Read Talaud 2 MARARATU 4 Bible Online

2 MARARATU 4 - Talaud bible

2 MARARATU 4

¹Su allo sambau wawine inawal᷊uannu sangkatou nabi inaite ringanni Elisa wuṛṛu naiwal᷊o, “Papa, awingku natete! Wuṛṛu i Papa masingkatta manungku i tou lai taumata apan matuṛutta Ruata, arawe i tou pia awallassa su sangkatou taumata. Orassa indi taumata udde nirumanta manganu ana'u darua, wuṛṛu itarua olaanna allanga, maola'a wawaekku awallassu awingku apan natete udde.”

²“Ereapa ana see i ya'u maatul᷊ungi Mama?” aiwal᷊on Elisa. “I Mama uatahuanna apa su wal᷊en?” “Taweddu tatahuananna,” sasimbakku wawine udde, “tumba'u sambotola addio'a lanan zaitun.”

³I Elisa nabbisara, “Roote pabballasa paanambo wotola tawe loṛṛone wuassu al᷊indonganni Mama.

⁴Wua'udde ṛinone Inangnga see lai al᷊aṛṛanangngu sumutta sulal᷊ummu wal᷊en wuṛṛu makkuudu ngara. Lal᷊ina'e lana wuassu wotolla addio'a udde sulal᷊ummu manga wotolla udde, ana see ṛaea'a apan napenete.”

⁵Ne wawine udde napul᷊ete su wal᷊ene. Napawe i tou wuṛṛu al᷊aṛanangnge sinumutta wuṛṛu nakkuudu ngaran bal᷊e, i tou nanganu wotolla addio'a apan laloṛṛoannu lanan zaitun udde, ana see nallal᷊innu lana udde sulal᷊ummu manga wotola apan nionggolu al᷊aṛanangnge si tou.

⁶Napawe manga wotolla udde napenete abbi, i tou naddorongke wotolla sambau apia. “Nasuete,” sasimbakku sangkatou anangnge. Ne lana udde tate nangelekka apia.

⁷Wua'udde Inangngene inaite apia ringanni Nabi Elisa, ne i Elisa nabbisara, “Wal᷊ua'e lana udde pamaeṛa'a awallassu Inangnga, wuṛṛu lambene wotongnge ipabbiakku Inangnga see lai al᷊aṛanangngu.”

⁸Su Sunem pia sangkatou wawine ala uatana'a. Su allo sambau sutempo i Elisa inaite watukku Sunem, wawine udde nangahe niumanna. Nanattakka orassa udde suapan i Elisa inai su Sunem i tou u'anna su wal᷊en bawine udde.

⁹Ana see wawine udde nabbisarate awingnge, “I ya'u mangimanna i papa apan masokka ruddanta isindi udde atonna-tonna sangkatou allangu Ruata.

¹⁰Mappianne iaddua ma'ola'a sambau wabbo'a addio'a su ṛengkenne al᷊iurosone, wuṛṛu mandiahi atatiilane, medda, addera, wuṛṛu sol᷊o tadea'u i tou wotongnge manaṛabbi isudde suapan i tou rumanta mattembo si ite.”

¹¹Su allo sambau i Elisa nirumanta apia su Sunem. Napawe i tou nirumangante su wabbo'a mangillol᷊o,

¹²i tou nandolokki Gehazi, mangangimbene, niapawago wawine udde. Napawe wawine udde nirumantate,

¹³i Elisa nabbisara si Gehazi, “iwal᷊oi'o i tou si tou ereapa i ya'u wotongnge mabbal᷊issa aapian naungnge si ite. Asinungka i tou ma'apulu i ya'u inai ringannu ratu ara'e tembonannu tantara, wuṛṛu maggahatto apa apan ipaapulune.” Wawine udde sinumimbakka, “I ya'u uatana'a suwallatu ṛuangangku apan tawe auranganne.”

¹⁴Ne i Elisa naiwal᷊ote si Gehazi, “Amungkangu aroddi, apate sarun ta'u olaanna si tou?” I Gehazi sinumimbakka, “I tou tawe ana'a, Papa, wuṛṛu awingnge timmadete.”

