Read Talaud 2 MARARATU 1 Bible Online

2 MARARATU 1 - Talaud bible

2 MARARATU 1

¹Napawe i Ahab ratun Israel natete, ne wanua Moab namangalo Israel.

²Su allo sambau i Ratu Ahazia wuassu Israel nanawo wuassu panumbal᷊e al᷊iurosone wuassu wal᷊en araratuanna su Samaria, na'oman sara i tou nal᷊essa wahewalla. Ne i tou nandolokku taumata iapaiwal᷊o si Baal-Zebub, mongannu soan Ekron su Filistin, tanne i tou mapia wuassu radda'a ara'e tawe.

³Arawe mala'ekattu MAWU nandolokki Elia, nabi wuassu Tisbe, inai maisasomban manga daroloṛanni Ratu Ahasia iapawisara, “Apa su Israel tawe Ruata, na'oman sara i yamiu inai maddorongnga tatantiro si Baal-Zebub, mongannu soa Ekron udde?

⁴Wal᷊oa'a su ratu manungku MAWU nabbisara arendi, ‘I'o sarun tawe mapia, i'o sarun mate!’ ” Napawe i Elia napaamatten parentan MAWU udde,

⁵manga daroloṛanna udde nabelengke ringannu ratu, ana see ratu naiwal᷊o, “Anio i yamiu nabelengnga?”

⁶I mangitou sinumimbakka, “Sangkatou esakka nirumanta naisasomban kami, wuṛṛu nandolokki yami niapawelengnga wuṛṛu iapawal᷊o si Tuanga manungku MAWU nabbisara arendi si Tuanga, ‘Apa su Israel tawe Ruata, na'oman sara i'o nandolokka iaparoronga tatantiro wuassi Baal-Zebub, mongannu soan Ekron? I'o tawe mapia wuassu radda'a, i'o sarun mate!’ ”

⁷“Ereapa saṛṛen taumata udde?” aiwal᷊on datu.

⁸“I tou ualuṛṛen Juba wuṛṛu aiittu lawanne niola'a wuassu pisin binatangnga,” sasimbakki mangitou. “O, udde i Elia!” sasimbakku ratu.

⁹Ana see i tou nandolokku sangkatou tembonannu tantara wuṛṛu siri liman pul᷊o tantarane inai iapasametta si Elia. Tembonannu tantara udde inaite ana see naaratingnga si Elia tantal᷊anna ua'ianna su sambau wuidda. “Ei, allangu Ruata,” wisaran tembonannu tantara udde, “ratu nandolokka i'o iapasossokka!”

¹⁰“Amungkangu i ya'u indi atonna allangu Ruata,” sasimbakki Elia, “ṛinone putungnga sumossokka wuassu langitta wuṛṛu manutungnga si'o see lai anambon mallal᷊aṛṛenggenu ma'oman sara masue!” Orassa udde lai sinumossokke putungnga wuṛṛu nanutungnga tembonannu tantara udde see lai siri liman pul᷊o su atoune tantarane.

¹¹Ana see ratu nandolokku sangkatou tembonannu tantara waine wuṛṛu siri liman pul᷊o tantarane lai. I mangitou inaite wuṛṛu nabbisara si Elia, “Ei, allangngu Ruata, ratu mammarenta si'o iapasossokka orassa indi lai!”

¹²“Amungkangu atonna i ya'u allangngu Ruata,” sasimbakki Elia, “ṛinone putungnga sumossokka wuassu langitta wuṛṛu manutungnga si'o see lai anambon mallal᷊aṛenggenu ma'oman sara masue!” Orassa udde lai sinumossoke putungnga wuassu Ruata wuṛṛu nanutungnga tembonannu tantara udde see lai siri liman pul᷊o tantarane na'oman sara masue.

¹³Paassa lai ratu nandolokku sangkatou tembonannu tantara wuṛṛu siri liman pul᷊o tantarane. Tembonanne udde sinumaate su wuidda wuṛṛu napawe na'omate ringanni Elia i tou niumal᷊intudda wuṛṛu nabbisara, “Ampungewe yami, oh allangu Ruata! Akkanaawe i ya'u wuṛṛu mallal᷊aṛenggengku indi. Ariewe mamate siyami!

¹⁴Ruan katou tembonannu tantara ara'e perwira waine suadio'a ringannu tantaran mangitou nate niepoddu putungnga wuassu langitta, arawe i ya'u sumal᷊ande, akkanaawe i ya'u!”

¹⁵Su orassa udde lai mala'ekattu MAWU nabbisarate si Elia, “Arie pa'ata'utta! Tantalongke si tou sumossokka wuassu wuidda indi.” Ana waugu udde i Elia inaite suadio'a ringannu tembonannu tantara udde inaite ringannu ratu.

¹⁶Ana see i Elia nabbisara ratu, “MAWU nabbisara, ‘I'o nandolokku taumata niaparoronga tatantiro si Baal-Zebub mongannu soan Ekron naal᷊ihidda su Israel tawe Ruata pa'iwal᷊oanna. Ana waugu udde i'o tawe mapia wuassu radda'a, i'o sarun mate!’ ”

¹⁷Ne i Ahazia natete ere buatte nipasingkattu MAWU wuassi Elia. Ana waugu i Ahazia tawe ana'a esakka, ne Yoram tuṛangnge naola'a ratu nallol᷊ossa si tou. Udde nariaddi su tonna aruane Yehoram ana'i Yosafat, ratun Yehuda uaparenta.

¹⁸Watti'a waine su inolaanni Ratu Ahazia niwoṛetta sulal᷊ummu wuken Watti'u Mararatun Israel.