Read Talaud 2 MARARATU 9 Bible Online

2 MARARATU 9 - Talaud bible

2 MARARATU 9

¹Sutempo udde i Nabi Elisa namago sangkatou suwallatu manga nabi apan nitantiroanne wuṛṛu nabbisara, “Pandiahite, i ite inaite watukku Ramot su Gilead, wuṛṛu apira'e wotolla apan lal᷊oṛoannu lanan zaitun indi.

²Napawe i'o na'omate poiaroddi paddea'e si Yehu ana'i Yosafat pulunni Nimsi. Aheite i tou sassane watukku sambau wabbo'a,

³wuṛṛu lal᷊ina'e lana indi su puane, ana see wal᷊oa'a, ‘MAWU nabbisara manungku i tou sarun itenegu MAWU, maola'a ratun Israel.’ Napawe buatte na'ola'a udde, paal᷊ihakka manantangu tampa udde.”

⁴Nabi saṛṛen tumuwo udde inaite watukku Ramot,

⁵ana see naaratinga si Yehu wuṛṛu manga tembonannu tantara waine tantal᷊anna manggol᷊aga poiaroddi. Nabi udde nabbisara, “Tua, i ya'u uaapiddu watti'a si Tuanga.” I Yehu sinumimbakka, “Sisai?” “Si Tuanga sassane,” pinabbil᷊issu nabi udde.

⁶Wua'udde itarua sinumuttate sulal᷊ummu wal᷊en, wuṛṛu nabi saṛṛen tumuwo udde nallal᷊innu lanan zaitun udde su puan Yehu ana see nabbisara, “MAWU Ruatan Israel nabbisara, ‘I Ya'u sarun manenegu maola'a ratu su pabbawala-U Israel.

⁷I'o sarun mamate amonanni tuangu i Ahab. Ringannu aroddi Ya'u makkuumanni Izebel apan buatte namate manga nabi-U wuṛṛu manga allang-Ku waine.

⁸Amonanne sarangkanambone wuṛṛu ana'a pulunni Ahab ṛinone mate. Suapan taumata esakka mawae timmade ara'e dario'a sarun Ta'u pateanna.

⁹Amonanne sarun Ta'u olaanna ere lai Ya'u na'ola'a amonanni Yerobeam wuṛṛu amonanni Baesa, manga ratun Israel.

¹⁰I Izebel tawe ilabbinga. Winal᷊unanne sarun inasannu asu su leta'u Yizreel.’ ” Napawe buatte namasingkattu sarangkanambone udde, nabi saṛṛentumuwo udde sinumabbanga ana see tinumal᷊angnga.

¹¹I Yehu nabelengke apia ringannu manga hawene, ana see i mangitou naiwal᷊o, “Pia batti'a apa? Taumata wewa udde na'ura ringannu?” “Ah, i yamiu masingkatte,” sasimbakki Yehu.

¹²“Tawe, yami ta'e wagga!” sasimbakki mangitou. “Otte wal᷊oa'e!” I Yehu sinumimbakka, “I tou namasingkattu tanatan MAWU manungku i ya'u itenega maola'a ratun Israel.”

¹³Manga ringanni Yehu nasasaṛawutta nalluatta juban mangitou wuṛṛu niampakka su tuadda su saruanni Yehu. Ana see i mangitou nattiuppa trompeta wuṛṛu uui, “i Yehu ratu!”

¹⁴Etearoddi i Yehu nanggol᷊age mando'appa si Ratu Yoram apan orassa udde uatana'a su Yizreel. I Yoram inai poiaroddi maiundammu manga lessane apan nal᷊essa sulal᷊ummu pangalo su Ramot mando'appa si Hazael ratun Siria. I Yehu nabbisara su manga hawene tembonannu tantara, “Amungkangu i yamiu ma'apulu i ya'u maola'a ratu, paariagai tadea'u tawe saran sangkatou apan sumabbanga wuassu Ramot inai mamasingkatta su manga taumatan Yizreel.”

¹⁶Wua'udde i tou sinuma'ete keretan pangalone ana see inaite watukku Yizreel. Sutempo udde i Yoram taambe napia, wuṛṛu i Ahazia ratun Yehuda poiaroddi lai nattembo si tou.

¹⁷Sutempo mandariaga wal᷊en padariaganna soa Yizreel naasilo si Yehu wuṛṛu manga taumatane nirumanta, i tou nangintul᷊i, “Pia taumata manambo mattudda inawarendi!” I Yoram sinumimbakka, “Pandolokku sangkatou tantara pasaea'a awal᷊o wuṛṛu inai paelleha'a tanne i mangitou udde hawe ara'e ro'appa.”

¹⁸Ringannu uasa'e awal᷊o, tantara udde inaite naisasomban Yehu wuṛṛu nabbisara, “Ratu ma'apulu maasingkatta, tanne i Tuanga nirumanta maola'a sangkatou hawe.” “Udde wal᷊ine manaranu!” sasimbakki Yehu, “Wette pa'ammule ringangku.” Mandariaga wal᷊en padariaganna udde naasilo tantara udde nirumanta su ammul᷊anne udde, arawe tate nabelenga. Ne i tou nangalaen olange udde,

¹⁹ana see lai i tou nandolokku sangkatou tantara waine. Tantara indi naiwal᷊o aroddi lai si Yehu, ne paassa lai i Yehu sinumimbakka, “Udde wal᷊ine manaranu! Wette pa'ammule ringangku!”

