Read Talaud 2 MARARATU 17 Bible Online

2 MARARATU 17 - Talaud bible

2 MARARATU 17

¹Su tonna apul᷊o duane sutempo i Ratu Ahas uaparenta su Yehuda, i Hosea ana'i Ela naola'a ratun Israel, wuṛṛu i tou namarenta su Samaria, sio tonna al᷊annune.

²I tou na'ola'a rosa su saruannu MAWU, arawe rosane tawe ere anambon rosan manga ratun Israel apan namarenta nalliuṛṛoro wuassi tou.

³I tou nipangaloanna wuṛṛu niawaddon Salmaneser ratun Asyur, na'oman sara suapan tonna i tou ṛinone mamaekka wose si tou.

⁴Arawe su sambau tempo, i Hosea nandolokku daroloṛanna ringanni So ratun Mesir nadorongnga sasumbala. Ana see i Hosea naddote namaekka wose suapan tonna su Asyur. Napawe i Salmaneser naasingkata pallal᷊agun Hosea udde, i tou nanametta si Hosea wuṛṛu nitaṛṛo sulal᷊ummu tuttupanna.

⁵Wua'udde i Salmaneser ratun Asyur namangalo Israel wuṛṛu nalliwunna Samaria. Su tonna atallune wuassu patataliwunna udde,

⁶— apan maola'a tonna assione sutempo i Hosea uaparenta — i Salmaneser naapangaṛṛo Samaria. Ana see taumatan Israel niapidda naola'a ere taumata niawawi watukku Asyur. Sambageanganna wuassi mangitou niapaatana'a su soan Halah, sambageanganna maranin Sal᷊ukku Habor su leta'u Gozan, wuṛṛu sambageanganna lai su manga soa wanua Madai.

⁷Samaria narugi ana waugu taumatan Israel na'ola'a rosa su MAWU, Ruatan mangitou, apan buatte nanal᷊amatta si mangitou wuassu ratun Mesir, wuṛṛu nangapiddi mangitou sinumabbanga wuassu wanua udde. I mangitou massubba manga mawu waine

⁸wuṛṛu mattanno inanaramannu manga walahanna apan buatte nilimbuaṛṛannu MAWU sutempo walahannu Israel inai namangalo wanua udde. Walahannu Israel tuttuṛṛutta inanaramannu al᷊amona apan tinantunu manga ratun Israel,

⁹wuṛṛu ma'ola'a inolaanna apan isassingaddu MAWU, Ruatan mangitou. I mangitou napararisikku manga tampa pasasubbanna monganna su anambon soan mangitou, mawae su soa maradio'a aroddi lai su soa wahahewalla.

¹⁰Su wowon al᷊awo'u wuidda, wuṛṛu su al᷊ungngu aaluanna, i mangitou napararisikku manga pale wuṛṛu paal᷊uannu monganni Asyera.

¹¹I mangitou lai nanambunnu amania su anambon mezbah hunane tumba'u su monganna, ere inanaramannu manga walahanna apan buatte nilimbuaṛannu MAWU wuassu wanua Kanaan. I mangitou massubba paal᷊uanna, salaiwe MAWU buatte naningadda. Al᷊awo'u inolaanni mangitou apan dal᷊eo mandantan asasa'un MAWU.

¹²

¹³MAWU nandolokku manga daroloṛṛanna wuṛṛu manga nibi-Ne su walahannu Israel wuṛṛu Yehuda iapapasingkattu sasingadda indi: “Pangillol᷊ote ma'ola'a al᷊al᷊eo wuṛṛu tattuṛṛute al᷊awo'u parenta wuṛṛu tita apan Ta'u nionggola su al᷊amonanu wuṛṛu si yamiu wuassu manga nabi, manga allang-Ku udde.”

¹⁴Arawe Israel wuṛṛu Yehuda maddiri maddaringikka. Puan mangitou maatikka ere al᷊amonan mangitou tawe mangimanna MAWU, Ruatan mangitou.

