Read Talaud 1 MARARATU 14 Bible Online

1 MARARATU 14 - Talaud bible

1 MARARATU 14

¹Sutempo udde ana'a esakki Yerobeam aranne i Abia nirumadda'a.

²I Yerobeam nabbisarate su awingnge, “Pandiahite inai watukku Silo su wal᷊en Nabi Ahia apan dorone nabbisara manungku i ya'u sarun maola'a ratun Israel. Arawe pa'ilal᷊ihidda tadea'u taumata wagga isai i'o.

³Apira'a si tou mapul᷊o roti, addio'a kukisse wuṛṛu pul᷊a sambotolla. Iwal᷊oite si tou apa apan sarun mariaddi si Abia, ana'i ite. Nabi udde sarun mamasingkatta si'o.”

⁴Ne inaite awingngi Yerobeam watukku wal᷊en Nabi Ahia su Silo. Nabi udde tate maaillal᷊a ana waugu i tou tumaniten timmade atonna.

⁵Arawe MAWU namasingkatta si tou manungku awingngi Yerobeam rumanta wuṛṛu maiwal᷊on anangnge apan maradda'a. Wuṛṛu MAWU lai namasingkatta si Nabi Ahia apa apan sarun iwisarane. Sutempo awingngi Yerobeam na'omate poiaroddi, i tou nailal᷊ihidda ere taumata waine.

⁶Arawe aroddi i Nabi Ahia naaringikka tingikku lempangnge su ngara, i tou nabbisara, “Wette suttate, i ya'u masingkatta i'o awingngi Yerobeam. Lasa'e pamahia. Pia batti'a lal᷊eo si'o.

⁷Apul᷊ete wuṛṛu waloa'a si Yerobeam manungku eteindi apan niwisaran MAWU, Ruatan Israel, ‘I'o buatte Ta'u nipile wuassu wallattu tumana'a wuṛṛu niola'a tembonannu uma-U Israel.

⁸I'o buatte Ta'u nionggol᷊annu araratuanna apan Ta'u niaṛṛo wuassu papapulunni Daud. Arawe i'o tawe ere allang-Ku Daud. I tou matamudda atonna si Ya'u wuṛṛu matuṛṛutta su parenta-U. I tou ma'ola'a tumba'u su apa apan ipaapulu-U.

⁹Arawe i'o ma'ola'a al᷊al᷊eo apan maggewal᷊anna wuassi mangitou apan namarenta dorone wuassi'o. I'o nanantang-Ku wuṛṛu nandantan asasa'u-U ringannu na'ola'a pasasubbanna wuṛṛu manga paal᷊uanna wuassu atta'a tadea'u subbanna.

¹⁰Ana waugu udde i Ya'u sarun mandantan asasilaka su amonannu. Anambon papapulunnu esakka, salaiwe apa manarane, sarun pateanna. I Ya'u sarun mamul᷊in amonannu, ere lai taumata apan mannapu sapadda na'oman sara nawaresi.

¹¹Lal᷊oṛṛon amonannu apan mate su soa sarun inasannu asu, wuṛṛu apan nate su liuddu soa sarun inasannu manu'u winalanganna. Paanaunge, ete i Ya'u MAWU apan nabbisara!’ ”

¹²Wua'udde i Nabi Ahia nabbisara su awingngi Yerobeam, “Ne, apul᷊ete orassa indi! Sutempo i'o sumutta su soa, anangngu udde sarun mate.

¹³Anambon tumana'u Israel sarun lunal᷊o wuṛṛu mallabbingi tou. Ete i tou suwallattu sangkatou wuassi amonanni Yerobeam apan nilabbinga ringannu mapia, ana waugu tumba'u i tou apan naṛṛino su naungngu MAWU, Ruatan Israel.

¹⁴Israel sarun onggol᷊annu MAWU sangkatou ratu apan sarun manguddussu pamamarentan Yerobeam ere sangkatou ratu. Allone nia'omante! Manattakka orassa indi

¹⁵MAWU sarun makkuumannu Israel ma'oman sara umio'a ere nammalo sulal᷊ummu ua'e. MAWU sarun manawutta tumana'u Israel wuassu wanua apan mapia indi apan nionggollu MAWU su al᷊amonan mangitou. I tou sarun manal᷊iawukki mangitou watukku samba'an Sal᷊ukku Efrat, ana waugu i mangitou napaasopan asasa'u-Ne ringannu na'ola'a manga paal᷊uanni monganna Asyera.