²⁰Mandariaga wal᷊en padariaganna udde nabbal᷊o apia manungku daroloṛṛanna udde na'omate ringannu ammul᷊annu tantara udde, arawe tate nabelengnga. Ana see i tou nabbisara apia, “Asinungka piaṛṛa'u ammul᷊annu tantara udde i Yehu, ana waugu i tou uasa'e keretan pangalone naal᷊ihidda taumata wewa.”

²¹“Riahite kereta'u,” parentan Ratu Yoram. Keretane niriahite, ana see Yoram wuṛṛu Ratu Ahazia inaite naisasomban Yehu, sangkatou-sangkatou su keretane sassane. I mangitou nassomban Yehu su wailla dorone tatahuanni Nabot.

²²“Apa i'o rumanta ere sangkatou hawe?” aiwal᷊on Yoram si Yehu. I Yehu sinumimbakka, “Apa wotongnge mariaddi ere sangkatou hawe, amungkangu isindi ta'e manambo taṛaroti, wuṛṛu ta'e pia pasasubba monganna apan tinattaki Izebel Inangngu udde?”

²³“Indi lal᷊obbossa, Ahazia!” aintul᷊in Yoram lapiddu nabbal᷊i'u keretane ana see tinumal᷊anga.

²⁴I Yehu nangannatta al᷊ati'anne wuṛṛu namiti'a si Yoram su liudde nallappassa sara pappuso. I Yoram nawantinga wuṛṛu nate sulal᷊ummu keretane.

²⁵Ana see i Yehu nabbisara si Bidkar mandariagane, “Apa i'o ta'e ma'anaungnga, sutempo i ite uasa'e awal᷊o uatantalonga si Ahab, iamangi Yoram? Sutempo udde MAWU nabbisara si Ahab, ‘I ya'u masingkata isai namate si Nabot wuṛṛu manga allange aṛṛabbi, wuṛṛu i Ya'u maddiandi sarun makkuumannu su wailla indi lai.’ ” “Ana waugu udde,” unni Yehu nanassukku wisarane su mandariagane udde, “Lomboa'e winal᷊unanni Yoram udde su wailli Nabot, tadea'u ṛuumannu MAWU Ruata iapamatta si tou.”

²⁷I Ahazia naasilo apa apan buatte nariaddi, ne i tou nantal᷊angu keretane watukku soan Bet-Hagan. I Yehu nangenggenna si tou wuṛṛu nangintul᷊i tantarane, “Pate lai tou!” I mangitou namiti'a si tou wuṛṛu nallessa sulal᷊anna mattudda watukku Gur, maranin soan Yibleam. Arawe i tou naatal᷊angu watanganne na'oman sara su Megido, wuṛṛu isudde i tou nate.

²⁸Manga mammamanaran araratuanne nangal᷊appa winal᷊unanne wuṛṛu niapiddu kereta nabelenga watukku Yerusalem ana see nilabbinga su labbingu mararatun su Soan Daud.

²⁹I Ahazia naola'a ratun Yehuda su tempo i Ratu Yoram ana'i Ahab buatte namarenta Israel mapul᷊oassa su tonnane.

³⁰I Yehu na'omate su Yizreel. Napawe i Izebel naaringikka sarangkanambone apan buatte nariaddi, i tou nalluwi utange wuṛṛu nappaattu celak ara'e raṛṛamaga mata, ana see nangintanno wuassu wal᷊en araratuanna.

³¹Napawe i Yehu sinumuttate su ngara pasallanganna, i Izebel nangintul᷊i, “Ei Zimri, taṛṛapate! Ma'ura i'o isindi?”

³²I Yehu naningngara watukku aui sungketa, wuṛṛu nabbisara, “Isai uasamba'a si ya'u?” Naaringikka udde, darua ara'e tatallu mamanaran araratuanna nangintanno lai.

³³I Yehu nabbisara si mangitou, “Tuntunga'e i tou inawaroddi!” Ne i mangitou nanuntungken Izebel inawaroddi ana see. I tou nailarannu keretane na'oman sara daṛṛane nassiappa su darandunga wuṛṛu su manga awal᷊on kereta udde.

³⁴Ana see i Yehu sinumutta sulal᷊ummu wal᷊en araratuanna wuṛṛu inumanna. Wua'udde i tou nabbisara, “Wawine niawontohanna. Salaiwe aroddi, labbinga'e winal᷊unanne, ana waugu i tou ana'u ratu.”

³⁵Arawe su tempo manga taumata inai mangal᷊appa winal᷊unanne ilabbinga, i mangitou naasomba tanggilal᷊ane, wuṛṛu manga duṛṛi ta'iakka wuṛṛu leddane.

³⁶Napawe olangnge udde niapasingkatta si Yehu, i tou nabbisara, “Indi buatte niwal᷊on MAWU, sutempo i Tou nabbisara si Elia allang-Nge: ‘Winal᷊unanni Izebel sarun inasannu asu su leta'u Yizreel,

³⁷wuṛṛu manga lamben binal᷊unanne udde uasal᷊iawukka ere tain binatangnga, na'oman sara tawe saran sangkatou apan wotongnge maaillal᷊a tanne winal᷊unanni sai udde.’ ”