¹⁵“Waggoite wawine udde,” unni Elisa. Ne wawine udde nirumanta wuṛṛu dirumarisikka su ngara.

¹⁶Ana see i Elisa nabbisara si tou, “Tonna suhati, sutempo ereindi, i Mama uasal᷊urute sangkatou ana'a esakka.” “Papa, ariewe pangawusu!” unnu wawine udde. “I Papa indi allangu Ruata!”

¹⁷Arawe atonna apa niwal᷊on Elisa. Tonna manansunna, iraṛṛangngo sutempo apan uasul᷊unga wawine udde nanungkangu sangkatou ana'a esakka.

¹⁸Napawe ana'a udde wahewalle, su allo sambau su tempo pangangitinga, ana'a udde inaite ringannu iamange wuṛṛu ringannu taumata mangngitinga.

¹⁹Inaṛombanganne ana'a udde nangintul᷊i iamange, “Uare! Pua'u mataddu'a!” “Apira'a ana'a udde ringannu inangnge,” unnu iamange su sangkatou allanga.

²⁰Ana'a udde niapidda ringannu inangnge, ana see inangnge nakkiwa si tou. Su wawallone ana'a udde nate.

²¹Inangnge nangapiddi tou al᷊iurosone, su wabbo'an Elisa, wuṛṛu niapal᷊allowanga su tampan atatiil᷊anna. Wua'udde i tou sinumabbanga wuṛṛu nakkuudu ngara,

²²ana see i tou inaite namago awinge. I tou nabbisara, “Doloṛṛa'e sangkatou allanga paranta'a inawarendi ringannu sambau keledai. I ya'u inai mal᷊iha-l᷊ihakka ringanni Nabi Elisa, wuṛṛu mal᷊ihakka lai mabbelenga.”

²³“Anio inaite orassa indi?” awinge naiwal᷊o. “Allo indi wal᷊ine allon Sabat, wuṛṛu lai wal᷊ine allo wahewan Bul᷊anna Wakku.” “Tawe apane,” sasimbakke.

²⁴Napawe i tou buatte nandiahi aiananna su keledai udde, i tou nabbisara allange, “Sasaite keledai indi tadea'u mal᷊ihakka tumal᷊anga; arie palliwuea'a amungkangu i ya'u tawe mandolokka.”

²⁵Ne inaite wawine udde watukku Wowon Karmel su tampan Elisa uatana'a. Ro'en ta'e marau i Elisa naasilote wawine udde nirumanta. I Elisa nabbisara si Gehazi, “Pa'ellego, inanga Wuassu Sunem uddete nirumanta!

²⁶Paal᷊ihakka inai maisasomba tou wuṛṛu iwal᷊oi ereapa ola'u amonanne.” “Sarangkanambone mapia,” unnu wawine udde si Gehazi.

²⁷Arawe sutempo na'omate ringanni Elisa, i tou niumal᷊intudda wuṛṛu nakka'uppa leddon Elisa. I Gehazi maapulu mapa'ingkati tou wua isudde, arawe i Elisa nabbisara, “Wala'e aroddi! Aellehanna i tou mangke massusa. Arawe MAWU tawe namasingkatu manga apa si ya'u!”

²⁸Wawine udde nabbisara, “Papa, i ya'u tawe naddoronga ana'a si Papa. I ya'u lai buatte nabbal᷊o si Papa tadea'u i Papa arie mangonggolu antimma tawe loṛṛone si ya'u.”

²⁹I Elisa nanaile si Gehazi ana see nabbisara, “Paal᷊ihakka! Anute ta'ingku wuṛṛu inaite asal᷊a su wal᷊en Inanga indi. Arie pattaala mattabea sisai-sai apan massombanu su lal᷊anna. Amungkangu taumata mattabea si'o, paal᷊ihakka mabbal᷊issa tabbeane. Napawe na'omate, pasaṛawutta mangaddon ta'ingku indi su wadangu ana'a udde.”

