Read Talaud 1 TAWARIKH 16 Bible Online

1 TAWARIKH 16 - Talaud bible

1 TAWARIKH 16

¹Wantallu Pa'aire udde niaddo sulal᷊ummu rasanna apan buatte niriahin Daud maola'a pangadoannu Wantalla udde. Ana see i mangitou nangonggolu sasamba itattambunna wuṛṛu sasamban paddarame su Ruata.

²Napawe i Daud buatte nangonggolu manga sasamba udde, i tou nangal᷊amatta tumana'u soa ringannu arannu MAWU,

³ana see nattahia anna si mangitou sarangkanambone. Suapan taumata isudde mawae ete esakka aroddi lai wawine naasomba sanduru ṛemessa buatte tinapa, roti wuṛṛu kismis.

⁴I Daud namile siri pira taumatan Lewi iapapiaṛṛa'u lal᷊aghu patataṛṛamawu su MAWU, Ruatan Israel, su saruannu Wantallu Pa'aire udde, ringannu aantari wuṛṛu manga daralo.

⁵I Asaf nipile maola'a piaṛṛangnge paarorone wuṛṛu i Zakharia tepellene. I Yeiel, i Semiramot, i Yehiel, i Matica, i Eliab, i Benaya, i Obed-Edom wuṛṛu i Yeiel manarane mannalangnga kecapi. I Asaf manarane mannalangnga simbal,

⁶wuṛṛu ruan katou imam, eteudde i Benaya wuṛṛu Yahaziel, manarane sidutu manniuppa trompeta su saruannu Wantallu Pa'aire udde.

⁷Eteudde paarorone i Daud nandolokki Asaf wuṛṛu manga ringanne iapaantarin daralo su MAWU.

⁸Paadiangkamante su MAWU, pasingkata'e awawantu-Ge, wattia'e manara-Ne suwallattu manga walahanna.

⁹Pangantariten daralo su MAWU, pasingkata'e anambon manara-Ne apan ma'atiangnga.

¹⁰Ete i Tou MAWU Apan Lembon tinggassa; lalluasse ana waugu i ite tatahuanan-Ne; sarangkanambone apan massubba si Tou ṛinone lumala'a.

¹¹Paddorongke atatohassa wuassi Tou, wuṛṛu sidutu passubbate si Tou.

¹²Ei papapulunni Yakub, allangngu Ruata! Ei papapulunnu Israel, walahanna apan nipile-Ne! Naungete anambon al᷊aṛṛindu'a apan niolang-Nge, imbaṛṛangnga abbul᷊iananna manga tita-Ne.

¹⁴MAWU uddewe Ruatan kite, tita-Ne ipappaatta su ahewallu runia.

¹⁵I Tou sidutu uanaungnga pa'aire-Ne, pa'aire-Ne iappa'amatta saran mal᷊annu-l᷊annu.

¹⁶Pa'aire udde niolang-Nge ringanni Abraham, wua'udde ringanni Ishak,

¹⁷ana see nitohassa ringanni Yakub maola'a pa'aire tawe panguddusanne su walahannu Israel.

¹⁸Wisara-Ne, “Leta'u Kanaan sarun Ta'u ionggola si yamiu maola'a leta'a pussaanu.”

¹⁹Dorone walahannu MAWU mabbiakka ere taumata raho poiaroddi reenganni mangitou tumaniten matulungnga.

²⁰I mangitou mammal᷊intadda wuassu walahanna sambau ringannu pabbawalaga waine, mangingkatta wuassu wanua sambau watukku wanua waine.

²¹Arawe MAWU tawe mamalan isai-sai apan mangallangnga si mangitou; ana waugu i mangitou, manga ratu niapanaung-Nge,

²²“Imbaṛṛangnga manal᷊awa'a manga taumata nipile-U, arie ma'ola'a al᷊al᷊eo su manga nabi-U.”

²³Pangantarite paddalo MAWU, ei runia sarangkanambone, miallo-miallo pasingkata'e watti'u al᷊al᷊uassa manungku i Tou buatte nanal᷊amatta si ite.