¹⁵Israel wuṛṛu Yehuda maddiri tumuṛṛutta manga parentan MAWU wuṛṛu tawe tumuṛṛutta pa'aire apan buatte niolange ringannu al᷊amonan mangitou, ewe'e mattaṛṛamawu manga monganna tawe gunane, na'oman sara i mangitou sassane lai naola'a tawe gunane. I mangitou mannantuṛṛutta tul᷊adan manga walahanna su al᷊indonganni mangitou, salaiwe MAWU buatte naningadda.

¹⁶I mangitou nilumawanga anambon titan MAWU, Ruatan mangitou, wuṛṛu na'ola'a darua sapi wuassu logam subbanni mangitou. I mangitou nallanginnu paal᷊uannu Monganni Asyera, massubba manga winatanga wuṛṛu mattaṛṛamawu Mongannu Baal.

¹⁷I mangitou mangngonggolu manga al᷊aṛṛana'i mangitou maola'a sasamba itattambunna su monganna. I mangitou mappaattu wal᷊iimata wuṛṛu ma'itantiro su manga tararoti apan wotonge maaukku manga ghaṛṛaho. I mangitou aroddi aṛṛimadde ma'ola'a inolaanna apan tawe maal᷊uassa naungngu MAWU

¹⁸na'oman sara i Tou nasa'u atonna si mangitou wuṛṛu tate lai ma'ellega si mangitou. I Tou nandammen mangitou wuassu leta'a apan nionggoli Tou si mangitou; apan natantanga tumba'u araratuannu Yehuda.

¹⁹Manga taumatan Yehuda lai tawe tumuṛṛutta manga titan MAWU, Ruatan mangitou. I mangitou mattanno manga innanaramannu taumatan Israel,

²⁰ne MAWU lai tate nanga'u anambon walahannu Israel. I Tou nakkuumanna wuṛṛu nanantili mangitou su manga seetti mangitou apan mal᷊aṛṛaga. I Tou tate lai umakkanni mangitou, ewe'e i mangitou niramme wuassu leta'a apan buatte nionggoli Tou si mangitou.

²¹Napawe MAWU naṛṛaeten Israel wuassu Yehuda, taumatan Israel namile si Yerobeam ana'i Nebat naola'a ratun mangitou. Ana see i Yerobeam naaola'a si mangitou nanantangu MAWU wuṛṛu na'ola'e manga rosa apan bahewalla.

²²I mangitou tinumantalonga tul᷊adan Yerobeam wuṛṛu sidutu ma'ola'a anambon dosa apan niolange,

²³na'oman sara panginsueanne MAWU tate lai ma'ellega si mangitou, ewe'e i mangitou niramme wuassu leta'a apan nionggoli Tou si mangitou. Udde nariaddi uasul᷊ungu tatagu apan nionggolu MAWU si mangitou wuassu manga allang-Nge, manga nabi. Etearoddi taumatan Israel niapidda su pamamuangana su Asyur, wuṛṛu ete isudde i mangitou namanua naddatingu allo indi.

²⁴Pinallol᷊ossa taumatan Israel apan niapidda watukku pamamuanganna udde, ratun Asyur niapatana'a su manga soan Samaria, manga taumata wuassu Babel, Kuta, Awa, Hamat wuṛṛu Sefarwaim. Manga taumata udde natana'a su manga soa wuṛṛu namanuate isudde.

²⁵Sutempo i mangitou paarorone natana'a isudde, i mangitou tawe mangadata MAWU; ana waugu udde MAWU nandantan manga singa niapatambo sambageanganna wuassi mangitou.

²⁶Ana see taumata namasingkatta ratun Asyur manungku manga taumata apan niapaatana'a su manga soan Samaria waggan manga titan mongannu wanua udde. Ana waugu udde monganna nandantan manga singa niapatambo si mangitou.

