Read Talaud 1 MARARATU 6 Bible Online

1 MARARATU 6 - Talaud bible

1 MARARATU 6

¹I Salomo mannattake mapararisikku Wal᷊en MAWU su wul᷊anna Ziw, eteudde wul᷊anna aruane, sulal᷊ummu tonna aiappanne i tou uaparenta, 480 su tonnane napawe walahannu Israel nanantangngu Mesir.

²Uuṛṛannu Wal᷊en MAWU, wageangngu lal᷊umme ere mannsunna indi: al᷊o'engnge 27 metere, al᷊alakke 9 metere, wuṛṛu atanggakke 13,5 metere.

³Su wageanggu saruannu Wal᷊en MAWU udde pia balai apan al᷊o'engnge 4,5 metere wuṛṛu al᷊alakke 9 metere, ere al᷊alakku wal᷊en udde lai.

⁴Su darandungngu wal᷊en udde pia manga loṛṛangngu sungketa apan mal᷊alakka watukku lal᷊umme.

⁵Uapal᷊iwutta wageangngu liuddu wal᷊en udde, su darandungngu samba'an liudde pia wabbo'a aaraṛṛengketan. Pia tatallu ṛengkenne, sambau-sambau atanggakke 2,2 metere.

⁶Su ṛengkenne paarorone, al᷊alakku suapan wabbo'ane, 2,2 metere, wuṛṛu ṛengkenne aruane 2,7 metere wuṛṛu su ṛengkenne attallune 3,1 metere. Darandungnga al᷊iu wowane maappal᷊anna wuassu darandungnga al᷊iu rosone, na'oman sara manga sal᷊aba'u wabbo'a nitamba udde wotongnge isampa'u darandungngu Wal᷊en MAWU udde ringannu tawe malloṛṛangnga darandungnga udde.

⁷Su manga sal᷊aba'u udde nipaatta alu cemaran Libanon. Ngara manga wabbo'a tatambane su ṛengkenne wowane addone su samba'an timukka, wuṛṛu su ṛengkenne aruane wuṛṛu atallune tuadda niandongnga. Wua'udde i Salomo na'ala'a pangkettu wal᷊en udde. Su manara udde i tou nappa'attu manga aso wuṛṛu pappalla wuassu alu cemaran Libanon. Su al᷊annune Wal᷊en MAWU udde a'olaanna, mangke tawe aringiṛṛanna tingikku darupa, papaangnga ara'e ahidda atta'a, ana waugu manga watu apan nipaata su bangunana udde buatte nisaddia paarorone sutempo ta'e su manga pa'al᷊ianne. Etearoddi i Salomo napararisikku Wal᷊en MAWU na'oman sara nasue.

¹¹Ne MAWU nabbisarate si Salomo,

¹²“Amungkangngu i'o matuṛṛutta su anambon tita wuṛṛu parenta-U, i Ya'u, sarun ma'ola'a si'o apa apan buatte Ta'u pina'ire su iamangngu Daud.

¹³I Ya'u sarun matana'a su wal᷊en apan niolangngu indi su pattangngannu uma-U Israel. I Ya'u tawe manantangngi mangitou.”

¹⁴Etearendi i Salomo nanginsue Wal᷊en MAWU udde:

¹⁵Ahewallu darandungnga su wageangngu lal᷊umme nilapisanni tou ringannu alun cemaran Libanon, manattakka wuassu apampakke maddatingngu pangketta. Apampakke niola'a wuassu alu cemara wiasa.

¹⁶Sulal᷊ummu wal᷊en udde, su wageangngu liudde niola'a wabbo'a ringannu napararisikku darandungnga wawallanne wuassu alu cemara, manattaka wuassu apampakke maddatingngu pangketta. Wabbo'a udde nisaggo Wabbo'a Lembon Susi; al᷊o'engnge sio metere.

¹⁷Wabbo'a su saruannu Wabbo'a Lembon Susi udde nisaggo Wabbo'a Wahewalla, wuṛṛu al᷊o'engnge 18 metere.

¹⁸Darandungnga su wageangngu lal᷊umme su ahewallu wal᷊en udde nilapisannu alu cemaran Libanon, na'oman sara manga watu su darandungnge tawe asiloanna saran addio'a. Lal᷊apissa udde nilogaṛṛannu wuan labu ni'uitta wuṛṛu manga bunga matti'akka.