³⁰Wawine udde nabbisara, “Papa Elisa! Ringannu arannu MAWU apan wiakka wuṛṛu ringannu niawan Papa, i ya'u, tawe manantangi Papa!” Ana waugu udde i Elisa inaite suadio'a ringannu wawine udde watukku wal᷊ene.

³¹I Gehazi nalliu ṛorote wuassi tarua maddaṛiu mangandangu ta'inna su wadangu ana'a udde, arawe tawe tingikka ara'e manga tatiala waine manungku ana'a udde ta'e wiakka. Ana see i Gehazi inaite naisasomban Elisa wuṛṛu nabbisara, “Ana'a udde tawe napu'o.”

³²Napawe na'omate su wal᷊en bawine udde, i Elisa sinumutta sassane sulal᷊ummu wabbo'ane wuṛṛu ana see naasilo winal᷊unannu ana udde ual᷊allowanga su tampan atatiil᷊anna.

³³I Elisa naṛuudu ngara ana see niumal᷊iomanna su MAWU.

³⁴Wua'udde i tou dirumara manga ana'a udde wuṛṛu nande'ettu moṛonga, mata wuṛṛu limane su moṛonga, su mata wuṛṛu liman ana'a udde. Ana waugu i tou na'ola'a aroddi, ne waddangu ana'a udde nabbal᷊i ma'ihamma.

³⁵I Elisa napu'ote wuṛṛu u'amatte uapapal᷊ele sulal᷊ummu wabbo'a udde, ana see nirumarammanga apia su wadangu ana'a udde. Panginsueanna ana'a udde nabbannana paapitu, wuṛṛu inumaalla.

³⁶I Elisa nandolokki Gehazi niapawago inangu ana'a udde, wuṛṛu napawe i mama udde nasutta, i Elisa nabbisara si tou, “Indite ana'i Mama.”

³⁷Wawine udde niumal᷊intudda su saruanni Elisa ana see nangapiddu ana'a watukku liudde.

³⁸Su sambau tempo nariadite ṛutumma su ahewallu wanua. Ne i Elisa nabelengke watukku Gilgal. Sutempo i tou tantal᷊anna mannantiro sambageanganna nabi, i tou nandolokku mangangimbene niapaal᷊appa urinna wahewalla wuṛṛu nallaha anni mangitou.

³⁹Sangkatou suwallatu manga nabi udde inaite watukku wailla maddea'a sayore lihiddu wawasal᷊anna lul᷊u. I tou nani'o wuan sasuanna udde manambo-nambo, wuṛṛu niapidda napul᷊e. I tou wagga tanne wuan napa udde, i tou naṛṛinte wuṛṛu nitaṛo sulal᷊ummu urinna udde.

⁴⁰Napawe nal᷊ahate, i tou nattahiate su manga nabi udde. Arawe wakkute i mangitou naatemma anna udde, i mangitou nangintul᷊i si Elisa, “Papa, indi pasangkada!” I mangitou maddirite umanna.

⁴¹Ne i Elisa nandolokka niapaanu taponna addio'a, ana see nisal᷊iawukka sulal᷊ummu urinna. Wua'udde i tou nabbisara, “Tahiate apia anna udde.” Ne inauranna anna udde tate maasilaka.

⁴²Su sambau tempo apan baine, sangkatou esakka nirumanta wuassu Baal-Salisa. I tou nangapidda ringanni Elisa, ganduma apan wakkute niitinga wuṛṛu lai ruan pul᷊o roti apan niola'a wuassu ganduma apan paarorone niitinga su tonna udde, wuṛṛu lai ganduma apan wakkute niitinga. I Elisa nandolokku allange niapatahia roti udde su manga nabi udde,

⁴³arawe allanga udde nabbisara, “Tawe mattiudda su maṛasutta su atoune!” I Elisa sinumimbakka, “Tahiate tadea'u i mangitou umante, ana waugu MAWU nabbisara manungku i mangitou sarun umanna wuṛṛu napawe buatte niumanna ta'e pia lambene.”

⁴⁴Allanga udde nattahiate anna si mangitou, wuṛṛu i mangitou sarangkanambone inumante. Napawe buatte niumanna ta'e lai pia lambene ere buatte niwal᷊on MAWU.