Read Talaud 2 MARARATU 21 Bible Online

2 MARARATU 21 - Talaud bible

2 MARARATU 21

¹I Manasye uukke 12 su tonnane sutempo i tou naola'a ratu su Yehuda, wuṛṛu i tou namarenta su Yerusalem 55 su tonnane al᷊annune. Inangnge aranne i Hefzibah.

²I Manasye na'ola'a rosa su MAWU, ana waugu nattanno manga inanaramanna lal᷊eo wuassu manga walahanna apan nilimbuaṛṛannu MAWU wuassu Kanaan sutempo taumatan Israel sinumutta su wanua udde.

³Manga tampa pasasubbanna monganna apan buatte nihohakki Hizkia iamange niapararisikki tou apia. I tou na'ola'a manga mezbah patataṛṛamawuanna si Baal, wuṛṛu nallanginnu paal᷊uannu Monganni Asyera, ere buatte niola'i Ahab ratun Israel. I Manasye lai massubba manga anumpitanna.

⁴MAWU buatte nabbisara manungku udde tampan daranta-Ne wuṛṛu tampan patataṛṛamawuanna si Tou, arawe poiaroddi su Wal᷊en MAWU, i Manasye buatte napararisikku manga mezbah hunan manga monganna.

⁵Su ruam ba'a wuassu rallaku Wal᷊en MAWU i tou napararisikku manga mezbah tampa pasasubbanna manga anumpitanna.

⁶I tou nangonggolu anangnge maola'a sambau sasamba itattambuna. I Manasye lai ma'annamu pasangkada, mammani'atta, wal᷊iimata, wuṛṛu madorongnga tatantiro wuassu manga ghaṛṛaho. I tou tumaniten narosa su lantakku hatin MAWU na'oman sara MAWU nasa'u.

⁷Hambarannu Monganni Asyera niaddo su Wal᷊en MAWU, sumbal᷊i su ola'u tampa udde MAWU buatte nabbisara si Daud wuṛṛu si Salomo anangnge, “Wal᷊e-U wuṛṛu soan Yerusalem indi, buatte Ta'u nipile wuassu wallatu leta'u siri mapul᷊o dua ruangannu Israel, eteudde tampa apan nipile-U, maola'a tampa patataṛṛamawuanna si Ya'u.

⁸Wuṛṛu amungkangu walahannu Israel maddaringikka anambon parenta-U wuṛṛu tuttuṛṛutta manga tita-U apan Ta'u nionggola si Musa allang-Ku, ne i Ya'u tawe mamalan mangitou limbuaṛṛanna wuassu wanua apan buatte Ta'u nionggola su al᷊amona mangitou.”

⁹Arawe taumatan Yehuda mal᷊awanga MAWU, wuṛṛu ewe'e lai ete i Manasye na'oman sara i mangitou na'ola'a manga rosa apan al᷊eoanne wuassu rosa apan niola'u manga walahanna apan nilimbuaṛṛanu MAWU wuassu Kanaan sutempo walahannu Israel sinumutta su wanua udde.

¹⁰Ana waugu udde sulal᷊ummu manga nabi, manga allangu MAWU, MAWU nabbisara,

¹¹“I Ratu Manasye tumaniten dal᷊eo. Pallal᷊agune maddal᷊eoanna wuassu pallal᷊agun taumatan Kanaan. Ringannu manga paal᷊uanna apan nilanginne, i tou naarosa taumatan Yehuda.

¹²Ana waugu udde, i Ya'u, Ruata apan sassubbannu walahannu Israel, sarun mandantan silaka apan bahewalla su Yerusalem wuṛṛu su Yehuda na'oman sara suapan taumata apan naaringikka ola'u hatto udde sarun ṛumoro.

¹³Yerusalem sarun Ta'u iṛṛuumanna ere lai Ya'u nakkuumannu Samaria wuṛṛu i Ahab ratun Israel see lai papapulunne. Yerusalem sarun Ta'u waresianna ere lama'a apan buatte niukkassa wuṛṛu nilaabba.

¹⁴Tumanange apan ta'e natantanga sarun Ta'u iwala maola'a inassu seenne, apan sarun malluatta laubba wuṛṛu mangaṛṛo wanuan mangitou.

¹⁵Sarangkanambone sarun Ta'u olaanna su saruannu walahangKu ana waugu i mangitou buatte na'ola'a rosa su saruang-Ku wuṛṛu nandal᷊eo naungku ro'en al᷊amonan mangitou sinumabbanga wuassu Mesir naddatingngu allo indi.”

¹⁶Wal᷊ine lai wuassu taumatan Yehuda na'ola'a rosa su MAWU ringannu massubba paal᷊uanna, i Manasye namate lai manambo taumata apan tawe sal᷊ane na'oman sara daṛṛa nangelekka su al᷊awo'u tampa su Yerusalem.

¹⁷Watti'a waine su ola'i Ratu Manasye wuṛṛu su ola'u manga rosane, niwoṛṛetta sulal᷊ummu wuke Watti'u Mararatun Yehuda.

¹⁸I Manasye nate ana see nilabbinga su waillu wal᷊en araratuanna, eteudde wailli Usa. I Amon parinsine naola'a ratu nallol᷊ossa si tou.

¹⁹I Amon uukke 22 su tonnane sutempo i tou naola'a ratun Yehuda wuṛṛu i tou namarenta Yerusalem rua tonna al᷊annune. Inangnge aranne i Mesulemet ana'i Harus taumatan Yotba.

²⁰Ere lai iamange, i tou na'ola'a rosa su MAWU.

²¹I tou nangaṛṛussa manga inolaannu iamange, wuṛṛu massubba manga paal᷊uanna apan sassubbannu iamange.

²²I tou tawe mabbiakka tuttuṛṛuta apulun MAWU, ewe'e lai nanantangu MAWU, Ruata apan sassubbannu al᷊amonane.

²³Manga mammamanaran araratuanni Ratu Amon na'ammula mando'appa si tou wuṛṛu mamate si tou su wal᷊en araratuanna.

²⁴Arawe tumana'u Yehuda namate manga mamamate si Ratu Amon udde, ana see namile si Yosia anangnge, naola'a ratu.

²⁵Watti'a waine su ola'i Amon niwoṛṛetta sulal᷊ummu wuke Watti'u Mararatun Yehuda.

²⁶I Amon nilabbinga su labbingu wailli Uza. I Yosia anangnge naola'a ratu nallol᷊ossa si tou.