Read Talaud 2 MARARATU 8 Bible Online

2 MARARATU 8 - Talaud bible

2 MARARATU 8

¹Sutempo sambau MAWU nandantan ṛutumma su wanuan Israel, al᷊annune pitu tonna. Tantal᷊anna taambe ṛutumma udde i Elisa buatte namasingkattu olangnge udde su wawine wuassu Sunem apan anangnge buatte niapawiakki Elisa apia. I Elisa nandolokki tou nangingkatta ringannu amonanne watukku wanua waine.

²Wawine udde tinumuṛṛutte darolokki Elisa, wuṛṛu inaite watukku wanua Filistin ana see natana'e isudde.

³Napawe tempo pitu tonna udde nal᷊iudde i tou nabelengke apia su Israel. Ana see i tou wuṛṛu anangnge inaite ringannu ratu sumal᷊ande tadea'u wal᷊en wuṛṛu wawail᷊anne iapawelenga apia si tou.

⁴Sutempo udde i Gehazi allangi Elisa buatte nirorongannu ratu niapawatti'u manga al᷊aṛṛindu'a apan buatte niola'i Elisa.

⁵Ne nassuhatta lai wawine wuassu Sunem udde nirumanta sinumaruanna ratu mangapiddu sasal᷊andene, i Gehazi tantal᷊anna mabbatti'u ereapa i Elisa napawiakku apia sangkatou ana'a apan natete. Ne unni Gehazi, “Tuanga apan mawantuga, eteindi wawine udde wuṛṛu indi anangnge apan niapawiakki Elisa apia!”

⁶Ana waugu udde ratu naiwal᷊o ana see wawine udde nabbatti'u ana'a udde. Wua'udde ratu namago sangkatou mammamanarane wuṛṛu namarenta tadea'u al᷊awo'u pussa'an bawine udde iapawelenga si tou apia, nasutta arega manga wawail᷊anna sarangkanambone al᷊annune sutempo i mangitou su wanua waine.

⁷Sutempo sambau i Elisa inaite watukku Damsyik. Inauranna i Ratu Benhadad maradda'a. Napawe ratu naaringikka manungku i Elisa udde su Damsyik,

⁸i tou nabbisara si Hazael, sangkatou mammamanarane, “Apira'a aonggola su nabi udde, wuṛṛu padorongke tadea'u i tou maiwal᷊o MAWU, tanne i ya'u indi mapia ara'e tawe.”

⁹I Hazael nanganu unta wuṛṛu niluranannu al᷊awo'u wuan sasuannu soan Damsyik, ana see inaite ringanni Elisa. Napawe na'omate su tampan Elisa, i Hazael nabbisara, “Allangu Ratu Benhadad, nandolo'u iappaiwal᷊o MAWU tanne i tou mapia ara'e tawe.”

¹⁰I Elisa sinumimbakka, “MAWU namasingkatta si ya'u manungku i tou sarun mate. Arawe wal᷊oa'e si tou manungku i tou sarun mapia.”

¹¹Wua'udde i Elisa nanutudda si Hazael ringannu nituturanna na'oman sara i Hazael niumambul᷊isadda. Inaṛṛombanganne i Elisa nilumuai.

¹²“Anio i Tuanga nilumuai?” aiwal᷊on Hazael. “Ana waugu i ya'u masingkattu al᷊al᷊eo apan niolangu su saruannu taumatan Israel,” unni Elisa. “I'o sarun manoṛṛobba manga soane apan pia tatandange watu, mamate manga taumata saṛentumuwo apan apianne, wuṛṛu mangattonga manga al᷊aṛana'a maradio'a see mama'a tiannu manga wawine apan pia illoṛṛo.”

¹³“Ah, i ya'u taumata apan tawe gunane,” sasimbakki Hazael, “tawe mariaddi ya'u pia taṛṛino ahewalle ereudde!” “MAWU buatte namasingkatta si ya'u manungku i'o sarun maola'a ratun Siria,” sasimbakki Elisa.

¹⁴Napawe i Hazael nabelengke watukku wal᷊en araratuanna, i Benhadad naiwal᷊ote, “Apa niwisaran Elisa?” “I tou nabbisara manungku i Tuanga sarun mapia,” sasimbakki Hazael.

¹⁵Arawe su allo tiṛabbine i Hazael nanganu nasa sambau, wuṛṛu niammo sulal᷊ummu ua'e ana see nitaddila su hatin datu na'oman sara i tou nate nal᷊ammisa. Wuṛṛu i Hazael naola'e ratun Siria nallol᷊ossa si Benhadad.

¹⁶I Yehoram ana'i Yosafat naola'e ratun Yehuda sutempo i Ratu Yoram ana'i Ahab buatte namarenta Israel lima tonna al᷊annune.

¹⁷Sutempo udde i Yehoram uukke tallun pul᷊o dua su tonanne, wuṛṛu i tou uaparenta su Yerusalem ual᷊u tonna al᷊annune.

¹⁸I tou naawingu ana'i Ahab, wuṛṛu ere lai buatte niola'u amonanni Ahab, i tou lai na'ola'a rosa su saruannu MAWU ere manga ratun Israel.

¹⁹Arawe MAWU maddiri manginsue ruangannu Yehuda ana waugu i Tou buatte na'ire si Daud allang-Nge, manungku papapulunne sidutu maola'a ratu.

²⁰Sulal᷊ummu i Yehoram uaparenta, Edom namangalote Yehuda wuṛṛu na'ola'a araratuanne sassane.

²¹Ana waugu udde, i Yehoram sinumabbangke ringannu anambon keretan pangalone inaite watukku Zair. Poiaroddi i tou niliwunannu tantaran Edom, arawe ṛabbine i tou wuṛṛu manga tembonannu tantara uasa'e kereta, nilumassanga wuassu seetta apan ual᷊iwunna udde, wuṛṛu tantaran mangitou tinumal᷊anga wuṛṛu napul᷊ete su wal᷊en sangkatou-sangkatou.

²²Nanattakka orassa udde Edom tate massuṛubbawa su Yehuda. Sutempo udde lai soan Libna namangalo.

²³Watti'a waine su ola'i Yehoram niwoṛetta sulal᷊ummu wuken Watti'u Mararatun Yehuda.

²⁴I tou nate wuṛṛu nilabbinga su labbingu manga ratu su Soan Daud. I Ahazia anangnge naola'e ratu nallol᷊ossa si tou.

²⁵I Ahazia ana'i Yehoram naola'e ratun Yehuda sutempo i Ratu Yoram ana'i Ahab uaparenta Israel mapul᷊o dua su tonnane.

²⁶Sutempo udde i Ahazia uukke ruan pul᷊o dua su tonnane, ne i tou namarenta su Yerusalem santonna al᷊annune. Inangnge aranne i Atalya, ana'i Ratu Ahab wuṛṛu pulunni Omri ratun Israel.

²⁷Ana waugu wuassu pa'a'awinge udde, i Ahazia pia pa'a'aukku amonanna ringannu amonanni Ratu Ahab. I Ahazia na'ola'a rosa su MAWU nassul᷊ungu ere lai niola'u amonanni Ahab.

²⁸I Ratu Ahazia lai napapangalo suadio'a ringanni Ratu Yoram nando'appa si Hazael ratun Siria. I mangitou napapangalo su Ramot, su wageangu Gilead. I Yoram nal᷊essa sulal᷊ummu pangalo udde,

²⁹ana see i tou nabelengke watukku soa Yizreel naiundamma, wuṛṛu i Ahazia inaite lai nattembo si tou poiaroddi.