Read Talaud 1 MARARATU 5 Bible Online

1 MARARATU 5 - Talaud bible

1 MARARATU 5

¹I Hiram, ratun Tirus, sidutu uahahawen Ratu Daud. Sutempo i Hiram naaringikka manungku i Salomo naola'e ratu nallol᷊ossa si Daud, iamangnge, i tou nandolokku taumata inai ringanni Salomo.

²Ana see i Salomo lai nangirimmu tanata indi si Hiram,

³“Ratu Hiram Apan Mawantuga! Asinungka i Tuangnga masingkatta manungku iamangku Daud ringannu nipabbawata'a mapapangalo ana waugu pappangaloannu seeta wuassu manga wanua su al᷊indongani yami. Wuṛṛu ana waugu MAWU taambe nangonggollu auntunganna si tou su anambon seenne, i tou tawe tempo mandarisikku wal᷊en maola'a tampa papataṛṛamawuanna su MAWU Ruatane.

⁴Arawe orassa indi MAWU Ruata'u buatte nangonggollu atatammudda su ahewallu leta'a paparentangku. I ya'u tawe seetta, wuṛṛu tawe lai asasilaka apan maṛṛia'a su wanua'u.

⁵MAWU buatte naddiandi arendi su iamangku Daud, “Anangngu apan Ta'u itenega maola'a ratu mallol᷊ossa si'o sarun mapararisikku wal᷊en tampa patataṛṛamawuanna si Ya'u.” Ana waugu udde, Tuangnga Hiram Apan Mawantuga, i ya'u, Salomo, buatte nakkawessa mapararisikku wal᷊en udde.

⁶I Tuangnga lai masingkatta manungku suwallattu tumana'u wanua'u taweddu masingkatta manuwangnga alu ere tumana'i Tuangnga. Ana waugu udde, i ya'u maddorongnga antimanna i Tuangnga mandolokku manga taumatan Tuangnga manuwangnga manga alun cemaran Libanon ionggolla si ya'u. Tumana'u sarun ta'u irolokka massumbala si mangitou, wuṛṛu salaiwe pira lal᷊antakke apan buatte nitantunni Tuangnga ipamaekka manga taumatan Tuangnga udde, i ya'u sarun mamaekka.”

⁷I Hiram mal᷊uassa atonna napawe naaringikka watti'a udde. I tou nabbisara, “Paddalote MAWU allo indi, ana waugu I tou nangonggolla si Daud sangkatou esakka apan lembon pande maola'a ratu su walahanna apan bahewalla udde.”

⁸Ana see i Hiram nangirimmu sasimbakke indi si Salomo, “I ya'u buatte nanengkamma watti'a darorongngi Tuangnga. I ya'u sarun manaddia alu cemaran Libanon wuṛṛu alu cemara wiasa uasul᷊ungngu darorongngi Tuangnga.

⁹Manga taumata'u sarun mangapiddu alu udde sumossokka wuassu Libanon watukku tahal᷊oangnga. Isudde manga potottu alu udde sarun wa'isanni mangitou maola'a ṛumbanna wuṛṛu iapa'elekki mangitou su winggin tahal᷊oangnga watukku tampa apan buatte nitantuni Tuangnga. Poiaroddi manga ṛumbanna isongkaka wuṛṛu itantila sumanga taumatan Tuangnga see urusanna sara marampiga. Wuassu samba'an Tuangnga, i ya'u maddorongnga tadea'u i Tuangnga manaddia anna su manga taumata lal᷊oṛṛon wal᷊en araratuangku.”

¹⁰Ne i Hiram nangonggolla si Salomo anambon alu cemaran Libanon wuṛṛu alu cemara wiasa apan pappandumanna.

¹¹Wuṛṛu su ipangonggollu anna su manga taumata lal᷊oṛṛon wal᷊en araratuanni Hiram udde, suapan tonna i Salomo manantilla si Hiram 322.500 su kilone gandumma wuṛṛu 4.400 litere lanan zaitun tutune.

¹²MAWU nanipussa pa'aire-Ne wuṛṛu nangonggollu asingkatta si Salomo. Suwallatti Hiram wuṛṛu i Salomo pia pa'a'aukka mapia, wuṛṛu itarua buatte na'ola'a sasampa'u pa'aire.

¹³I Ratu Salomo napasabbangngu 30.000 su atoune esakka wuassu ahewallu Israel hunan pamamanara sukarela,

¹⁴wuṛṛu namile si Adoniram maola'a mandariagga si mangitou. I Salomo nattahia si mangitou sulal᷊ummu tallun kawageanganna, sambau-sambau anambone mapul᷊o riwu suatoune. Wageangnge tatallu udde ringannu ualal᷊ol᷊ossa matana'a sambul᷊anna su Libanon wuṛṛu rua wul᷊anna su wal᷊en.

¹⁵I Salomo napasabbangngu lai 80.000 suatoune mamamaangnga watu wuassu wowone wuṛṛu 70.000 suatoune iapapasanna manga watu udde.

¹⁶I tou namile 3.300 mandore iapariaga manara udde.

¹⁷Wuassu parentane lai i mangitou namaangnga manga watu wahewalla apan mangkapia olaanna rapappakku Wal᷊en MAWU.

¹⁸Etearoddi manga mammamanaran Salomo wuṛṛu manga mammamanaran Hiram see manga taumata wuassu soan Gebal nanaddia watu ipa'ola'a Wal᷊en MAWU udde.