²⁴Wattia'e awawantu-Ge su manga walahanna, wuṛṛu manga manara-Ne apan matohassa su walahannu taumata.

²⁵Ana waugu MAWU mawantuga wuṛṛu lembon raddaloanna; I Tou ṛinone ia'ata'utta nangillembo wuassu al᷊awo'u monganna.

²⁶Manga mongannu walahanna waine tumba'u paal᷊uanna sassubbanna arawe MAWU uddewe nandiaddi winalanganna.

²⁷I Tou aoosannu awawantuga wuṛṛu asasemakka, wal᷊e-Ne napenen taṛṛino wuṛṛu lal᷊uassa.

²⁸Paddalote MAWU, ei walahannu taumata! Paddalote awawantu-Ge wuṛṛu atatohan-Ne.

²⁹Paddalote aran-Ne apan mawantuga, wuṛṛu apira'e sasamba sulal᷊ummu wal᷊e-Ne. Subbaite MAWU ringannu malluṛṛen laubbu patataṛṛamawu!

³⁰Pangngiladde su saruan-Ne, ei ahewallu runia! Runia matohassa tawe iaio'a.

³¹Ei langitta wuṛṛu runia, lalluasse! Pasingkata'e su manga walahanna manungku MAWU uddewe Ratu!

³²Raddalu'e ei tahal᷊oangnga wuṛṛu anambon lal᷊oṛṛone! Lallala'e ei wadda'a wuṛṛu al᷊awo'u sasuanne!

³³Manga aaluanna su mahurangnge sarun lumala'a ana waugu MAWU nirumantate mamarenta su runia.

³⁴A'al᷊iomante su MAWU, ana waugu i Tou mapia; darangngu-Ne saran mal᷊annu-l᷊annu.

³⁵Pasingkata'e, “Oh Ruata mananal᷊amatti yami, liuaawe yami wuassu taṛṛino manga walahanna waine wuṛṛu ammul᷊a'awe apia yami tadea'u yami wotongnge ma'adiangkamanna wuṛṛu maddalo aran-Nu apan susi!”

³⁶Paddalote MAWU, Ruatan Israel, orassa indi maddatingngu saran mal᷊annu-l᷊annu! Wua'udde anambon walahannu Israel nabbisara, “Amin,” ana see i mangitou naddalote MAWU.

³⁷Wua'udde i Ratu Daud nandolokki Asaf wuṛṛu manga taumatan Lewi waine tadea'u sidutu mammanara manga manara ipattaṛṛamawu sutampa suapa Wantallu Paairen MAWU sasahipunanna. Miallo-miallo i mangitou ṛinone mammanara isudde,

³⁸sasumbalanni Obed-Edom ana'i Yedutun, see lai 68 su atoune ingana'a waine apan sangkamonanni tou. I Bed-Edom wuṛṛu i Hosa eteudde manga mandariaga manga ngara passallanganna.

³⁹Arawe i Zadok wuṛṛu manga imam baine sidutu niapamanara mangngatokku patataṛṛamawu su tampa patataṛṛamawuanna su Gibeon.

⁴⁰Suapan marua' allo wuṛṛu wawallo i mangitou ṛinone mangonggolu sasamba itattambunna su meddan sasamba ere su manga tita apan nionggolu MAWU su taumatan Israel.

⁴¹Imam Zadok wuṛṛu manga imam udde sasumbalanni Heman wuṛṛu i Yedutun see lai manga taumata waine apan buatte nipile iapaantarin daralo su MAWU ana waugu darangngu-Ne apan tawe panguddusanne.

⁴²I Heman wuṛṛu i Yedutun uagassa lai trompeta wuṛṛu simbal wuṛṛu hatin musikka waine apan nanalanganna lakkindo'u aantari daralo. Manga taumata wuassu ṛuanganni Yedutun manarane mandiaga ngara pasallanganna.

⁴³Wua'udde anambon taumata napul᷊ete watukku wal᷊ene sambau-sambau. Aroddi lai i Daud napul᷊ete naisasomban amonanne.