¹⁶MAWU sarun manantangngu Israel ana waugu i Yerobeam buatte na'ola'a rosa wuṛṛu naaola'a lai taumatan Israel narosa.”

¹⁷Wua'udde awingngi Yerobeam inaite watukku Tirza. Sutempo i tou sinumutta su wal᷊ene, anangnge nate.

¹⁸Tumana'u Israel nilumal᷊o ana see nallabbingi tou ere apan buatte niwal᷊on MAWU si Nabi Ahia, allang-Nge.

¹⁹Watti'a waine su ola'i Ratu Yerobeam, eteudde pamamarentane wuṛṛu pangalo apan nipiaṛṛangnge, buatte niwoṛṛetta sulal᷊ummu wuke Watti'u Mararatu Israel.

²⁰Dua pul᷊o su tonanne al᷊annune i Yerobeam uaparenta naola'a sangkatou ratu, wua'udde i tou nate wuṛṛu nilabbinga. Anangnge aranne i Nadab nallol᷊ossa si tou naola'a ratu.

²¹Sutempo i Rehabeam, ana'i Salomo, naola'a ratun Yehuda, uukki tou appattu pul᷊o assa su tonnane. I tou uaparenta mapul᷊o pitu su tonnane al᷊annune su Yerusalem. Wuassu ahewallu Israel soa udde buatte niṛṛae su MAWU maola'a tampa patataṛṛamawuanna si Tou. Inangi Rehabeam eteudde i Naama wuassu walahannu Amon.

²²Walahannu Yehuda ma'ola'a al᷊al᷊eo su aelleggu MAWU. Inolaanni mangitou lembon mandantan asasa'un MAWU wuassu al᷊awo'u inolaannu al᷊amonan mangitou.

²³Su puiddu manga wuidda wuṛṛu su al᷊ungngu manga aal᷊uanna masallakka, i mangitou na'ola'a manga tampa pasasubbanna paal᷊uanna, wuṛṛu napararisikku manga diṛṛi see manga paal᷊uanni monganna Asyera tadea'u subbanna.

²⁴Su manga tampa udde i mangitou ma'ola'a pasasndaga ma'ola'a sambau pasasubba su monganna. Ewe'e lai esakka mamanawa naola'a sumasandaga. Taumatan Yehuda na'ola'a anambon inolaanna maarantina apan niola'u manga walahanna apan buatte nilimbuaṛṛannu MAWU su tempo taumatan Israel sinumutta su wanua udde.

²⁵Su tonna al᷊imane pamamarentan Rehabeam, i Sisak, ratun Mesir namangalo Yerusalem.

²⁶I tou nangaṛṛo anambon saranapa maarega apan uaraddo su Wal᷊en MAWU wuṛṛu su wal᷊en araratuanna, wuṛṛu lai manga allungnga wul᷊awanna apan iola'i Salomo.

²⁷Ne naola'a hahantine Ratu Rehabeam na'ola'a manga allungnga wuassu witu'a, wuṛṛu nitantilla su manga tembonannu tantarane apan uariaga passalangannu wal᷊en araratuanna.

²⁸Suapan datu inai su Wal᷊en MAWU, manga mandariaga uaapiddu manga allungnga udde, wua'udde isul᷊e su wabbo'a pandiagganna.

²⁹Watti'a waine su ola'i Ratu Rehabeam buatte niwoṛṛetta sulal᷊ummu wuke Watti'u MAWU Ratun Yehuda.

³⁰Sutempo pamarentan Rehabeam, sidutu pia pangalo suwallatti Rehabeam wuṛṛu Yerobeam.

³¹Wua'udde i Rehabeam natete wuṛṛu nilabbinga su labbingu manga ratu su Soan Daud. I Abiam, anangnge, nallol᷊ossa si tou naola'a ratu.