Read Talaud 2 MARARATU 15 Bible Online

2 MARARATU 15 - Talaud bible

2 MARARATU 15

¹Su tonna aruam pul᷊o pitune sutempo i Ratu Yerobeam II uaparenta su Israel, i Uzia ana'i Amazia naola'a ratun Yehuda.

²Sutempo udde uukki tou 16 su tonnane wuṛṛu namarenta su Yerusalem 52 su tonnane al᷊annune. Inangnge aranne i Yekholya, wawinen Yerusalem.

³Nangaṛṛussa iamange, i Uzia lai inolaanne ma'al᷊uassa naungngu MAWU.

⁴Arawe tumba'u sangkule eteudde i tou tawe nanggohakku manga tampa pasasubbanna monganna, na'oman sara tumanange sidutu mangngonggolu sasamba wuṛṛu mannambunu amania isudde.

⁵MAWU nangonggola si tou radda'a su pisi apan ma'ata'utta, na'oman sara i tou natete, raddange udde tawe mapia. I tou niṛṛae su sambau wal᷊en wuṛṛu niwala aroddi wuassu manarane. I Yotam anangnge namarenta tumanange naola'a sangkatou tepellu ratu.

⁶Watti'a waine su ola'i Ratu Uzia niwoṛṛeta sulal᷊ummu wuke Watti'u Mararatun Yehuda.

⁷I Uzia nate ana see nilabbinga su labbingu mararatun so Soan Daud. I Yotam anangnge naola'a ratu nallol᷊ossa si tou.

⁸Su tonna atallum pul᷊o ual᷊u i Ratu Uzia namarenta su Yehuda, i Zakharia ana'i Yerobeam II naola'a ratu su Israel wuṛṛu namarenta su Samaria annumu wul᷊anna al᷊annune.

⁹Ere lai manga ratu apan namarenta dorone wuassi tou, i tou lai na'ola'a rosa su MAWU. I tou nangaṛṛussa al᷊al᷊eon Ratu Yerobeam I, apan naaola'a Israel narosa.

¹⁰I Salum ana'i Yabes naammula mando'appa si Ratu Zakharia wuṛṛu namate si tou su Yibleam, ana see naola'a ratu nallol᷊ossa si tou.

¹¹Ringannu aroddi natipusse apa apan buatte pina'iren MAWU si Ratu Yehu manungku ana'a, pulunne, ma'oman sara pallal᷊awanne aiappanne sarun maola'a ratu su Israel. Watti'a waine su ola'i Ratu Zakharia, niwoṛetta sulal᷊ummu wuke Watti'u Mararatun Israel.

¹³Su tonna atallum pul᷊o sione sutempo i Ratu Uzia uaparenta Yehuda, i Salum ana'i Yabes naola'a ratun Israel. I tou namarenta su Samaria tumba'u sambul᷊anna,

¹⁴ana waugu Menahem ana'i Gadi nanantangu Tirza inai watukku Samaria, ana see namate si Salum, wuṛṛu naola'e ratu nallol᷊ossa si tou.

¹⁵Sulal᷊ummu amatanne wuassu Tirza, i Menahem nanggohakku soan Tifsah wuṛṛu manga wageangu leta'a maranine see lai namate tumanange sarangkanambone. Ana waugu soa udde maddiri massuṛṛubawa si tou, ne i tou nangua tiannu manga wawine pia illoṛṛone su soa udde. Watti'a waine su ola'i ratu Salum, nasutta lai manga ringanne, niwoṛṛetta sulal᷊ummu wuke Watti'u Mararatun Israel.

¹⁷Su tonna atallum pul᷊o sione sutempo i Ratu Uzia uaparenta Yehuda, i Menahem ana'i Gadi naola'a ratun Israel, wuṛṛu namarenta su Samaria 10 su tonnanne al᷊annune.

¹⁸Su al᷊o'engngu pabbiaṛṛanne i tou na'ola'a rosa su MAWU nangaṛussa al᷊al᷊eon Yerobeam I, apan naaola'a taumatan Israel narosa.

¹⁹Sutempo i Pul ratun Asyur namangalo Israel, i Menahem nangonggola si tou 34.000 su kilone sal᷊a'a tadea'u i tou massumbala mapatenegu taṛinon Menahem su Israel.

