamangngi Tuangnga nangonggollu winabbawa apan mawakkatta si yami. Orassa indi amungkangngu i Tuangnga makkanna winabbawa wuṛṛu manggaingnga asasusan kami, yami sarun massuṛṛubawa si Tuangnga.”

⁵I Rehabeam sinumimbakka, “I ya'u maṛṛingidda asuene. Rantate apia tallu allo lai.” Ne manga taumata udde napul᷊ete.

⁶Ana see i Rehabeam naddorongnga tatantiro su matatimmade apan dorone naola'a manantiro si Salomo, iamangngi Rehabeam. “Ereapa ṛinone i ya'u sumimbakka manga taumata udde?” aiwal᷊on Rehabeam, “Apa tatantiron kamiu?”

⁷I mangitou sinumimbakka, “Amangkangngu i Tuangnga atonna-tonna mappulu umakkannu tumana'a, utungete darorongngi mangitou, ne i mangitou sarun massuṛṛubawa si Tuangnga saran mal᷊annu-l᷊annu.”

⁸Arawe tatantiro manga matatimmade udde tawe niraringiṛṛanni Rehabeam. Ewe'e lai i tou inaite ringannu manga taumata saṛṛentumuwo apan sanluwane tou wuṛṛu apan orassa indi uasumbala si tou,

⁹Si mangitou i tou naiwal᷊o, “Apa tatantiron kamiu si ya'u isimbakka tumana'a apan maddorongnga si ya'u makkanna winabbawa mangitou?”

¹⁰I mangitou sinumimbakka, “Arendite ṛinone i Tuanga mabbisara si mangitou, ‘Salaiwe i ya'u lome, arawe i ya'u ta'e mattohasanna wuassu iamangku!’

¹¹Iamangku nangonggollu winabbawa apan mawakkatta si yamiu, arawe i ya'u sarun mangonggolla lai lembon awakkatanne. I tou manggesekka si yamiu ringannu sambokka, arawe i ya'u sarun mamabballa si yamiu ringannu sambokka larangnge atta'a!”

¹²Tallu allo wua'udde i Yerobeam wuṛṛu anambon taumata udde nabbelengke sinumaruanna si Ratu Rehabeam ere buatte niparentane.

¹³Uapapaṛṛalan ringannu tatantiro matatimmade udde, tumana'a apan nirumanta ringanni tou udde niwo'anne ringannu maṛṛagissa.

¹⁴Uasul᷊ungu tatantiron manga taumata saṛṛentumuwo, i tou nabbisara, “Iamangku nangonggolla si yamiu winabbawa apan mawakkatta, arawe i ya'u sarun ma'ola'a winabbawa udde lembon mabbakkatanne lai. I tou manggesekka si yamiu ringannu sambokka, arawe i ya'u sarun mamabballa si yamiu ringannu sambokka larangnge atta'a!”

¹⁵Darorongngu tumana'a tawe niraringiṛṛanne. Arawe udde atonna apulun MAWU. Apa apan niwisara MAWU si Nabi Ahia wuassu Silo su ola'i Yerobeam ana'i Nebat ṛinone matipussa.

¹⁶Napawe tumana'a naasilo manungku ratu maddiri maddaringikka si mangitou, i mangitou nangintul᷊i, “Ipa'ura lai i Daud wuṛṛu papapulunne! I mangitou tawe saran sambau niola'a si ite. Tumana'u Israel, wette i ite mapul᷊ete Wala'e i Rehabeam udde mangurussa watanganne sassane!” Ne tumana'u Israel napulete,

¹⁷wuṛṛu Rehabeam tumba'u naola'a Ratu su wageangngu leta'u Yehuda.

¹⁸Salaiwe aroddi i Ratu Rehabeam ta'e lai nandolokki Adoniram, sangkatou tembonannu mammamanara wata'a, mapaal᷊annabbu tumana'a. Arawe i mangitou nanuntungngu watu si tou na'oman sara nate. Naasilo olangnge udde i Rehabeam nasasaṛṛawutta sinuma'e keretane, ana see tinumal᷊angngu watanganne watukku Yerusalem.

¹⁹Nanattaka orassa udde tumana'a su wageangngu sawannakku araratuannu Israel sidutu mammangalo manga ratu papapulunni Daud.

²⁰Sutempo anambon tumana'u Israel naaringikka manungku Yerobeam nabbelengke wuassu Mesir, i mangitou namaggo si tou su sambau ammul᷊anna ana see naneneggi tou naola'a ratun Israel. Tumba'u tumana'u ṛuangannu Yehuda apan sidutu matammudda su papapulunni Daud.

²¹Sutempo i Ratu Rehabeam na'omate su Yerusalem, i tou nangammullu 180.000 tantarane apan apianne wuassu ṛuanganni Yehuda wuṛṛu i Benyamin inai mamangalo taumatan Israel wuṛṛu mamelengngu taṛṛinone su manga ṛuanganna su wageangngu sawannakku Israel.

²²Arawe MAWU nandolokki Nabi Semaya

²³iapapasingkattu watti'a indi si Rehabeam, wuṛṛu su anambon ṛuangannu Yehuda wuṛṛu Benyamin,

²⁴“Arie pamangalo manga tuṛṛangngu taumatan Israel. Apul᷊ete! Apa apan buatte nariaddi udde apulu-U.” Ne i mangitou sarangkanambone tinumuṛṛutta parentan MAWU, ana see napulete su wal᷊ene sangkatou-sangkatou.

²⁵Napawe naola'e ratun Israel, i Yerobeam nanohassa soan Sikhem su wageangngu penenteannu Efraim, ana see natana'a poiaroddi tal᷊angkadio'a. Wua'udde i tou inaite lai wua isudde wuṛṛu nanohassa soa Pnuel.

²⁶I tou maṛṛingidda arendi sulal᷊ummu naungnge, “Amungkangngu tumana'a sidutu inai watukku Yerusalem mangonggollu sasamba su Wal᷊en MAWU ereapa a'olaanni mangitou orassa indi, i mangitou sarun mabbelengnga manamba'a si Rehabeam, ratun Yehuda, ana see mamate si ya'u.”

²⁸Napawe buatte naṛṛingiddu olangnge udde, i tou na'ola'a darua paal᷊uanna sapi wulawanna ana see nabbisara su tumanangnge, “Walahannu Israel! Mal᷊annute i yamiu inannai watukku Yerusalem mattaṛṛamawu. Orassa indi, eteindi manga mawunu apan buatte nangapiddi yamiu sinumabbangnga wuassu Mesir!”

²⁹Ana see i Yerobeam nangaddon sambau sapi wul᷊awanna udde su Betel wuṛṛu waine su Dan.

³⁰Ne tumanangnge na'ola'e rosa, ana waugu i mangitou inaite watukku Betel wuṛṛu watukku Dan inai mattaṛṛamawu.

³¹I Yerobeam napararisikku lai manga tampa patataṛṛamawuanna waine su manga puiddu wowone, wuṛṛu i tou namile manga imam wuassu wallattu manga amonanna apan wal᷊ine ṛuanganni Lewi.

³²Wua'udde i Yerobeam nangaddo manga imam udde su Betel tadea'u mammanara poiaroddi wuṛṛu i tou sassane nangonggollu sasamba su manga sapi wul᷊awanne apan niolangnge udde. Ana see i tou nanantunna allo mapul᷊o l᷊ima wul᷊anna aual᷊une maola'a allo wahewan Israel, ere lai allo wahewa su Yehuda. Su allo udde i Yerobeam inaite watukku Betel wuṛṛu nangonggollu sasamba ipallaghu allo wahewa apan buatte tinantunne udde.