Read Talaud 1 MARARATU 22 Bible Online

1 MARARATU 22 - Talaud bible

1 MARARATU 22

¹Al᷊annune dua tonna pia lebbene tawe pangalo suwallattu Israel wuṛṛu Siria.

²Arawe su tonna atallune, i Yosafat ratun Yehuda inaite nattembo si Ahab ratun Israel.

³Tantal᷊anna wua'udde i Ahab buatte nabbisara su manga tembonannu tantarane, “I yamiu masingkatta manungku soan Ramot su Gilead udde pussa'an kite! Anio tawe ul᷊eanni ite apia wanua Siria?”

⁴Ne sutempo i Yosafat nirumanta, i Ahab naiwal᷊o, “Tuṛṛangnga mappulu inai suaddio'a ringangku mamangalo Ramot?” I Yosafat sinumimbakka, “Aroddite! I ite inaite suaddio'a. Tantara wuṛṛu tantaran awal᷊o'u sarun ma'ammullu tantara wuṛṛu tantaran awal᷊on Tuṛṛangnga.

⁵Arawe mappianne i ite maiwal᷊o asuene su MAWU.”

⁶Ne i Ahab nangammullu iraṛṛangngo 400 nabi ana see naiwal᷊ote si mangitou, “Wotongnge i ya'u inai mamangalo Ramot ara'e tawe?” “Wotongnge!” sasimbakki mangitou. “MAWU sarun manantillu soa udde si Tuangnga.”

⁷Arawe i Yosafat naiwal᷊o apia, “Apa isindi tawe nabi waine apan botongnge maiwal᷊o su MAWU hunan kite?”

⁸I Ahab sinumimbakka, “Ta'e pia sangkatou, i Mikha ana'i Yimla. Arawe i ya'u maddantinni tou, ana waugu tawe saran paassa i tou maramallu apa apan mapia si ya'u; sidutu apan dal᷊eo.” “Eh, arie pabbisara aroddi!” sasimbakki Yosafat.

⁹Ne i Ahab namaggote sangkatou mammamanaran araratuanna ana see nandolokki tou inai pinapaal᷊appa si Mikha.

¹⁰Sutempo udde i Ahab wuṛṛu i Yosafat, ringannu laubbu awawantuga, ua'ianna su adderan araratuanna su tampa pamakkannu gandumma su saruannu ngaran passalangannu Samaria, tantal᷊anna manga nabi sinumaruanna wuṛṛu namasingkattu sasi'atti mangitou.

¹¹Sangkatou suwallattu manga nabi udde aranne i Zedekia ana'i Kenaana, na'ola'a manga tatandu'a atta'a ana see nabbisara si Ahab, “Eteindi apan niwal᷊on MAWU, ‘Ringannu manga tatandu'a ereindi i Tuangnga sarun namaddon Siria wuṛṛu makkimunsa'a si mangitou.’ ”

¹²Anambon nabi waine niumire wuṛṛu nabbisara, “Pangaloite Ramot, Tuangnga sarun maauntungnga. MAWU sarun mangonggollu auntunganna si Tuangnga.”

¹³Tantal᷊anna udde daroloṛṛanna apan nangal᷊appa si Mikha, nabbisara si Mikha, “Anambon nabi apan waine nami'attu auntungannu ratu. Doronganni Papa lai mami'attu apan mapia ere i mangitou.”

¹⁴Arawe i Mikha sinumimbakka, “Ringannu arannu MAWU apan biakka, i ya'u tumba'u mamasingkatta apa apan niwal᷊on MAWU si ya'u!”

¹⁵Napawe i Mikha na'omate su saruanni Ratu Ahab, ratu naiwal᷊o, “Wotongngewe i ya'u wuṛṛu Ratu Yosafat inai mamangalo Ramot, ara'e tawe?” “Pamangalote!” sasimbakki Mikha. “MAWU sarun mangonggollu auntunganna si Tuangnga.”

¹⁶I Ahab sinumimbakka, “Amungkangngu i'o mabbisara si ya'u ringannu arannu MAWU, wal᷊oa'e ringannu atonna. Paapira i'o ta'u iappanaungnga su ola'u hatto udde?”

