Read Talaud 2 MARARATU 20 Bible Online

2 MARARATU 20 - Talaud bible

2 MARARATU 20

¹Sutempo udde i Ratu Hizkia nirumadda'a pinsula apan mawakkata na'oman sara maraniten nate. I Nabi Yesaya ana'i Amos nattembo si tou wuṛṛu nabbisara, “MAWU nannanata tadea'u i Tuanga sarun manginsue al᷊awo'u manara, ana waugu i Tuanga tate mapia wuassu radda'a. Tate mal᷊annu lai i Tuanga sarun nate.”

²I Hizkia nanaile watukku darandunga ana see inumal᷊iomanna,

³“MAWU, naungewe manungku i ya'u indi buatte tinumuṛṛutta Si'o ringannu maadunna wuṛṛu ringannu ahewallu lal᷊ummu naungku. I Ya'u sidutu maddea'a tadea'u maatuṛṛutta apulu-Nu.” Ana see i Hizkia nilumuai ringannu massusa.

⁴I Yesaya nanantangi Hizkia, arawe tantal᷊anna i tou taambe nanantangu passalanganu wal᷊en araratuanna, MAWU nandolokki tou

⁵niapawelenga apia ringanni Hizkia, ratun walahannu MAWU wuṛṛu namasingkatu tanata indi, “I Ya'u, MAWU, Ruata apan sassubbanni Daud a'al᷊iamonannu, buatte naddaringikka aal᷊iomannu wuṛṛu na'ellega allon matanu. I Ya'u sarun mangapia raddangu; tillorega i'o sarun rumanta su wal᷊e-U.

⁶I Ya'u manamba lai uukku 15 su tonnane. I'o wuṛṛu soan Yerusalem sarun Ta'u ipallossa wuassu ratun Asyur. Soa indi sarun Ta'u lu'aranna ana waugu arang-Ku sassane wuṛṛu ana waugu pa'aire-U ringannu allang-Ku i Daud.”

⁷Ana see i Yesaya nandolokku taumata niapasappa wuan ara wuṛṛu niwuṛṛa su pinsullu ratu, tadea'u i tou mapia.

⁸I Ratu Hizkia naiwal᷊o, “Apa tatialane manungku MAWU sarun mangapia si ya'u wuṛṛu manungku tillorega i ya'u sarun maaranta su Wal᷊en MAWU apia?”

⁹I Yesaya sinumimbakka, “MAWU sarun mangonggolu tatiala si Tuanga manungku i Tou manipussa pa'aire-Ne. Orassa indi, suapa apan ipaapulun Tuanga: lintau mannelo'u orassu matannallo apan niola'i ratu Ahas niumamatta 10 barissa ara'e sinumoṛotta 10 barissa?”

¹⁰I Hizkia nabbisara, “Tadea'u ipa'ola'a lintau udde umamatta 10 barissa, mal᷊uassa. Ana waugu udde ola'e i tou sumoṛṛotta 10 barissa.”

¹¹I Yesaya inumal᷊iomanna su MAWU, ana see MAWU na'ola'a lintau udde sinumoṛṛotta 10 barissa su orassu matannallo udde.

¹²Sutempo udde ratun Babel, eteudde i Merodakh-Baladan ana'i Baladan, naaringikka manungku i Ratu Hizkia wakkute napia wuassu radda'a. Ne i tou nandolokku taumata niapaapiddu suratta wuṛṛu aonggola si Ratu Hizkia.

¹³I Hizkia nanal᷊oho manga daroloṛṛanna udde wuṛṛu namasilon al᷊awo'u pa'a'alane si mangitou, eteudde wul᷊awanna wuṛṛu sal᷊a'a, rampa-rampa wuṛṛu lana mawangngi, see lai anambon tantarane. Tawe lallinge saranapa su wal᷊en araratuanna apan tawe niapasilo si mangitou.

¹⁴Wua'udde Nabi Yesaya sinumaruanna si Ratu Hizkia wuṛṛu naiwal᷊o, “Wuassuapa manga taumata udde? Apa wisaran mangitou?” Hizkia sinumimbaka, “I mangitou wuassu Babel, wanua apan marau.”

¹⁵“I mangitou ma'ellega apa su wal᷊en aṛṛatuanna?” aiwal᷊on Yesaya apia. “Manga al᷊awo'a!” sasimbakki Hizkia. “Tawe saran sambau pa'a'ala sulal᷊ummu wal᷊en araratuanna apan tawe ta'u niapasilo si mangitou.”

¹⁶Ana see Yesaya nabbisara ratu, “MAWU nabbisara manungku

¹⁷sarun a'omanna tempone al᷊awo'u pa'a'ala sulal᷊ummu wal᷊en araratuanna wuṛṛu saranapa apan buatte niammulu al᷊amonanu naddatingngu orassa indi, iapidda watukku Babel. Taweddu matantanga.

¹⁸Wuassu ana'a wuṛṛu pulunnu piaddu sarun iapidda wuṛṛu olaanna mammamanaran wal᷊en araratuanna wuṛṛu mangangimbe ratun Babel.”

¹⁹I Ratu Hizkia sinumimbakka, “Mapia lai tanatan MAWU apan niapasingkanu si ya'u.” I tou sinumimbakka aroddi ana waugu i tou naṛṛingidda: “Sawal᷊iate araratuangku sidutu mal᷊angngana wuṛṛu su paddarame su al᷊o'engu pabbiaṛṛangku.”

²⁰Watti'a waine su ola'i Ratu Hizkia, su ola'u inasaharannu awawaṛṛanine, wuṛṛu ereapa i tou naal᷊i sal᷊ukka wuṛṛu pangangeleṛṛanu ua'e watukku soa, sarangkanambone udde niwoṛṛetta sulal᷊ummu wuken Watti'u Mararatun Yehuda.

²¹I Hizkia natete, ana see i Manasye parinsine naola'a ratu nallol᷊ossa si tou.