²⁰Ereapa lal᷊anne i Menahem maasomba roitta, eteudde ringannu mammata'u manga taumata ala su Israel sangkatou mangonggolu liman pul᷊o roitta sal᷊a'a. Ana waugu udde i Pul nanantangu wanua udde wuṛṛu napul᷊ete watukku wanuane sassane.

²¹Watti'a waine su ola'i Ratu Menahem niwoṛṛetta sulal᷊ummu wuke Watti'u Mararatun Israel.

²²I tou nate wuṛṛu nilabbinga, ana see i Pekahya anangnge naola'a ratu nallol᷊ossa si tou.

²³Su tonna alimam pul᷊one i Ratu Uzia uaparenta su Yehuda, i Pekahya ana'i Menahem naola'a ratun Israel wuṛṛu namarenta su Samaria rua tonna al᷊annune.

²⁴I tou na'ola'a rosa su MAWU ana waugu nangaṛṛussa al᷊al᷊eon Datu Yerobeam I, apan naaola'a taumatan Israel narosa.

²⁵Sangkatou suwallatu manga tembonannu tantarane, eteudde i Pekah ana'i Remalya, naammulu siri 50 su atoune wuassu Gilead. Ana see sulal᷊ummu sambau tanda'a watu su wal᷊en araratuannu Samaria i mangitou namate si Pekahya wuṛṛu ruan katou waine aranne Argob wuṛṛu i Arye. Wua'udde i Pekah naola'e ratu nallol᷊ossa si Pekahya.

²⁶Watti'a waine su ola'i Ratu Pekahya niwoṛṛetta sulal᷊ummu wuken Watti'u Mararatun Israel.

²⁷Su tonna alimam pul᷊o duane sutempo i Ratu Uzia uaparenta su Yehuda, i Pekah ana'i Remalya naola'a ratun Israel. I tou namarenta su Samaria 20 su tonnane al᷊annune.

²⁸I tou na'ola'a rosa su saruannu MAWU ana waugu nangaṛṛussa al᷊al᷊eon Datu Yerobeam I apan naaola'a Israel narosa.

²⁹Sutempo i Pekah uaparenta, i Tiglat-Pileser ratun Asyur nangaṛo soan Iyon, Abel-Bet-Maakha, Yanoah, Kedes, Hazor, waageangu Gilead, Galilea wuṛṛu Naftali. Tumanange apan niasametta niaapidda lai watukku Asyur.

³⁰Su tonna aruam pul᷊one sutempo i Ratu Yotam ana'i Uzia uaparenta su Yehuda, i Hosea ana'i Ela na'ammula mando'appa si Ratu Pekah wuṛṛu namate si tou, ana see naola'e ratu nallol᷊ossa si tou.

³¹Watti'a waine su ola'i Ratu Pekah, niwoṛṛetta sulal᷊ummu wuken Watti'u Mararatun Israel.

³²Su tonna aruane sutempo i Ratu Pekah ana'i Remalya uaparenta su Israel, i Yotam ana'i Uzia naola'a ratun Yehuda.

³³Sutempo udde uukku tou 25 su tonnane wuṛṛu i tou namarenta su Yerusalem 16 su tonnane al᷊annune. Inang eteudde Yerusa ana'i Zadok.

³⁴I Yotam pallal᷊agune maal᷊uassa naungngu MAWU, ere lai i Uzia iamange.

³⁵Arawe tumba'u sangkule, manga tampa passubanna monganna tawe nihohakka na'oman sara tumanange sidutu mangangapiddu sasamba wuṛṛu mannambunnu amania isudde. Ete i Yotam apan napararisikku Ngara Pasallanganna su samba'an sawannaku Wal᷊en MAWU.

³⁶Sutempo i Yotam uaparenta, MAWU nanattake nandolokki Rezin ratun Siria wuṛṛu i Pekah ratun Israel iapapangalo Yehuda. Watti'a waine su ola'i Ratu Yotam niwoṛṛetta sulal᷊ummu wuke Watti'u Mararatun Yehuda.

³⁸I tou nate wuṛṛu nilabbinga su labbingu mararatu su Soan Daud. I Ahas anangnge naola'a ratu nallol᷊ossa si tou.