¹⁷I Mikha nabbal᷊issa, “I ya'u naasilo tantaran Israel nassal᷊iawukka su manga wowone. I mangitou naal᷊ihidda domba tawe mallal᷊u'adde, wuṛṛu MAWU nabbisara su ola'i mangitou, ‘Manga taumata indi tawe piaṛṛangnge. Wala'e i mangitou mapul᷊e ringannu sal᷊amatta.’ ”

¹⁸Ana see unni Ahab si Yosafat, “Atonna wisara'u, are? Tawe saran paassa i tou mani'attu apan mapia si ya'u! Sidutu tumba'u apan dal᷊eo!”

¹⁹I Mikha nabbisara apia, “Orassa indi paddaringikka apa apan niwisaran MAWU! I ya'u naasilo MAWU ua'ianna su aṛṛa'uan-Ne su surga, wuṛṛu anambon mala'ekan-Ne uarisikka marani-Ne.

²⁰MAWU naiwal᷊o, ‘Isai apan sarun massal᷊o'i Ahab tadea'u i tou mappulu inai mappapangalo wuṛṛu mate su Ramot su Gilead?’ Sasimbakku manga mala'ekatta udde uapapaṛṛala.

²¹Panginsueanne nirumantate sambau ghaṛṛaho. I tou nangundanin MAWU wuṛṛu nabbisara, ‘Ya'ute inawa massal᷊o'i tou.’

²²‘Ereapa olangnge?’ aiwal᷊on MAWU. Ghaṛṛaho udde sinumimbakka, ‘I ya'u sarun inai wuṛṛu ma'ola'a anambon nabin Ahab mamahia.’ MAWU nabbisara, ‘Aroddite, ola'e udde, i'o sarun maasal᷊o'i tou.’ ”

²³Wua'udde i Mikha nabbisara, “Ne, eteudde apan nariaddi! MAWU buatte na'ola'a manga nabin Tuangnga namahia si Tuangnga ana waugu MAWU buatte nanantunna maṛṛia'u asasilaka udde si Tuangnga!”

²⁴Ne i Nabi Zedekia inaite nangundanin Mikha ana see namero hatine wuṛṛu nabbisara, “Apa wotongnge Ghaṛṛaho MAWU manantangku wuṛṛu mabbisara si'o?”

²⁵I Mikha sinumimbakka, “Paṛṛaddote i'o pa'ellega tialane sutempo i'o sumutta su sambau wabbo'a maddea'a pa'imbunianna.”

²⁶“Sametta i tou!” parenan Ratu Ahab, “wuṛṛu apira'a i tou ringanni Amon, tembonannu soa, wuṛṛu ringanni Parinsi Yoas.

²⁷Doloṛṛa'a i mangitou mantaṛṛon tou sulal᷊ummu tuttupanna, wuṛṛu mangonggolla si tou anna wuṛṛu ua'e addio'a ma'oman sara i ya'u mabbelengnga ringannu sal᷊amatta.”

²⁸Unni Mikha, “Amungkangngu i Tuangnga mabbelengnga ringannu sal᷊amatta, atappasanne MAWU tawe nabbisara si ya'u! Sarangkanambone apan uasemodda isindi maola'a matatiala.”

²⁹Wua'udde i Ahab ratun Israel, wuṛṛu i Yosafat ratun Yehuda inaite namangalo soan Ramot su Gilead.

³⁰I Ahab nabbisara si Yosafat, “I ya'u sarun mattingkalalitudda wuṛṛu inai lai mapapangalo, arawe Tuṛṛangnga ṛinone malluṛṛe laubbu awawantuga.” Etearoddi ratun Israel nailal᷊ihidda sutempo i tou inai mapapangalo.

³¹Sutempo udde siri talun pul᷊o dua tembonanu tantara kereta pangalon Siria buatte niparentannu ratune inai tumba'u mamangalo ratun Israel.

³²Ana waugu udde su tempo i mangitou naasilo i Ratu Yosafat, i mangitou massunna i tou ratun Israel. Waugu udde i mangitou namangalo si tou. Arawe i Yosafat nangintul᷊i,

³³ne i mangitou naatutukka manungku i tou wal᷊ine ratun Israel. Ana see i mangitou naddote namangalo si tou.