¹⁹Wabbo'a Lembon Susi apan niola'a sulal᷊ummu Wal᷊en MAWU udde nisaddia pangaddoannu Wantallu Pa'airen MAWU.

²⁰Wabbo'a udde al᷊o'engnge, al᷊alakke wuṛṛu atanggakke nassul᷊ungnga, eteudde sio metere. Mezbah su saruannu Wabbo'a Lembon Susi udde niola'a wuassu alu cemaran Libanon. Su ngara sasuttanna watukku wabbo'a udde niwatadda ṛate wulananna. Ahewallu wageangngu lal᷊ummu Wal᷊en MAWU udde nasutta Wabbo'a Lembon Susi wuṛṛu mezbahne nilapisannu wul᷊awanna tutune.

²³Sulal᷊ummu Wabbo'a Lembon Susi udde niaddo lai darua paal᷊uannu mala'ekatta apan niola'a wuassu alu zaitun. Paal᷊uanna darua udde sambau-sambau atanggakke 4,4 metere;

²⁴uuṛṛanne wuṛṛu sarṛṛene nassul᷊ungnga. Sambau-sambau uatahuanna darua papaidda, suapan papaidda udde 2,2 metere al᷊o'engnge. Wallattu darua pentakku papaidda wuassu paal᷊uanna darua udde 4,4 metere.

²⁷Paal᷊uanna darua udde niaddo uasasandiṛṛannu Wabbo'a Lembon Susi na'oman sara sambau papaidda wuassu paal᷊uanna sambau udde ua'eṛṛetta su darandungnga, wuṛṛu papaida mala'ekatta udde nilapisannu wul᷊awanna.

²⁸Darua paal᷊uannu mala'ekatta udde nilapisannu wul᷊awanna.

²⁹Ahewallu darandungnga wageangngu lal᷊ummu Wal᷊en MAWU nilogaṛṛannu manga mala'ekatta ni'uitta, wuṛṛu manga punnu alu palem, wuṛṛu manga bunga apan matti'akka.

³⁰Rapappake sulal᷊ummu Wal᷊en MAWU udde sarangkanambone nioossu wul᷊awanna.

³¹Su ngara suttanna watukku lal᷊ummu Wabbo'a Lembon Susi udde niele ruan kul᷊appa ngara wuassu alun zaitun. Sasuttanna su ngara udde wageangnge al᷊iu rosone saṛṛene ual᷊e'onna matakko'a su pattangnganne.

³²Ruan kul᷊appa ngara udde nilogaṛṛannu ukirannu mala'ekatta, punnu alu palem wuṛṛu manga bunga matti'akka. Rongngu ngara, paal᷊uanna mala'ekatta wuṛṛu ukirannu manga alu palem, sarangkanambone nilapisannu wul᷊awanna.

³³Su ngara suttanna watukku lal᷊ummu wabbo'a su saruanne, eteudde wabbo'a wahewalla, niele bingken ngara wuassu alu zaitun, saṛṛene uataṛṛawu'u appatta mal᷊o'engnga.

³⁴Niola'a lai ruan kul᷊apa rongngu ngara wuassu alu cemara wiasa, apan sambau-sambau wotongnge lappuanna.

³⁵Manga rongngu ngara udde nilogaṛṛannu ukirannu mala'ekatta, punnu alu palem wuṛṛu bunga apan matti'akka. Anambon ukiranna udde nilapisannu wul᷊awanna.

³⁶Su saruannu Wal᷊en MAWU udde niola'a rallakku lal᷊umme. Rallakka udde papal᷊iwutannu darandungnga apan ual᷊al᷊apissa; su wowone suapan tallun lapissa watu, pia sallapissa alu cemaran Libanon.

³⁷Rapappakku Wal᷊en MAWU udde niola'a su wul᷊anna Ziw, eteudde sul᷊anna aruane, sulal᷊ummu tonna aiappanne pamamarentan Salomo.

³⁸Wuṛṛu napawe su wul᷊anna Bul, eteudde wul᷊anna aualune, sulal᷊ummu tonna mapul᷊o assa pamamarentane, nasuete Wal᷊en MAWU udde niola'i Salomo, nassul᷊ungnga ere buatte niṛṛiinna. Pandararisikku wal᷊en udde naddorongnga tempo al᷊annune pitu tonna.