²⁷Ana waugu udde ratun Asyur namarenta tadea'u sangkatou imam waussu wallatu manga taumata apan niawawi buatte niwuanga watukku Asyur, iapawelenga apia su Samaria. “Doloṛṛa'a i tou paapul᷊ea'a wuṛṛu paatana'e isudde tadea'u i tou wotongnge mangaṛṛa'a manga taumata udde su ola'u manga titan mongannu wanua indi,” unnu ratu.

²⁸Ne sangkatou imam su Israel, apan buatte niapidda wuassu Samaria watukku Asyur, napul᷊ete wuṛṛu natana'e su Betel. Poiaroddi i tou mangngaṛa'a tumanange ereapa ṛinone massubba MAWU.

²⁹Arawe manga taumata apan uatana'a su Samaria udde sidutu mallanginnu paal᷊uanni mangitou sassane wuṛṛu niaddo sulal᷊ummu manga wal᷊en monganna apan buatte niapararisikku taumatan Israel apan dorone uatana'a isudde. Suapan ṛuanganna mallanginnu paal᷊uanne sassane su soa apan wawanuanni mangitou:

³⁰Taumatan Babel nallanginnu paal᷊uannu Monganna Sukot-Benot, taumatan Kuta nallanginnu paal᷊uanni Nergal, taumatan Hamat nallanginnu paal᷊uanni Asimma,

³¹taumatan Awa paal᷊uanni Nibhas wuṛṛu Tartak, wuṛṛu taumatan Sefarwaim mangonggolu al᷊aṛana'i mangitou maola'a sasamba itattambuna su Monganna Adramelekh wuṛṛu Anamelekh.

³²Waine lai wuassu massubba manga monganna udde, i mangitou lai massubba MAWU. I mangitou namile taumata wuassu wallati mangitou al᷊awo'u hatin taumata apan iapamanara maola'a sangkatou imam wuṛṛu iapa'onggolu sasamba su manga wal᷊en monganna tampan pasasubbanna.

³³Nariaddi, i mangitou massubba MAWU, arawe lai massubba manga monganni mangitou sassane, uasul᷊ungngu addata inanaramanna wuassu wanuan mangitou.

³⁴Na'oman sara allo indi i mangitou ta'e mappaattu addata inanaramanni mangitou. I mangitou tawe mattaṛṛamawu MAWU wuṛṛu tawe lai tumuṛṛutta manga tita ana see lai manga parenta-Ne apan nionggoli Tou su papapulunni Yakub, apan isassago lai Israel.

³⁵MAWU buatte na'ola'a pa'aire indi su walahannu Israel, “Imbaṛṛangnga mattaṛṛamawu su manga mawu waine; imbaṛangnga massubba si mangitou ara'e mangimbe si mangitou, ara'e mangonggolu sasamba si mangitou.

³⁶Pangaddate si Ya'u, MAWU, apan buatte nangapiddi yamiu sinumabbanga wuassu Mesir; passubbate si Ya'u wuṛṛu pangonggole sasamba si Ya'u.

³⁷Paatuṛṛutte sidutu su manga tita wuṛṛu parenta apan buatte Ta'u niwoṛetta si yamiu. Imbaṛṛangnga mattaṛṛamawu mawu waine,

³⁸wuṛṛu imbaṛṛangnga maabulini paaire-U si yamiu.

³⁹Paatuṛṛutte si Ya'u Ruatanu, ne i Ya'u sarun mamallosi yamiu wuassu manga seennu.”

⁴⁰Arawe tumana'u Samaria udde maddiri maddaringikka; i mangitou sidutu uaagassa addata inanaramanni mangitou.

⁴¹Nariaddi, i mangitou massubba MAWU, arawe massubba lai manga paal᷊uanni mangitou. Na'oman sara allo indi lai papapulunni mangitou ta'e ma'ola'a inolaanna udde.