³⁴Ringannu tawe nipattatudda sangkatou tantaran Siria namiti'u anaanne, ringannu tawe nitarangnga su tampa apan pappandumanne. Arawe anaanna udde napansakka si Ahab wuṛṛu nallappassa su laubbu pangalone su passampaanne. “I ya'u naṛṛinoanne!” aintul᷊in Ahab su mangangapiddu keretane. “Welenga'e wuṛṛu apira'e i ya'u sumabbangnga wuassu tampa papangaloanna!”

³⁵Arawe ana waugu pangalo ta'e allalosone, Ratu Ahab sidutu uarisikka lapiddu sasenganna sulal᷊ummu keretane uasaruanna tantaran Siria. Daṛṛane mangngelekka wuassu lessane, nangammon apampakku kereta. Su wawallone i tou nate.

³⁶Napawe matannallo umattuppe anambon tantaran Israel niparentanna mapul᷊e watukku soane sambau-sambau,

³⁷ana waugu ratu natete. Ana see i mangitou napul᷊ete wuṛṛu nallabbingngu winal᷊unanni Ahab su Samaria.

³⁸Sutempo keretan niwaresi su li'un Samaria, manga wawine masandaga tantal᷊anna mandeno isudde, wuṛṛu manga asu mallewa daṛṛa su kereta udde, mangke naṛṛino ere buatte niwisaran MAWU.

³⁹Watti'a waine su ola'i Ratu Ahab, su ola'u wal᷊en araratuanna wuassu gadinga wuṛṛu anambon soa apan niapararisikke, buatte niwoṛṛetta sulal᷊ummu wuke Watti'u Mararatun Israel.

⁴⁰Napawe Ahab natete, Ahazia anangnge naola'a ratu nallol᷊ossa si tou.

⁴¹Su tonna aiappanne pamamarentan Ahab ratun Israel, i Yosafat ana'i Asa naola'a ratu su Yehuda.

⁴²Sutempo udde uukki tou tallun pul᷊o l᷊ima sutonnane. I tou uaparenta su Yerusalem duan pul᷊o l᷊ima sutonnane al᷊annune. Inangngene eteudde Azuba ana'i Silhi.

⁴³Nangaṛṛussa si Asa, iamangnge, Yosafat ma'ola'a apa apan mapia su aellegu MAWU. I tou napaawul᷊i wuassu araratuanne anambon sumasandaga esakka wuṛṛu wawine apan mammanara su manga tampa pasasubbanna paal᷊uanna apan ta'e pia lambene wuassu tempon Asa, iamangnge. Arawe manga tampa pasasubbanna udde sassane tawe nihohakke. Tumana'a ta'e sidutu mangngonggollu sasamba wuṛṛu amania poiaroddi. I Yosafat na'ola'a manga apallu Tarsis inai mangal᷊appa wul᷊awanne wuassu Ofir, arawe manga apalla udde tawe nariaddi nassenggotta ana waugu nahohakka su Ezion-Geber. Ratu Ahazia wuassu Israel naddorongnga lal᷊oṛṛon apalle massenggotta suaddio'a ringannu lal᷊oṛṛon apalli Yosafat, arawe i Yosafat nanola'a salaiwe i tou pia pa'a'aukka mapia ringannu ratun Israel. Wua'udde i Yosafat natete wuṛṛu nilabbinga su labbingu manga ratu su soan Daud. I Yoram anangnge naola'a ratu nallol᷊ossa si tou. Watti'a waine su ola'i Yosafat, su ola'u awawaṛṛanine wuṛṛu manga papangalone niwoṛṛetta sulal᷊ummu wuke Watti'u Mararatun Yehu(...)

⁴⁴

⁴⁵

⁴⁶

⁴⁷

⁴⁸

⁴⁹

⁵⁰

⁵¹

⁵²Su tonna mapul᷊o pitu pamamarentan Datu Yosafat wuassu Yehuda, i Ahazia ana'i Ahab naola'a ratun Israel ana see namarenta Israel al᷊annune rua tonna su Samaria.

⁵³I tou na'ola'a rosa su MAWU ringannu nangaṛṛussa iamangnge wuṛṛu inangngene wuṛṛu nangaṛṛussa si Ratu Yerobeam apan pangillul᷊eanne taumatan Israel na'ola'a rosa.

⁵⁴I tou massubba si Baal wuṛṛu massuṛṛubbawa si tou. Wuṛṛu ere lai iamangnge apan namarenta paarorone, i tou lai naparantan asasa'u MAWU, Ruata apan sassubbannu taumatan Israel.