Read Talaud 2 MARARATU 3 Bible Online

2 MARARATU 3 - Talaud bible

2 MARARATU 3

¹Su tonna appul᷊o ual᷊une Yosafat ratun Yehuda uaparenta, Yoram ana'i Ahab naola'a ratun Israel wuṛṛu namarenta su Samaria mapul᷊o dua su tonnane al᷊annune.

²I tou na'ola'a al᷊al᷊eo su aellegu MAWU, arawe i tou tawe tumaniten dal᷊eo ere i Ahab wuṛṛu i Izebel, hagurange. Paal᷊uanna apan niola'u iamange ipassubba si Baal buatte niapasossokka.

³Arawe, uapapaṛalan ere i Ratu Yerobeam ana'i Nebat apan namarenta liuṛorone wuassitou, i tou lai naaola'a taumatan Israel narosa wuṛṛu tawe illol᷊one ma'ola'a inolaanna udde.

⁴I Ratu Mesa wuassu Moab uatahuanna pamamadul᷊iananna domba. Maola'a sambau wose su taumatan Israel, suapan tonna i tou nangonggolu 100.000 ana'u domba esakka.

⁵Arawe napawe i Ratu Ahab natete, i Mesa namangalo Israel.

⁶Ana waugu udde i Ratu Yoram nasasaṛṛawutta nanantangngu Samaria wuṛṛu inaite nandiahi anambon tantaran pangalone.

⁷I tou nandohon ara'e napaapiddu tanata indi si Ratu Yosafat wuassu Yehuda, “Ratun Moab indete namangalo si ya'u; wotongngewe I'o lai mallal᷊ima si ya'u mapapangalo mando'appa si tou?” “Ore,” sasimbakki Ratu Yosafat. “I ya'u wuṛṛu tantara'u see lai tantara uasa'e awal᷊o sarun tumantalonga lai si'o.

⁸Umamattu lal᷊anna suapane i ite amungkangu inai mamangalo?” “I ite umamattu lal᷊anna sumabbi wadda'u Edom, ” sasimbakki Yoram.

⁹Ne i Ratu Yoram inaite suadio'a ringannu ratun Yehuda wuṛṛu ratun Edom. Napawe niumamatte al᷊annune pitu allo, i mangitou niasueannu ua'e, na'oman sara tantaran mangitou winatanga lal᷊uranannu saranapa tate ma'inumma.

¹⁰“Nasilakate i ite!” unni Ratu Yoram. “MAWU buatte nakkiinna manantilli ite siri tallu su ratun Moab!”

¹¹I Ratu Yosafat naiwal᷊o, “Apa isindi tawe nabi apan botongnge maiwal᷊o MAWU, hunan kite?” Sangkatou suwallatu tantaran Ratu Yoram sinumimbakka, “Pia, isudde i Elisa ana'i Safat! I tou dorone uasumbala si Elia.”

¹²“Atonna! MAWU atonna nabbisara si tou,” unni Ratu Yosafat. Ne ratu siri tallu inaite ringanni Elisa.

¹³“Anio maitul᷊unga si ya'u?” wisaran Elisa su ratun Israel. “Roote su manga nabin hagurangngu!” “Tawe!” sasimbakki Yoram. “Ana waugu ete MAWU apan nakkiinna manantilli yami siri tallu su ratun Moab.”

¹⁴I Elisa sinumimbakka, “Ringannu arannu MAWU apan biakka, apan ta'u a'imbeanna, i ya'u mabbisara ringannu masemakka manungku amungkangu wal᷊ine ana waugu i Ratu Yosafat apan aadatangku, i ya'u maddiri maggahatton Tuangnga.

¹⁵Orassa indi apira'e inawarendi sangkatou mananalanga kecapi.” Tantal᷊anna taumata udde mannal᷊anga kecapine, i Elisa niintaṛoannu Ghaṛṛahon MAWU,

¹⁶na'oman sara i tou nabbisara, “Eteindi apan niapasingkattu MAWU: ‘Pa'ola'e manga hote su sal᷊ukka maradio'a indi.

¹⁷Salaiwe i yamiu tawe maasilo uranna sumossokka ara'e anginna tumiuppa, arawe ua'e ete tuttompe'a su sal᷊ukka addio'a indi. I yamiu wuṛṛu winatanga palluranannu saranapa sarun maasomba ua'e apan manambo wuṛṛu inumanna mawusa-wusa.’ ”

¹⁸Ana see i Elisa nanassukku wisarane, “Arawe su MAWU udde tumba'u inolaanna addio'a. I Tou sarun mangonggolu auntunganna si yamiu su manga taumatan Moab.

¹⁹Anambon soan mangitou apan pia tanda batune wuṛṛu mangkapia sarun iaṛṛaan kamiu; anambon aaluanna apan pia buane tuwanganni yamiu, anambon al᷊imatan kua'e sappinganni yamiu, wuṛṛu manga wawail᷊anni mangitou apan masuwukka sarun tuntunganni yamiu batu ma'oman sara mahohakka wara'a taweddu mallambe.”

²⁰Tiṛabbine, sutempo nangonggolu sasamban rua'allo, ua'e mangngelekke wuassu Edom na'oman sara sal᷊ukka addio'a udde napenete.

²¹Sutempo taumatan Moab naaringikka manungku siri tallu ratu udde nirumantate mamangalo, ne anambon taumata — manattakka wuassu timmade naddatingu dario'a — apan botongnge mamasanna lutangnga, niapasabbanga wuṛṛu niapataṛapa su passaranna.

²²Tiṛabbine, sutempo i mangitou napu'o marua allo, matannallo mannemakka wowon ua'e na'oman sara a'ellehanna naahidda daṛṛa.

²³I mangitou nangintul᷊i, “Daṛṛa! Tantu manga tantara wuassu tatallu wuntuannu seetta nabbawul᷊ote wuṛṛu napapatete! Wette i ite inaite mangaṛṛo paddasananni mangitou!”

²⁴Arawe napawe manga taumatan Moab na'omate su paddasananna udde, i mangitou nilimbuaṛannu taumatan Israel apan sidutu mangngenggena lapiddu mammate si mangitou

²⁵wuṛṛu nanggohakku manga soan mangitou. Suapan wawailanna masuwukka apan nisabbianni mangitou, tuntunganni mangitoun batu. Panginsueanne anambon wawail᷊anna niomboannu watu. Manga taumatan Israel nakkapinga lai manga al᷊imatan kua'e, wuṛṛu nanuwangnga manga aaluanna mabbua. Nallambe tumba'u soa Kir-Hareset inangngu soa Moab. Panginsueanne soa udde lai nipangaloanna wuṛṛu manga taṛṛa ali-ali nanuntungu watu.

²⁶Napawe naatutukke manungku i tou tate maaro'appa, ratun Moab nangapiddu 700 tantara apan pande mappaattu hal᷊ele, ana see sidutu maddea'a tadea'u maintaṛo su tampan Ratu Edom, arawe i tou tawe naasutta.

²⁷Ana waugu udde i tou nanganu parinsine, ana see niaddo roso su darandungu soa maola'a sasamba su mongannu Moab. Ne manga taumatan Israel nata'utte, na'oman sara i mangitou napasoṛottu tantaran mangitou wuassu soa udde wuṛṛu napul᷊ete watukku wanuan mangitou.