Read Talaud 1 MARARATU 9 Bible Online

1 MARARATU 9 - Talaud bible

1 MARARATU 9

¹Napawe Salomo nuddusse napararisikku Wal᷊en MAWU wuṛṛu wal᷊en araratuanne see anambon apan nihol᷊age,

²MAWU naipasilon batangan-Ne apia si tou ere buatte nariaddi su Gibeon.

³MAWU nabbisara si tou, “Aal᷊iomannu buatte Ta'u niraringiṛṛanna, wuṛṛu ringannu indi wal᷊en apan buatte naiapararisikku indi Ta'u isaggo tampa al᷊aṛṛaene hunan patataṛṛamawuanna si Ya'u saran mal᷊annu-l᷊annu. I Ya'u sidutu ua'ellega wuṛṛu ual᷊u'adda tampa indi.

⁴Amungkangngu i'o mangngimanna si Ya'u ringannu naungnga mal᷊uassa wuṛṛu matul᷊idda ere iamangngu Daud, wuṛṛu i'o matuṛṛutta su manga tita wuṛṛu matul᷊idda ere iamangngu Daud, wuṛṛu i'o matuṛṛutta su manga tita wuṛṛu manga parenta-U,

⁵ne i Ya'u sarun manipussu pa'aire-U su iamangngu Daud manungku ana'a pulunne sidutu sarun mamarenta Israel.

⁶Arawe amungkangngu i'o wuṛṛu papapulunna tumal᷊iudda si Ya'u wuṛṛu tawe tumuṛṛutta manga tita wuṛṛu manga parenta-U see i'o lai massubba manga mawu waine,

⁷ne i Ya'u sarun mallimbuakka uma-U wuassu wanua apan buatte Ta'u nionggolla si mangitou. I Ya'u lai sarun manantangngu wal᷊en indi apan buatte Ta'u nitantunna maola'a tampa patataṛṛamawuanna si Ya'u. Suapan tampa taumatan Israel sarun lobbosanna wuṛṛu ilallage.

⁸Wal᷊en patataṛṛamawuanna indi sarun maola'a ere winal᷊al᷊anna niomboanna na'aman sara suapan taumata apan sumabbi isudde sarun ṛumindu'a wuṛṛu mata'utta. I mangitou sarun mabbisara, ‘Anio MAWU na'ola'a aroddi su wanua wuṛṛu su wal᷊en indi?’

⁹Ana see taumata sarun sumimbakka, ‘Ana waugu i mangitou nanantangngu MAWU, Ruatan mangitou, apan buatte nanguntuddu al᷊amonan mangitou sinumabbangnga wuassu Mesir. I mangitou massubba manga mawu waine. Ana waugu udde MAWU nandantan asasilaka indi si mangotou.’ ”

¹⁰I Salomo napararisikku Wal᷊en MAWU wuṛṛu wal᷊en araratuanna sulal᷊ummu tempo ruan pul᷊o sutonnane.

¹¹Anambon alu cemaran Libanon wuṛṛu alu cemara wiasa see anambon wul᷊awanna apan pappandumanni Salomo su wal᷊en udde buatte nionggolli Ratu Hiram si tou. Napawe manara udde nasuete, i Ratu Salomo nangonggolla si Hiram ruan pul᷊o soa su wageangngu Galilea.

¹²Ne i Hiram inaite na'ellega, arawe i tou tawe mal᷊uassu aonggolla udde.

¹³I tou nabbisara si Salomo, “Tuṛṛangku, ete arendi olangnge manga soa apan nionggollu si ya'u?” Ana waugu udde wageangngu leta'a udde ta'e isassaggo Kabul.

¹⁴Nilumebbe wuassu 4.000 su kilone wul᷊awanna buatte niiringngi Hiram si Salomo.

¹⁵I Ratu Salomo nappaattu ola'u manara iwabbata'a su pina'ola'a Wal᷊en MAWU, wal᷊en araratuanna, darandungngu Yerusalem su ipangombo leta'a su samba'a timukku Wal᷊en MAWU. I tou nappaattu olangnge apan uasul᷊ungnga pina'ola'a apia soan Hazor, Megido wuṛṛu Gezer. (

¹⁶Soa Gezer eteudde soa apan dorone nipangaloanna wuṛṛu niwaddon ratun Mesir, ana see tumanangnge nipate wuṛṛu soane nisoṛṛobba. Soa udde murine nionggollu ratun Mesir su sangianne naola'a aonggolla su allo paa'awingnge ringanni Salomo.

¹⁷Wuṛṛu ete i Salomo apan na'ola'a apia soa udde.) Ringannu manara niwata'a lai, i Salomo na'ola'a apia Bet-Horon-Hilir,

¹⁸Baalat, Tamar su wadda'u Yehuda,

¹⁹manga soa pangaddoannu wal᷊unna, see manga soa pangaddoanu keretan pangalo wuṛṛu awal᷊one. Anambon hol᷊agu wal᷊en su Yerusalem, Libanon, wuṛṛu ahewallu wageangngu leta'a paparentanne buatte nimanarane.

²⁰Su manara iwabbata'a arae paksa udde i Salomo napasabbangngu manga taumata papapulunnu taumatan Amori, Het, Feris, Hewi wuṛṛu Yebus. I mangitou uddewe papapulunnu walahannu Kanaan apan tawe niapaten taumatan Israel abbi sutempo i mangitou napanganu wanua udde. Naddatingngu orassa indi papapulunni mangitou ta'e naola'a allangnga.

²²Taumatan Israel tawe niola'i Salomo allangnga; i mangitou niapamanara maola'a tantara, piaṛṛa'u tantara, tembonannu tantara, piaṛṛa'u keretan pangalo, wuṛṛu tantara uasa'e awal᷊o.

²³Lima ṛasutta liman pul᷊o mammamanaran araratuanna nionggol᷊annu manara mandiaga taumata apan mammanara iwabbata'a sulal᷊ummu al᷊awo'u manaran Salomo.

²⁴Leta'a su samba'a timukku Wal᷊en MAWU niomboanni Salomo napawe awingnge, eteudde sinangiannu ratun Mesir, nangingkatta wuassu Soan Daud watukku wal᷊en araratuanna apan niola'i Salomo hunan tou.

²⁵Paatallu santonna i Salomo mangngonggollu sasamba itattambunna wuṛṛu sasamban paddarame su wowom mezbah apan buatte niolangnge hunan MAWU. I tou nanutungnga lai amania hunan MAWU. Etearoddi Salomo nanginsue pandararisikku Wal᷊en MAWU.

²⁶Su ammul᷊annu apalla, Ratu Salomo nallanginnu manga apalla su Ezion-Geber, maranin Elot su apannu Eṛṛesannu Akaba, wageangngu leta'u Edom.

²⁷I Ratu Hiram nangirimmu mammamanaran apalle apan piate asingkanne su tahal᷊oangnga suaddio'a ringannu manga mammamanaran apalli Salomo.

²⁸Su paassa i mangitou buatte nassenggotta watukku wanua Ofir mangal᷊appa 14.000 su kilone wul᷊awanna wuṛṛu niapidda ringanni Salomo.